MƏDƏNİYYƏT


“Sonuncu” filminin aktyoru Livanda mükafata layiq görülüb

Bakı, 23 dekabr, AZƏRTAC

Beynəlxalq Livan qısa filmlər festivalı başa çatıb. Festivalın bağlanış mərasimi İstanbul Teatrı Sinema Star salonunda təşkil edilib. Livanın 3 şəhərində - Nabatiyyə, Tripoli və Sur şəhərlərində keçirilən festivala 25 ölkədən 61 film təqdim edilib. Münsiflər heyətinin tərkibi fransalı, ispaniyalı və livanlı mütəxəssislərdən ibarət olub.

AZƏRTAC xəbər verir ki, Azərbaycandan təqdim edilən “Sonuncu” filminin aktyoru İdris Rüstəmov ən yaxşı aktyor işinə görə mükafata layiq görülüb.

C.Cabbarlı adına “Azərbaycanfilm” kinostudiyası və Rusiyanın “Buta Films” şirkətinin birgə istehsalı olan “Sonuncu” filmi Mədəniyyət və Turizm Nazirliyinin dəstəyi ilə lentə alınıb. Ekran əsərinin quruluşçu rejissoru Sergey Pikalov, ssenari müəllifləri Sergey Pikalov, Aleksandr Krasavin, quruluşçu operatoru Denis Madışev, quruluşçu rəssamı Əziz Məmmədov, bəstəkarı Aleksey Aygi, prodüserləri Nəsib Piriyev, Maria İvanova və Müşfiq Hətəmovdur. Filmdə rolları İdris Rüstəmov və Corc Qafarov canlandırıblar.

Qeyd edək ki, festivala İtaliya, İsveçrə, Misir, İraq, İran, Səudiyyə, Suriya, ABŞ, İspaniya, Almaniya, İsveç, Gürcüstan, İordaniya, Hindistan, Livan , Azərbaycan, Hindistan və başqa ölkələrdən filmlər təqdim edilib.

Fələstinli rejissor Əhməd Salehin çəkdiyi “Ay Ny” filmi ən yaxşı film, İsveç rejissoru Mans Brzasın “Champion” filmi ən yaxşı rejissor işi, iraqlı rejissor Ömər Falehin “Protest” filmi ən yaxşı sənədli film, rejissor xanım Mayya Əbdüssəttarın “Südlü çay” filmi ən yaxşı Livan filmi, İsveçrə rejissoru Sofi Prerin “Le don” filmi və bir neçə başqa filmlər ən yaxşı ssenari üzrə mükafat alıblar.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.