CƏMİYYƏT
Şimali Kipr məktəblərində Azərbaycan tarixi tədris olunacaq
Bakı, 26 may, AZƏRTAC
Şimali Kipr məktəblərində “Azərbaycan tarixi” fənninin tədrisi üçün hazırlıqlara başlanılıb. Azərbaycan-Kipr Dostluq Cəmiyyətinin (AKDC) sədri Orxan Həsənoğlunun, sədr müavinləri Bəxtiyar Məmmədov və Anar Həsənovun Şimali Kiprin mədəniyyət və təhsil məsələlərinə cavabdeh olan Özdəmir Berova ilə görüşündə bununla bağlı müzakirələr aparılıb.
Diasporla İş üzrə Dövlət Komitəsindən AZƏRTAC-a bildiriblər ki, görüşdə AKDC sədri Orxan Həsənoğlu Azərbaycanda keçirilən “Bakı-2017” İslam Həmrəyliyi Oyunları və Prezident İlham Əliyevin Azərbaycan Xalq Cümhuriyyətinin 100 illiyinə həsr olunmuş Sərəncamı barədə ətraflı məlumat verib.
Daha sonra rəhbəri olduğu təşkilatın fəaliyyəti barədə danışan O.Həsənoğlu bildirib ki, AKDC-nin Azərbaycanın təbliği ilə bağlı planlarını reallaşdırmaq üçün dəstəyə ehtiyac var. AKDC sədri Şimali Kipr xalqı ilə Azərbaycan xalqının eyni milli-mənəvi və ortaq dəyərləri bölüşdüyünü vurğulayaraq, bu iki xalqın bir-birinin tarixini yaxşı bilməli olduğunu dilə gətirib. Qeyd edib ki, xüsusilə gənc nəslə təhsil vasitəsilə ortaq dəyərlərimiz və bizi birləşdirən mənəvi bağları anlatmaq imkanlarımız var. Diaspor rəhbəri Ö.Berovadan Şimali Kipr məktəblərində bir günlük Azərbaycan tarixi dərsi keçilməsi üçün şərait yaradılmasını xahiş edib.
Ö.Berova AKDC-nin fəaliyyətindən məmnunluğunu ifadə edib. Bildirib ki, Şimali Kiprdə çox sayda azərbaycanlının təhsil alması və yaşaması sevindiricidir: “Biz iki qardaş xalqıq, ortaq milli dəyərlərimizin və ortaq tariximizin olması reallıqdır. Sizin bu təklifinizi müsbət qarşılayırıq. AKDC yeni ideyalarla və öz işi ilə Şimali Kiprdə daim seçilib. Biz də Şimali Kipr olaraq sizin bu addımlarınızı daim dəstəkləmişik. Bu ideyanızı da dəstəkləyir və uğurlar arzulayırıq”.
Görüşdə ölkə məktəblərində Azərbaycan tarixi dərsinin keçilməsi və dərsliklərə Azərbaycanla bağlı mövzunun daxil edilməsi məsələsinin yaxın vaxtlarda həllini tapacağı bildirilib.
Sonda Şimali Kiprdəki Azərbaycan diasporuna göstərdiyi diqqət və dəstəyə görə Özdəmir Berova minnətdarlıq ifadə olunub.