Bakı, 20 dekabr, AZƏRTAC

Azərbaycan Respublikasının İnsan Hüquqları üzrə Müvəkkili (Ombudsman) Aparatının nümayəndələri Fransanın Strasburq şəhərində Avropa Şurası və Milli İnsan Hüquqları İnstitutlarının Avropa Şəbəkəsi tərəfindən təşkil olunmuş “İfadə azadlığının təminində Milli İnsan Hüquqları institutlarının rolu” mövzusunda yüksək səviyyəli seminarda və Milli İnsan Hüquqları İnstitutlarının Avropa Şəbəkəsinin kommunikasiya üzrə işçi qrupunun iclasında iştirak ediblər.

Tədbirdə Avropa Şurasının baş katibi Torbörn Yaqlandın, Avropa Şurası, ATƏT, Avropa Jurnalistlər Federasiyası, Beynəlxalq Ombudsmanlar İnstitutu, Milli İnsan Hüquqları İnstitutlarının Avropa Şəbəkəsinın rəhbər şəxslərinin, müxtəlif ölkələrin ombudsmanlarının və beynəlxalq ekspertlərin məruzələri dinlənilib, fikir mübadilələri aparılıb.

Azərbaycan Ombudsman Aparatının rəhbəri Aydın Səfixanlı, aparatın məsul əməkdaşları Rəşid Rumzadə və Zaur Vəliməmmədli tədbirlərdə iştirak ediblər.

Çoxsaylı Milli İnsan Hüquqları təsisatlarının nümayəndələrinin, müstəqil ekspertlərin, diplomatların da qatıldıqları seminarda müstəqil monitorinq mexanizmi olaraq Milli İnsan Hüquqları institutlarının ifadə azadlığının təmini sahəsində fəaliyyəti, vətəndaş cəmiyyəti və jurnalist birlikləri ilə əməkdaşlıq istiqamətləri, beynəlxalq sənədlərin implementasiyası məsələləri, hesabatlılıq, qanunvericiliyin analizi, media qurumlarının fəaliyyətinin şəffaflığı, plüralizm, sosial medianın dəstəklənməsi və digər mövzularla bağlı müzakirələr aparılıb.

Ombudsman Aparatının rəhbəri A.Səfixanlı seminarda müzakirə olunmuş məsələlərə münasibət bildirərək, ölkəmizdə insan hüquq və azadlıqlarının, o cümlədən ifadə azadlığının təmini sahəsində görülən işlər barədə məlumat verib, Azərbaycan ombudsmanının Avropa Şurası ilə əməkdaşlığı çərçivəsində həyata keçirilən tədbirləri diqqətə çatdırıb. O, eyni zamanda, seminarda iştirak edən beynəlxalq jurnalist təşkilatlarına müraciət edərək ölkələrlə bağlı hesabat tərtib edərkən ədalətli yanaşma göstərmələri, etibarlı mənbə kimi heç bir siyasi marağa xidmət etməyən, müstəqil olan ombudsmanın hesabat və məlumatlarından istifadə etmələri təklifini irəli sürüb.

Seminarın proqramına uyğun olaraq mövzular üzrə keçirilən görüşlərdə, canlı diskussiya və fikir mübadilələrində Azərbaycan ombudsmanının nümayəndələri fəal iştirak edib, qaldırılan məsələlər, ölkə təcrübəsi və təsisatda bu istiqamətdə görülən işlər barədə məlumat veriblər.

Səfərin ikinci günü aparatın əməkdaşları Avropa regionunda fəaliyyət göstərən Milli İnsan Hüquqları institutlarının nümayəndələrinin iştirakı ilə keçirilən Milli İnsan Hüquqları İnstitutlarının Avropa Şəbəkəsinin kommunikasiya üzrə işçi qrupunun iclasına qatılıblar.

İşçi qrupunun iclasında qarşılıqlı əməkdaşlıq və fəaliyyət istiqamətləri, habelə şəbəkənin internet portalında Azərbaycan ombudsmanının rəsmi internet səhifəsinin bölmə olaraq yerləşdirilməsi, müvəkkil tərəfindən yayımlanan şifahi və yazılı bəyanatların, həmçinin xəbər bülletenlərinin sözügedən bölmədə yer alması məsələləri təklif olunub. Bu istiqamətdə Z.Vəliməmmədli tərəfindən qaldırılan məsələlər, Azərbaycan ombudsmanının təşəbbüsləri şəffaflıq və əməkdaşlıq baxımından maraqla qarşılanıb və yüksək dəyərləndirilib.

Səfər çərçivəsində ombudsmanın nəşrləri, illik məruzəsi, müvəkkilin işgəncələr əleyhinə milli preventiv mexanizm qismində fəaliyyətinə dair hesabatlarının nüsxələri Avropa Şurasının ofisinə təqdim olunub.