İQTİSADİYYAT


Sənaye parkları və sənaye məhəllələrinin mövcudluğu qeyri-neft sektorunun davamlı inkişafını stimullaşdıracaq

Bakı, 12 yanvar, AZƏRTAC 

İqtisadi İslahatların Təhlili və Kommunikasiya Mərkəzində (İİTKM) "Sənaye parkları və sənaye məhəllələrinin fəaliyyəti, monitorinqi və qiymətləndirilməsi" mövzusunda treninq keçirilib.

Mərkəzdən AZƏRTAC-a bildiriblər ki, treninq Dünya Bankının baş mütəxəssisi Melissa Rekas və İİTKM-nin konsaltinq və treninq əlaqələndiricisi Kamil Ələsgərov tərəfindən aparılıb.

Dünya Bankının eksperti sənaye parkları və sənaye məhəllələrinin mövcudluğunun qeyri-neft sektorunun davamlı inkişafı, ölkə iqtisadiyyatının ixrac qabiliyyətinin, eləcə də rəqabətqabiliyyətli məhsulların istehsalının artırılması, məşğulluğun təmini kimi mühüm məsələlərin inkişafını stimullaşdıracağını qeyd edib. O bildirib ki, sənaye parkları və məhəllələrinin yaradılması ölkə iqtisadiyyatının tarazlı inkişafının təmin edilməsini nəzərdə tutan siyasətin bir hissəsidir. Tədbirdə sənaye parkının rezidentlərinin fəaliyyətləri haqqında hesabat-statistik məlumatların alınması, onların fəaliyyətinin monitorinqinin həyata keçirilməsi sahəsində mövcud olan qanunvericilik qaydaları haqqında da danışılıb, dünya təcrübəsi ilə müqayisəli təhlili aparılıb.

Xarici ölkələrin bu sahədəki təcrübəsinin ölkəmizə müsbət töhfə verməsi məqsədilə təşkil edilmiş təlimdə Azərbaycanda mövcud olan sənaye parklarının, aqroparkların, habelə nazirliklərin nümayəndələri iştirak edib.

Ekspertlər iştirakçıların suallarını cavablandıraraq, onları maraqlandıran mövzular üzrə geniş müzakirələr aparıblar. Tədbirin sonunda treninq iştirakçılarına sertifikatlar təqdim olunub.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.