Bakı, 30 mart, AZƏRTAC

Beynəlxalq koalisiyanın başında duran Səudiyyə Ərəbistanı Yəməndə hərbi əməliyyatları qələbəyə qədər davam etdirəcək. Bu qərarı Misirdəki sammitdə Ərəb Ölkələri Liqası da dəstəkləyib.

AZƏRTAC Euronews telekanalına istinadla xəbər verir ki, ötən gecə koalisiyanın Hərbi Hava Qüvvələri husi üsyançılarının nəzarətində olan Yəmənin paytaxtı Səna şəhərinə yenidən zərbələr endirib. Yerli sakinlər zərbələrin əsasən bir çox ölkənin diplomatik missiyalarının yerləşdiyi məhəlləyə endirildiyini desələr də, koalisiya qüvvələri komandanlığı onların hədəfində üsyançıların sursat anbarları və bazaları, həmçinin kommunikasiya və hava hücumundan müdafiə obyektləri olduğunu bildirib.

Qeyd edək ki, Yəməndə şiə üsyançılarına qarşı aparılan “Qətiyyət tufanı” əməliyyatı martın 26-na keçən gecə başlayıb. Beynəlxalq koalisiyaya Səudiyyə Ərəbistanı ilə yanaşı, Qətər, Küveyt və digər Fars körfəzi ölkələri, həmçinin Misir, Mərakeş, İordaniya və Sudan daxildir. Əməliyyat hələlik hava zərbələri ilə məhdudlaşsa da, sonradan yerüstü əməliyyatların keçirilməsi istisna olunmur. Ər-Riyad müdaxilənin məqsədinin Yəməndə qanuni prezidentin hakimiyyətinin bərpa olunmasına yönəldiyini qeyd edir.

“Artıq bizim başqa yolumuz qalmayıb. Biz bütün mümkün vasitələrlə hadisələrin bu həddə çatmasından yayınmağa çalışdıq. İndiyə qədər 67 dəfə razılaşma bağlasaq da, onlar hər dəfə husilər tərəfindən pozuldu. Ölkədə yeni əraziləri ələ keçirməyə davam edən husilər prezidentin sığındığı Ədən şəhərinə yaxınlaşdıqdan sonra biz artıq müdaxilə etmək qərarına gəldik”, – deyə Səudiyyə Ərəbistanının ABŞ-dakı səfiri Adil Əl-Cubeyr Amerikanın CBS kanalına müsahibəsində qeyd edib.

Koalisiya komandanlığı hava zərbələri nəticəsində Ədən şəhəri ətrafında üsyançıların iri bazasının məhv edildiyini və onların ölkənin ən iri ikinci şəhərini ələ keçirməyə maneə olduqlarını bəyan edib. Ədən şəhərinə sığınan Prezident Abd Rabbo Mənsur Hadi ölkəni tərk etməyə məcbur olub.

ABŞ öz növbəsində Yəməndəki hərbi əməliyyatlarda iştirak etməyəcəyini, lakin koalisiyaya kəşfiyyat və təchizat sahələrində yardım göstərməyə hazır olduğunu bildirib.

Çin isə öz vətəndaşlarını təxliyə etmək məqsədi ilə Yəmən sahillərinə bir neçə hərbi gəmi göndərib.