Bakı, 25 may, AZƏRTAC

ABŞ-ın Missuri ştatının Sent-Luis şəhərində Amerika rəssamı Ketlin Aasen (Duet Qalereyası) və Azərbaycan rəssamı Vüsal Rəhimin (YAY Qalereyası) əsərlərindən ibarət duet sərgi açılıb. İlk dəfədir ki, bu iki rəssamın əsərləri birlikdə nümayiş olunur. Onların abstrakt rəngkarlığa yanaşma tərzinin əks olunduğu əsərlərdən ibarət bu sərgi iki ölkə arasında mədəniyyət dialoqu təəssüratı bağışlayır. Duet Qalereyasının (Sent-Luis) direktoru Daniel Mak-Qrat və YARAT Müasir İncəsənət Məkanının (Bakı) yerli proqramlar üzrə direktoru Lana Sokolova bu sərgiyə birlikdə kuratorluq edirlər.

YARAT Müasir İncəsənət Məkanından AZƏRTAC-a bildirilib ki, Vüsal Rəhimin sərgidə nümayiş etdirdiyi rəngkarlıq silsiləsi onun əvvəlki əsərlərində sınayıb-təkmilləşdirdiyi özünəməxsus rəssamlıq üslubu üzərində qurulub. Hər tablosunda Vüsal Rəhim insan fiqurunun tanınan cizgilərini ayrı-ayrılıqda müəyyən abstrakt formalar şəklində göstərərək, parlaq rəng palitrasından aldığı boyanı kətan üzərinə sərbəst, süzgün yaxmaqla vahid obraz halına gətirir. Onun tablolarından duyulan dinamik hərəkət hissi bu əsərləri tükənməz enerji ilə doldurur. Cizgilər və düşünülmüş kompozisiya vasitəsilə rəssam həmin enerjiyə nəzarət edir.

Ketlin Aasenin rəngkarlıq əsərləri Vüsal Rəhimin tabloları ilə yanaşı sərgilənərək kontrapunkt yaradır. Onun kağız və kətan üzərində çəkdiyi şəkillərin üstündə ara-sıra ləkələr düşüb, boyalar axaraq iz qoyub, rənglər solub. Üst qatın əriyib-axan boyaları altından astarın boylanıb-çıxdığına görə bu təsvirlər, sanki, təbii, ancaq formalarından heç nəyə oxşamayan bir görüntü yaradır və beləliklə, yoxluğa işarə vururlar. Üslub baxımından Vüsal Rəhimin işlərinə nə qədər nəzarət və enerji, səliqə-sahman və dinamizm xasdırsa, Ketlin Aasenin əsərləri üçün bir o qədər səssizlik, müəllif barədə az məlumat vermək səciyyəvidir.

Rəssamların yaradıcılığı barədə fikirlərini bölüşən Daniel Mak-Qrat deyib: “Keçən ilin oktyabrında Lana Sokolova “CEC Arts Link”in art-rezident qonağı qismində Sent-Luisdə olduğu zaman onunla görüşmək mənə nəsib oldu. Biz onunla “Duet”də müştərək kuratorluğumuzla sərgi keçirmək imkanlarını müzakirə etdik. Vüsal Rəhimlə Ketlin Aasenin əsərlərini birlikdə sərgiləmək Lananın seçimi oldu. Onun fikrincə, bu rəssamların abstrakt rəngkarlıqda nümayiş etdirdikləri üslub baxımından onların əsərlərinin qoşa təqdimatı maraqlı və düşündürücü olmalıdır”.

Yerli proqramlar üzrə direktor və müştərək kurator Lana Sokolova isə ilk dəfə Ketlin Aasenin əsərlərinə baxan kimi Vüsalın emalatxanasında gördüyü abstrakt eskizləri xatırladığını bildirib. “Ketlinlə duet sərgilənmək üçün Vüsalı ona görə seçdim ki, bu iki rəssamın əsərlərində gerçəkliyin abstrakt təsvirə çevrilməsi güclü bir paralellik təşkil edir. Onların hər ikisi açıq, aktiv rənglərdən istifadə edir, öz rəngkarlıq işlərində rəngin insan hissiyyatlarını oyadan xüsusiyyətlərini instinktiv duyub-anladıqlarını nümayiş etdirirlər. YARAT Müasir İncəsənət Məkanı müxtəlif mədəniyyətlər arasında dialoqun qurulması uğrunda çalışır və bu baxımdan belə bir sərgi bizim qarşımızda qoyulan məqsədlərə bir az da yaxınlaşmaq üçün əlverişli imkandır. Azərbaycan və ABŞ-ın gənc rəssamları arasında əlaqələri möhkəmləndirmək işində incəsənətin rolu olduqca böyükdür”.

Vüsal Rəhim Azərbaycan Dövlət Rəssamlıq Akademiyasında təhsil alıb. Əsərləri YAY Qalereyası tərəfindən ölkəmizdə və xaricdə sərgilənir. Onun “Black woman” adlı fərdi sərgisi YAY Qalereyasında keçirilib. Vüsal Rəhim, həmçinin “BACARART layihəsi”ndə (Azərbaycan), “Ev, doğma ev” (Azərbaycan Mədəniyyət Mərkəzi, Paris), “Sülh dairəsi” (Gürcüstan Yazıçılar Evi, Tbilisi), “Commonist” (YARAT Müasir İncəsənət Mərkəzi, Bakı), “İz” (Azərbaycan Milli Tarix Muzeyi), habelə IV Beynəlxalq Türk Mədəniyyəti, İncəsənəti və Mədəni İrsi Simpoziumu (Milan) çərçivəsində təşkil olunan sərgilərdə iştirak edib.

Ketlin Aasen Sent-Luisdəki Missuri Universitetində təsviri sənət üzrə bakalavr dərəcəsini alıb. O, hazırda Sent-Luisdəki Vaşinqton Universitetinin magistraturasında rəngkarlıq üzrə təhsil alır. Sent-Luisdə təqdim olunan sərgi Ketlin Aasenin ilk duet sərgisidir.

Sərgi iyulun 17-dək davam edəcək.