ELM VƏ TƏHSİL


Strateji yol xəritələri Azərbaycanın iqtisadi inkişafının lokomotividir

Bakı, 3 avqust, AZƏRTAC

Avqustun 3-də Binəqədi Rayon İcra Hakimiyyətində (RİH) Prezident yanında Bilik Fondunun təşkilatçılığı ilə Azərbaycan Dövlət İqtisad Universitetinin professoru, iqtisad elmləri doktoru Rasim Nəbiyevin “Strateji yol xəritəsi: Azərbaycan iqtisadiyyatında makroiqtisadi sabitliyin təmin edilməsi və davamlı iqtisadi inkişafa keçid” mövzusunda mühazirəsi dinlənilib.

Bilik Fondundan AZƏRTAC-a bildiriblər ki, RİH-in təşəbbüsü ilə keçirilən tədbirdə rayonun icra strukturlarının əməkdaşları, bələdiyyə işçiləri, sahibkarlar, Yeni Azərbaycan Partiyasının fəalları, “ASAN xidmət” könüllüləri iştirak ediblər.

Tədbirdə RİH başçısının müavini Vüsar İsmayılov son illər ümumi məhsul istehsalının həcmindəki artımın, yeni sənaye-istehsal müəssisələrinin yaradılmasının rayon əhalisinin sosial vəziyyətinin yaxşılaşmasına, büdcə gəlirlərinin artmasına müsbət təsir göstərdiyini deyib. Vurğulanıb ki, əhali arasında təbliğat, maarifləndirmə işləri də daim diqqətdə saxlanılır, bu istiqamətdə ardıcıl tədbirlər görülür, ayda iki dəfə RİH-də günün aktual mövzuları ilə bağlı müzakirə və dinləmələr aparılır. Bu tədbir də həmin ənənənin davamıdır.

Bilik Fondunun aparat rəhbəri, professor İsaxan Vəliyev tədbir iştirakçılarına təmsil etdiyi qurumunun həyata keçirdiyi layihələr barədə məlumat verib, Binəqədi rayonunda əhalinin maarifləndirilməsi ilə bağlı birgə tədbirlərə daim xüsusi diqqət yetirildiyini bildirib. Diqqətə çatdırılıb ki, dövlətimizin başçısının imzaladığı strateji yol xəritələrinin şərhi və son dövrdə iqtisadi inkişaf sahəsində görülən işlərin təbliği fondun “İqtisadi maarifləndirmə” proqramının əsas prioritetlərindədir. Prezident İlham Əliyevin imzaladığı “Milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsi haqqında” Fərman ölkəmizin iqtisadi qüdrətinin yüksəlməsi üçün geniş imkan və perspektivlər açır. Dövlətimizin başçısının regionlarda keçirdiyi silsilə görüşlər ölkəmizin iqtisadiyyatında canlanma yaradır və tərəqqiyə yol açır. Xüsusilə texnoparkların yaradılması respublikamızda son elmi-texniki tələblərə, müasir dünya standartlarına cavab verən məhsulların istehsalına, xaricdən bir sıra strateji malların idxalının azalmasına, ölkəmizin iqtisadi qüdrətinin güclənməsinə zəmin yaradır.

Məruzəçi Rasim Nəbiyev bildirib ki, Prezident İlham Əliyevin təşəbbüsü ilə hazırlanmış, Azərbaycanın iqtisadi inkişafının lokomotivi olan strateji yol xəritələri çox ciddi təhlillər üzərində qurulub. Bu sənədlərdə Azərbaycanda mövcud iqtisadi vəziyyətlə yanaşı, qlobal və regional amillər də nəzərə alınıb. Strateji yol xəritələrinin Azərbaycanda iqtisadiyyatın sürətli inkişafı, qeyri-neft sektorunun dirçəlişi baxımından mühüm əhəmiyyətə malik olduğunu vurğulayan alim diqqətə çatdırıb ki, bu strateji konsepsiyalar ölkəmizin davamlı iqtisadi inkişafına, iqtisadiyyatın rəqabətqabiliyyətliliyinin gücləndirilməsinə və əhalinin sosial rifahının yaxşılaşdırılmasına xidmət edir. Strateji yol xəritələri Azərbaycanın indiyədək yürütdüyü sosial bazar modeli fəlsəfəsini qoruduğunu və bundan sonrakı strategiyanın mərkəzində məhz insan amilinin dayandığını bir daha təsdiqləyir. Strateji yol xəritələrinin 12 istiqamət üzrə müəyyənləşdirilmiş əsas hədəflərini açıqlayan R.Nəbiyev bu hədəflərə çatmaq üçün qarşıda duran vəzifələri ətraflı şərh edib.

Mövzu ilə bağlı çıxış edənlər makroiqtisadi sabitliyin qorunub saxlanması, davamlı inkişafın təmin edilməsi, strateji konsepsiyaların reallaşması ilə bağlı fikirlərini bölüşüblər, o cümlədən ilin sonunadək Bilik Fondu ilə RİH-in birgə təşkil edəcəkləri mühazirələrin mövzuları və məkanları barədə təkliflər veriblər.

Diskussiya şəklində davam edən tədbirdə iştirakçıların sualları cavablandırılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.