İQTİSADİYYAT
“Şimal-Cənub” Beynəlxalq Nəqliyyat Dəhlizinin inkişaf perspektivləri müzakirə olunub VİDEO
Bakı, 12 yanvar, Elvin Camalov, AZƏRTAC
Yanvarın 12-də Bakıda “Şimal-Cənub” Beynəlxalq Nəqliyyat Dəhlizi: yeni istiqamətlər, inkişaf və perspektivlər” mövzusunda Beynəlxalq Forum keçirilib.
AZƏRTAC xəbər verir ki, forumda “Azərbaycan Dəmir Yolları” QSC-nin sədri Cavid Qurbanov, “İran Dəmir Yolları” şirkəti Direktorlar Şurasının sədri Möhsün Purseyid Ağayi, İran nəqliyyat və şəhərsalma nazirinin müavini Mohəmməd Seyidnejat, “Gürcüstan Dəmir Yolu” Səhmdar Cəmiyyəti idarə heyətinin sədri Mamuka Baxtadze, “Ukrayna Dəmir Yolu” Səhmdar Cəmiyyəti idarə heyətinin sədr əvəzi Aleksandr Zavqorodniy, “Azərbaycan Xəzər Dəniz Gəmiçiliyi” QSC-nin sədri Rauf Vəliyev və “Bakı Beynəlxalq Dəniz Ticarət Limanı” QSC-nin baş direktoru Taleh Ziyadov iştirak ediblər.
“Azərbaycan Dəmir Yolları” QSC-nin sədri Cavid Qurbanov bildirib ki, İranla Azərbaycan arasında hərəkət edən yük maşınlarının 50 faizi Rusiya istiqamətində olub. Hazırda bu istiqamətdə dəmir yolu xətti olmadığı üçün yüklərin bir qismi avtomobillərlə daşınır. Şimali Avropanı Cənub-Şərqi Asiya ilə birləşdirən “Şimal-Cənub” Beynəlxalq Nəqliyyat Dəhlizi Azərbaycan üçün çox önəmli marşrut olaraq, respublikamızın tranzit potensialından yüksək səviyyədə bəhrələnməyə imkan verəcək. Bu layihənin gerçəkləşdirilməsi yüklərin ünvanına çatdırılma müddətlərini 2-3 dəfə azaldacaq.
QSC sədrinin sözlərinə görə, İran körfəzi–Qara dəniz tranzit dəhlizində Qəzvin–Rəşt-Astara -Azərbaycan dəmir yolunun birləşdirilməsi mühüm addımdır. Bu layihənin tezliklə başa çatdırılması “Şimal-Cənub” tranzit dəhlizinin inkişafına təkan verəcək.
Həmçinin qeyd olunub ki, bu dəhliz tranzit yüklərin Hind okeanı və Fars körfəzində yerləşən limanlardan Bəndər-Xomeyni və Bəndər-Abbas limanlarına, oradan isə dəmir yolu ilə İran, Azərbaycan və Gürcüstan ərazisindən keçərək Qara dəniz hövzəsində yerləşən limanlara və əks istiqamətdə daşınması iqtisadi baxımdan daha əlverişli olacaq. Hesablamalara görə, mövcud infrastruktur nəzərə alınarsa, bu dəhliz üzrə Bəndər-Abbas limanından Poti və Batumi limanlarına yükdaşımaları 7 gün, Mumbai limanından Gürcüstanın həmin limanlarına isə 14 gün ərzində reallaşdırmaq mümkündür.
“İran Dəmir Yolları” şirkəti Direktorlar Şurasının sədri Möhsün Purseyid Ağayi Qəzvin-Rəşt-Astara dəmir yolu xəttində işlərin 80 faizinin başa çatdığını bildirib.
Onun dediyinə görə, yolun tikintisi 2019-ci ilin sonuna kimi yekunlaşacaq. İlkin olaraq 5 milyon ton, daha sonra isə il ərzində 10 milyon ton yükün Gürcüstana, oradan isə Qara dəniz vasitəsilə Ukraynaya daşınması nəzərdə tutulub. İran Azərbaycan və Gürcüstanla birlikdə yeni bir müvəqqəti layihə ilə bağlı müzakirələr aparır. Bunun üçün iki variant nəzərdə tutulub. Birincisi, İran və Azərbaycanın dəmir yollarının birləşdirilməsidir. Azərbaycan və İran üzərinə öhdəlik götürüb ki, 2016-cı ilin sonuna qədər bu işi həyata keçirsinlər. Beləliklə, İranın cənubunda yerləşən Bəndər-Abbasdan Qəzvinə qədər yüklər dəmir yolları ilə gətiriləcək və oradan Astarayadək digər nəqliyyat vasitələrilə daşınacaq. Astaradan isə Azərbaycan dəmir yolları vasitəsilə nəql olunacaq.
İkinci variant isə yüklərin İranın Əmirabad limanı vasitəsilə daşınmasıdır. Dörd aya kimi, yükləri bu dəniz limanında vaqonlardan birbaşa gəmiyə vurmaq üçün şərait yaradılacaq. Yüklər Bəndər-Abbasdan Əmirabad limanına göndəriləcək, burada vaqonlar gəmi ilə Azərbaycanın Ələt limanına çatdırılaraq yenidən dəmir yolları vasitəsilə Gürcüstana daşınacaq. Oradan isə Qara dəniz limanlarına göndəriləcək.
Möhsün Purseyid Ağayi, həmçinin Hindistandan Avropaya qədər daşımaların ortaq tariflərə dair razılıq əldə olunmasına çalışdıqlarını söyləyib.
“Azərbaycan Xəzər Dəniz gəmiçiliyi” QSC-nin sədri Rauf Vəliyev forum iştirakçılarına Gəmiçiliyin bərə donanmasının Xəzərdə rolu barədə ətraflı məlumat verərək, qurumun əsas strategiyasının və inkişaf prioritetinin ölkə ərazisindən keçən nəqliyyat dəhlizlərinin, o cümlədən “Şimal-Cənub” dəhlizinin imkanlarından optimal istifadəyə yönəldiyini vurğulayıb. Bildirib ki, bu gün Avropa-Qafqaz-Asiya, habelə Şimal-Cənub istiqamətlərində Xəzərdən keçməklə təhlükəsiz və effektiv yükdaşımaların təmin edilməsində AXDG-nin donanması əhəmiyyətli rol oynayır.
Rauf Vəliyev qeyd edib ki, nəqliyyat sahəsi Azərbaycan iqtisadiyyatının qeyri-neft sektorunun inkişafına öz töhfələrini verir və daim ölkə rəhbərliyinin diqqət mərkəzindədir.
Gəmiçiliyin sədri Rauf Vəliyev AXDG-nin bərə gəmilərinin Əmirabad istiqamətində işləməyə tam hazır olduğunu və bu daşımalara Ro-Ro gəmilərinin də cəlb edilməsinin mümkünlüyünü bildirib.
Sonda qarşılıqlı əməkdaşlığın inkişafına dair Azərbaycan, Gürcüstan, Ukrayna, İran arasında müqavilə imzalanıb.