REGİONLAR


Şəmkirdə yetişdirilən pomidorun 70 faizi Rusiya bazarlarına ixrac olunur

Şəmkir, 1 iyun, Famil Quliyev, AZƏRTAC

Şəmkir rayonunun kəndlərində əhalinin əsas gəlir mənbəyini əkinçilik təşkil edir. Hazırda rayonun kəndli fermerləri və fərdi təsərrüfat sahibləri tarla işləri ilə məşğuldur. Erkən yaz aylarında havanın bir müddət yağmurlu və şaxtalı keçməsi əkin sahələri üçün çox xeyirli olub. Belə ki, sahələrdə bol məhsul yetişib.

Bu sözləri AZƏRTAC-ın müxbiri ilə söhbətində Şəmkir Rayon Kənd Təsərrüfatı İdarəsinin rəisi Kamil Yusibov bildirib. Onun sözlərinə görə, hazırda rayonun 30-dan artıq kəndində vətəndaşlar fərdi həyətyanı sahələrində və mülkiyyətlərində olan pay torpaqlarında faraş tərəvəzçiliklə məşğuldurlar.

Kamil Yusibov qeyd edib ki, Əliyaqublu, Muxtariyyat, Dəllər Cəyir, Qaracəmirli, Yeniabad, Yeni Həyat, Mahmudlu, Keçili kəndlərində tərəvəz əkini daha geniş vüsət alıb. Bu kəndlərdə faraş tərəvəzçilik əkininə çox erkən, yəni dekabr ayında başlanılır: “Həmin kəndlərdə elə bir həyətyanı sahə yoxdur ki, orada istixana olmasın. Əvvəlcə kiçik istixanalarda pomidor toxumlarının səpini aparılır. Aqrotexniki qulluq göstərilərək yetişdirilən pomidor şitilləri fevral-mart aylarında böyük istixanalarda torpağa köçürülür. Hazırda kəndlərdə pomidor və xiyar şitillərinə qulluq edilir, eləcə də yetişən məhsul toplanılaraq müştərilərə satılır”.

İdarə rəisi bildirib ki, kənd əməkçiləri məhsulu alıcılara elə öz həyətlərində satırlar: “Pomidorun bir kiloqramı 70-80 qəpiyə, xiyarın bir kiloqramı isə 40-50 qəpiyə satılır. Rayonda istehsal olunan pomidorun təxminən 70-80 faizi Rusiyaya ixrac edilir. İş adamları kəndlərə gedərək həyətlərdə məhsulu vətəndaşlardan münasib qiymətə alır, qablaşdırır və yük avtomobilləri ilə Rusiya bazarlarına aparırlar”.

Qeyd edək ki, rayonda faraş tərəvəzçiliklə məşğul olan istehsalçıların 60-70 faizi istixanalardan ildə iki dəfə məhsul götürə bilirlər. Bu il rayonda 4099 nəfər 896 hektar sahədə pomidor və xiyar məhsulları yetişdirib. Bir hektardan orta məhsuldarlığın 90-95 sentner olması, yəni 80-90 min ton tərəvəz məhsulu gözlənilir. İndiyədək 50-55 min ton məhsul tədarük edilərək satılıb. Hazırda rayonda məhsul yığımı davam edir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.