REGİONLAR


“Şəki-İpək” ASC-də burucu və toxucu istehsalatların fəaliyyətləri bərpa olunub VİDEO

Şəki, 8 avqust, Mustafa Dadaşov, AZƏRTAC

Prezident İlham Əliyevin birbaşa diqqət və qayğısı ilə respublikamızda baramaçılığın inkişaf etdirilməsi, ipəkçiliyin müasir infrastrukturunun yaradılması istiqamətində həyata keçirilən tədbirlər nəticəsində bu il Azərbaycanda barama istehsalının bir neçə dəfə artaraq 244 tona çatması şimal-qərb bölgəsinin ən iri sənaye müəssisələrindən olan “Şəki-İpək” ASC-nin fəaliyyətini yenidən canlandırıb.

Xəbər verdiyimiz kimi, iyulun 3-dən müəssisənin baramaaçan istehsalatı işə salınıb və burada yenidən xam ipək istehsalına başlanılıb. Avqustun əvvəlindən etibarən isə artıq müəssisənin burucu və toxucu istehsalatlarının da fəaliyyətləri bərpa edilib.

AZƏRTAC-ın müxbiri bu istehsal sahələrində olub, işçilərlə söhbətləşib.

Kümçülərdən tədarük olunan yaş barama müəssisənin xammal şöbəsində çeşidlənib təmizləndikdən sonra baramaaçan istehsalatına göndərilir. Burada istehsal olunan xam ipək sap daha sonra müəssisənin burucu istehsalatına daxil olur. Bir teldən ibarət olan ipək sap sexdəki dəzgahların köməyi ilə alıcının sifarişinə əsasən, 3 teldən 10 telədək qalınlıqda burulur. Hazırda bu istehsal sahəsində 25 işçi çalışır. Texnoloq Firidə Həşimovanın bildirdiyinə görə, sexin fəaliyyətinin bərpa edilməsi işçilər tərəfindən böyük razılıqla qarşılanıb. İşçilərlə söhbət zamanı burucular Xatirə Bağbanlı, Sevil Kərimova, Tamella Tağıyeva və başqaları avqustun 4-də Qaxda keçirilən respublika müşavirəsində Prezident İlham Əliyevin “Şəki-İpək” ASC-nin fəaliyyətinin gücləndirilməsi ilə bağlı söylədiyi fikirləri böyük sevinc hissi ilə qarşıladıqlarını vurğulayıb, müəssisənin fəaliyyətinin yenidən bərpa edilməsinə göstərdiyi qayğıya görə kollektiv adından dövlətimizin başçısına minnətdarlıqlarını bildiriblər.

Burulmuş ipək sap sonra müəssisənin toxucu istehsalatına göndərilir. İstehsalatın meneceri Abbas İsrafilovun bildirdiyinə görə, burada 70 işçi çalışır. İstehsalatda SSRİ-də istehsal olunmuş 96 ədəd köhnə dəzgahla yanaşı, Almaniya istehsalı olan 6 ədəd ən müasir toxucu avadanlığı da quraşdırılıb. Bu dəzgahların məhsuldarlığı əvvəlkilərdən bir neçə dəfə çoxdur. Sexdə toxunan ipək parçadan əsasən kəlağayı istehsalında istifadə olunur. İpək parçanın qalan hissəsi isə sifarişə uyğun olaraq doğranır, boyaq-bəzək sexində yuyulub ağardılır və daha sonra satışa göndərilir. Sexdə çalışan işçilərin orta aylıq əməkhaqqı 165-390 manat təşkil edir.

Toxucu istehsalatında çalışan ərişçi Sona Sadiqova və başqaları onlar üçün yaradılan şəraitdən razı qaldıqlarını bildiriblər.

Səhmdar Cəmiyyətin idarə heyətinin sədri Nizami Qəribov AZƏRTAC-a bildirib ki, hazırkı xammal ehtiyatı ilə müəssisənin burucu, toxucu və digər istehsal sahələri 8 ay müddətində normal fəaliyyət göstərə biləcək. Müəssisə rəhbəri deyib ki, Prezident İlham Əliyevin müşavirədə qeyd etdiyi kimi, növbəti ildə ölkədə barama istehsalının 500 tona çatdırılması qarşıya hədəf olaraq qoyulub. Xammal ehtiyatının artması müəssisənin ilboyu fasiləsiz fəaliyyətini təmin edəcək, eyni zamanda, ikinövbəli iş rejiminə keçmək də mümkün olacaq.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.