MƏDƏNİYYƏT
Silahlı Qüvvələrin Təlim və Tədris Mərkəzində ümummilli lider Heydər Əliyevin xatirəsi anılıb
Bakı, 9 dekabr, AZƏRTAC
Dekabrın 9-da Silahlı Qüvvələrin Təlim və Tədris Mərkəzində Bakı Şəhər İcra Hakimiyyəti Aparatının Kino Xidmətinin təşkilatçılığı ilə ulu öndər Heydər Əliyevin xatirəsinə həsr olunmuş anma tədbiri keçirilib.
AZƏRTAC xəbər verir ki, əvvəlcə Ümummilli Liderin nurlu xatirəsi ehtiramla anılıb.
Vətən torpaqları uğrunda canından keçmiş qəhrəman oğul və qızlarımızın xatirəsi bir dəqiqəlik sükutla yad olunub.
Tədbirdə Milli Məclisin deputatları Aydın Mirzəzadə, Fazil Mustafa və Jalə Əliyeva çıxış edərək ulu öndər Heydər Əliyevin dövlətçiliyimizin inkişafındakı xidmətlərindən danışıblar. XX əsr Azərbaycan tarixinin ən parlaq siması, ulu öndər Heydər Əliyevin siyasi obrazını təhlil edən natiqlər onun xalqımızın dövlətçilik şüurunun və tarixin sınağından şərəflə çıxmış bütöv idarəçilik qabiliyyətindən söz açıblar.
Diqqətə çatdırılıb ki, Ulu Öndərin zəngin siyasi təcrübəsi, yüksək idarəçilik bacarığı, Vətənə olan tükənməz sevgisi Azərbaycanın dövlət müstəqilliyini təhlükədən qurtardı. Onun düşünülmüş siyasi təcrübəsi nəticəsində cəmiyyətimizdə hökm sürən xaos və anarxiya, iqtisadi-siyasi və mənəvi-psixoloji gərginliklər aradan qaldırıldı. Ümummilli lider Heydər Əliyevin vətənimizin ərazi bütövlüyünün qorunub saxlanılması, ölkənin parçalanma təhlükəsinin aradan qaldırılması yönündə gördüyü işlərə toxunan çıxışçılar Heydər Əliyevin müstəqilliyimizin, sözün əsl mənasında, möhkəmləndirilməsi yolundakı tarixi xidmətlərindən bəhs ediblər.
Qeyd olunub ki, Heydər Əliyev siyasi kursu daim inkişafda olan bir təlim olaraq yaşayır və müstəqilliyimizin daha da möhkəmlənməsinə təkan verir. Prezident İlham Əliyev Ümummilli Liderin siyasi kursunu layiqli şəkildə davam etdirərək praqmatik daxili və xarici siyasəti ilə ölkəmizi uğurlu gələcəyə aparır. Bu gün xalqla dövlət arasında çox sıx bağların olduğuna diqqət çəkən natiqlər söyləyiblər ki, Heydər Əliyev ideyaları və siyasi kursu Azərbaycan durduqca yaşayacaq.
Digər çıxış edənlər müasir müstəqil Azərbaycanın qurucusu və memarı, ulu öndər Heydər Əliyevin zəngin siyasi irsindən, ordu quruculuğu sahəsindəki xidmətlərindən söz açıblar.
Daha sonra Xalq Artisti Ağadadaş Ağayev və Əməkdar Artist Elza Seyidcahanın ifasında Ulu Öndərə həsr olunmuş mahnı və elegiya səslənib.
Sonda Gültəkin Nərimanın ekranlaşdırdığı “Xalqa bağışlanan ömür” sənədli filminin təqdimatı olub.