MƏDƏNİYYƏT
Sinqapur, Flandriya və Yunanıstan Azərbaycan turistlərinin diqqətini cəlb etməyə çalışırlar
Bakı, 15 aprel, AZƏRTAC
Sinqapur və Flandriyanın (Belçika) turizm ofislərinin nümayəndələri aprelin 14-də Bakıda keçirilən “B2B Luxury & MICE Workshop” seminarında ilk dəfə iştirak ediblər. Dəbdəbəli istirahət və işgüzar turizm imkanlarına həsr olunmuş tədbir dünyanın müxtəlif ölkələrindən 40-dan çox profil təşkilatın mütəxəssislərini bir araya gətirib. Onların arasında turistləri qəbul edən turoperatorların, otellərin, turizmin inkişafı üzrə ofislərin, ticarət müəssisələrinin, nəqliyyat şirkətlərinin və digər turizm sahələrinin nümayəndələri olub. Vorkşopun sponsoru Azərbaycan bazarı ilə münasibətlərin inkişafına böyük maraq göstərən Sinqapurun turizm ofisidir.
Sinqapur Respublikasının Rusiyadakı səfirliyinin turizm məsələləri üzrə ikinci katibi Beverli Au Yonq AZƏRTAC-ın müxbiri ilə söhbətdə deyib: “İndiki tədbir çərçivəsində həmkarlarla ünsiyyət Azərbaycan turizm bazarının potensialına inamı möhkəmləndirdi. Ölkənizin peşəkarları Sinqapurun turizm məhsulu barədə yetərincə məlumatlıdır. Bu da onların müştəriləri arasında tələbatın olduğunu təsdiq edir. Bizdə tələbkarlığı ilə seçilən azərbaycanlı turistlərə təklif etməli xidmətlər var. Sinqapur futuristik arxitekturası, mədəniyyətlərin vəhdəti, ləziz qastronomiyası ilə məşhurdur. Sinqapurun Cənub-Şərqi Asiyanın mərkəzində yerləşməsi turistlərin qonşu ölkələrə kombinə edilmiş turlarda iştirakına, habelə münasib qiymətə Malayziyaya, Avstraliyaya və Yeni Zelandiyaya uçmalarına şərait yaradır. Hazırda Azərbaycanda Sinqapurun milli daşıyıcısı “Singapore Airlines” reyslərinin açılması barədə danışıqlar aparılır, amma hələlik Azərbaycandan Sinqapura uçmaq üçün ən rahat reyslər “Qatar Airways” aviaşirkətinin reysləridir. Sinqapura viza almağın yetərincə sadə onlayn-prosedurunu da xatırlatmaq yerinə düşər. Bu prosedur cəmi üç günə viza almağa imkan verir”.
Belçikanın şimal hissəsinin – Flandriyanın turizmin inkişafı üzrə ofisi tədbirin daha bir debütantı olub. Ofisin Rusiyadakı nümayəndəliyinin rəhbəri Pedro Vaqenin sözlərinə görə, Bakıya səfərinin əsas məqsədi Azərbaycan bazarını daha yaxından tanımaqdır. P.Vaqe deyib: “Lokal bazarın ehtiyacları və xüsusiyyətləri ilə tanışlıq təmas nöqtələri tapmağımıza və Flandriyanın çoxsaylı turizm istiqamətlərindən Azərbaycandan olan səyahətçilər üçün daha münasib təkliflər hazırlamaqdır. Bizə mədəni ekskursiya turizmini, rəssamlığı və arxitekturanı sevənlər gəlirlər. UNESCO abidələrinin bir çoxu Flandriyada cəmləşib. Flandriya Breygel, Van Eykin və Rubens kimi böyük rəssamların və modern üslubun vətənidir. Zərif şokoladı və xırçıldayan vafliləri ilə məşhur olan Belçika həm də yüksək qastronomiya ölkəsidir. Qərbi Avropanın ürəyində yerləşən Belçikanı qonşu ölkələrlə dəmir yolları birləşdirir. Bakıdan Parisə gəlib, qatara minmək və saat yarımdan da tez müddətə Brüsselə çatmaq olar. Qatarla Amsterdama qədər 1 saat 50 dəqiqəyə, Londona cəmi iki saata çatmaq olar. Əlqərəz, Belçikaya səfər Benilüks ölkələri ilə tanış olmaq üçün gözəl fürsətdir”.
Yunanıstan Azərbaycan bazarına marağını bir daha nümayiş etdirib. Yunanıstan Milli Turizm Təşkilatının başçılığı ilə vorkşopda bu ölkənin bir sıra turizm şirkətləri və otelləri təqdim olunub. Yunanıstanın nümayəndəsi Georgi Mavromatisın sözlərinə görə, hazırda əsas məqsəd Bakıdan Yunanıstanın şəhərlərinə birbaşa uçuşları bərpa etməkdir. Turizm təşkilatı bu məsələnin həllində Azərbaycan Mədəniyyət və Turizm Nazirliyinə müraciət etməyi planlaşdırır. O deyib: “Uçuşların hansı aviaşirkətlər ( “AZAL”, “Egey Avia xətlər” və ya “Ellinair”) tərəfindən həyata keçiriləcəyi bir o qədər əhəmiyyətli deyil. Qazanan istehlakçı olacaq, çünki o, vaxta və vəsaitə xeyli qənaət edə biləcək. Xoşbəxtlikdən, Yunanıstan Azərbaycandan olan turistləri cəlb edir. İnkişaf etmiş turizm infrastrukturu, mülayim iqlim, təbiətin gözəllikləri və tarixi yerlər azərbaycanlıların Yunanıstanda istirahətə üstünlük verməsinə imkan yaradır”.
Emil Eyyubov
Məxsusi olaraq AZƏRTAC üçün