Şərur, 27 mart, AZƏRTAC

Naxçıvan Muxtar Respublikasının Şərur rayonunda 87 min 226 hektar torpaq sahəsinin 25 min 510 hektarı kənd təsərrüfatına yararlıdır. Əkin sahələri isə 17 min 115 hektar təşkil edir ki, bunun da 12 min 492 hektarı və ya 72,9 faizi suvarılan torpaqlardır.

AZƏRTAC xəbər verir ki, bu barədə Şərur rayonunda Cəlilkənd və digər ətraf kəndlərin torpaq mülkiyyətçilərinin iştirakı ilə keçirilən müşavirədə məlumat verilib.

Müşavirədə Şərur Rayon İcra Hakimiyyətinin başçısı İbrahim Məmmədov çıxış edərək torpaqlardan səmərəli istifadə olunması və yüksək keyfiyyətli məhsul istehsalı üçün torpaq mülkiyyətçilərinə hər cür şəraitin yaradıldığını diqqətə çatdırıb.

İbrahim Məmmədov bildirib ki, rayonda yaz-tarla işlərinə hazırlıq diqqət mərkəzindədir. Artıq toxumluq kartofun və mineral gübrələrin tədarükünə başlanılıb. Rayonda su itkisinə yol verilməməsi üçün bu ilin yanvar-fevral aylarında suvarma sistemləri idarəsi tərəfindən 18,2 kilometr məsafədə ara arxları, 3,5 kilometr kollektor, 12 kilometr məsafədə beton və torpaq kanallar lildən təmizlənib.

Vurğulanıb ki, ötən illərdə olduğu kimi, bu il də Şərur rayon torpaq mülkiyyətçiləri sahələrdən bol məhsul götürülməsi üçün bütün mövcud imkanlardan istifadə etməlidirlər.

Naxçıvan “Aqrolizinq” Açıq Səhmdar Cəmiyyətinin baş direktoru Vasif Məmmədov bildirib ki, cəmiyyət tərəfindən 2016-cı ildə hüquqi və fiziki şəxslərə 174 min 278 manat dəyərində 31 ədəd müxtəlif təyinatlı kənd təsərrüfatı texnikası və texnoloji avadanlıqlar güzəştli şərtlərlə satılıb. Bu il də bu işlər davam etdiriləcək, sahibkarlara kənd təsərrüfatı texnikalarının alınması üçün lazımi köməklik göstəriləcək.

Daşınmaz Əmlak və Torpaq Məsələləri üzrə Dövlət Komitəsinin Şərur Rayon İdarəsinin müdiri Vəfadar Hüseynov, Suvarma Sistemləri İdarəsinin rəisi Məhəmməd Cəlilov görülən işlər barədə məlumat veriblər.

Rayonun Düdəngə bələdiyyəsinin sədri Yaqub Mehdiyev və fermer Faiq Ağayev kənd təsərrüfatı sahəsində əldə etdikləri təcrübəni tədbir iştirakçıları ilə bölüşüblər.

Sonda yaz-tarla işlərinin gedişi ilə əlaqədar fikir mübadiləsi aparılıb, fermer və əkinçilərin texnika, mineral gübrə, suvarma suyu ilə təminatına dair müvafiq tapşırıqlar verilib.