REGİONLAR
Strateji Yol Xəritəsi: hədəflərdən biri də aqrar sahədə elmi təminatın və təhsilin keyfiyyətinin yüksəldilməsidir
Gəncə, 28 fevral, Rauf Hacıyev, AZƏRTAC
Kənd təsərrüfatı məhsullarının istehsalına və emalına dair Strateji Yol Xəritəsində hazırkı dövrdə Azərbaycanda və dünyada aqrar sahədə mövcud vəziyyət ətraflı təhlil edilib. Kənd təsərrüfatının inkişafı baxımından dünyada qlobal trendlər, eləcə də bu sahədə tendensiyaların və paradiqmaların necə dəyişməsi göstərilib. Həmçinin ölkədə rəqabətqabiliyyətli və davamlı iqtisadiyyatın yaradılması, bölgələr arasında tarazlı inkişafın qurulması, regionlarda sosial–iqtisadi inkişafın təmini, məşğuliyyətin yüksəldilməsi, ərzaq təhlükəsizliyinin həll edilməsi, kənd təsərrüfatı məhsullarının dünya bazarına çıxarılması, eləcə də digər vacib məqamlar qeyd edilib.
Bu sözləri AZƏRTAC-a müsahibəsində Azərbaycan Dövlət Aqrar Universitetinin elmi işlər üzrə prorektoru, professor Nizami Seyidəliyev deyib.
Strateji Yol Xəritəsinin respublikada aqrar sahənin inkişafı baxımından mükəmməl sənəd olduğunu bildirən N.Seyidəliyev qeyd edib ki, sənəddə ölkədə dayanıqlı inkişaf prinsiplərinə əsaslanmaqla, rəqabətqabiliyyətli kənd təsərrüfatı məhsullarının istehsalı və emalı sektorunun formalaşdırılmasına nail olmaq baxımından əlverişli mühitin yaradılması üçün 9 strateji hədəfin reallaşdırılması nəzərdə tutulub. Bu hədəflərdən biri də aqrar sahədə elmi təminatın və təhsilin keyfiyyətinin yüksəldilməsi, həmçinin məsləhət-informasiya xidmətləri sisteminin inkişaf etdirilməsi ilə bağlıdır.
“Azərbaycan Dövlət Aqrar Universiteti ölkəmizdə kənd təsərrüfatı sahəsində ixtisaslı kadr hazırlayan yeganə təhsil müəssisəsidir. Bu universitet son 5 ildə böyük inkişaf yolu keçib. Ölkənin qərb bölgəsində həm də nəhəng aqrar elmi mərkəz rolu oynayan universitetin infrastrukturu və maddi-texniki bazası yenidən qurulub. Ali məktəb dünyanın bu sahədə tanınmış, nüfuzlu təhsil mərkəzləri ilə elmi-tədris əlaqələri yaradıb, bir sıra beynəlxalq elmi və tələbə mübadilə proqramlarına qoşulub. Elə bu proqramların nəticəsidir ki, universitetin bakalavr, magistr və doktorantura pilləsində təhsil alan onlarla tələbəsi xarici ölkələrdə təhsillərini uğurla yekunlaşdıraraq geri qayıdıblar. İndi universitetin kadr potensialının əhəmiyyətli hissəsi həm də vaxtilə xarici ölkələrdə təhsil alan gənclərdən ibarətdir”, - deyə Nizami Seyidəliyev qeyd edib.
Alim deyib ki, respublika məktəblilərinin Aqrar Universitetə ekskursiyalarının təşkilinə böyük ehtiyac var. Çünki məktəblilərin əksəriyyəti ixtisas seçimində çətinlik çəkirlər. Onların bəziləri əmək bazarında tələb olunmayan, yaxud az ehtiyac olan ixtisasları seçirlər. Ona görə də bu cür gənclərin əksəriyyəti universiteti bitirdikdən sonra işsizliklə üzləşirlər.
Hər il müxtəlif layihələr çərçivəsində məktəblilərin Gəncəyə ekskursiya etdiyini deyən alim bildirib ki, belə səfərlər zamanı məktəblilər şəhərin tarixi-memarlıq abidələrini görür, həmçinin bölgənin iqtisadi inkişafı ilə tanış olurlar. Bu cür ekskursiya proqramlarına Aqrar Universitetin də daxil edilə biləcəyini deyən alim qeyd edib ki, məktəblilər ali məktəbin müasir mühazirə otaqları, fənn kabinetləri, elmi-tədqiqat mərkəzləri, laboratoriyaları, kitabxana və muzeyləri ilə yaxından tanış ola bilərlər.
“Keyfiyyətli aqrar mütəxəssislərin hazırlanması həm də bu sahəni ixtisas olaraq seçmək istəyən gənclərin orta məktəb biliklərindən xeyli dərəcədə asılıdır. Məktəblilərin ekskursiya ilə bağlı olan layihələrində daha çox bilikli və bacarıqlı şagirdlər iştirak edir. Ona görə də respublika məktəblilərinin Aqrar Universitetə ekskursiyalarının təşkili vacibdir. Bu, yuxarı sinif şagirdlərinin ixtisas seçiminə müsbət təsir göstərəcək amildir. Həmin gənclər Aqrar Universitetin bildirçin yetişdirmə təsərrüfatı, quşçuluq və balıqçılıq mərkəzi, əkin sahələri, yeni salınan istixanaları ilə tanış olsalar, eləcə də kənd təsərrüfatının gələcək peşələri baxımından mənfəətli sahə olduğunu bilsələr ixtisas seçimini düzgün apararaq, bu sahə üzrə mütəxəssis olmağa can atacaqlar. Bununla da Aqrar Universitet Strateji Yol Xəritəsində nəzərdə tutulan bir sıra məsələlərin həllinə, eləcə də ölkədə əmək bazarının optimallaşdırılmasına və regional işçi qüvvəsinin uyğunlaşdırılmasına böyük töhfələr verə bilər”, - deyə Nizami Seyidəliyev vurğulayıb.