Strateji Yol xəritələrinin monitorinqi və qiymətləndirilməsi istiqamətində beynəlxalq metodologiya öyrəniləcək
Bakı, 21 dekabr, AZƏRTAC
Strateji Yol xəritələrinin monitorinqi və qiymətləndirilməsi istiqamətində beynəlxalq metodologiya öyrəniləcək.
İqtisadiyyat Nazirliyinin mətbuat xidmətindən AZƏRTAC-a bildiriblər ki, nazirlikdə qarşılıqlı təşəbbüs əsasında Dünya Bankının və İqtisadi İslahatların Təhlili və Kommunikasiya Mərkəzinin nümayəndələrinin iştirakı ilə işgüzar görüş keçirilib. Görüş Strateji Yol xəritələrinin monitorinqi və qiymətləndirilməsi istiqamətində təcrübə mübadiləsinin aparılması və bu sahədə mövcud beynəlxalq metodologiyanın öyrənilməsi məqsədilə baş tutub.
Dünya Bankının nümayəndələri Strateji Yol xəritələrinin monitorinqi və qiymətləndirilməsində mövcud beynəlxalq təcrübə və tətbiq olunan metodologiya, eləcə də bu istiqamətdə İqtisadi İslahatların Təhlili və Kommunikasiya Mərkəzində davam etdirilən təlimlər barədə ətraflı məlumat veriblər.
Görüşdə Strateji Yol xəritələrinin qiymətləndirilməsi ilə bağlı təkliflər, metodologiyanın tətbiqi zamanı nəzərə alınması zəruri olan məsələlər irəli sürülüb, Strateji Yol xəritələrinin icrasının monitorinqi və qiymətləndirilməsi üzrə keçirilən işgüzar görüşlərdə tədbirlərin böyük əksəriyyətinin icraçısı kimi İqtisadiyyat Nazirliyinin də nümayəndəsinin iştirakının təmin edilməsinə dair müzakirələr aparılıb.
Bölmənin digər xəbərləri
