Sumqayıt, 27 aprel, Ətrabə Rzayeva, AZƏRTAC

Aprelin 27-də Sumqayıt Dövlət Universitetinin (SDU) Heydər Əliyev Mərkəzində “Milli iqtisadiyyat və iqtisadiyyatın əsas sektorları üzrə strateji yol xəritələri” mövzusunda “dəyirmi masa” keçirilib.

AZƏRTAC xəbər verir ki, SDU-nun rektoru, professor Elxan Hüseynov çıxış edərək, strateji yol xəritələrinin əhəmiyyətindən danışıb, ölkə iqtisadiyyatının şaxələndirilməsində və inkişaf etdirilməsində bu sənədlərin önəmini vurğulayıb. Bildirib ki, əsası ümummilli lideri Heydər Əliyev tərəfindən qoyulmuş, uzunmüddətli dövr üçün düşünülmüş iqtisadi siyasət ölkədə makroiqtisadi sabitlik və dinamik iqtisadi inkişaf üçün əsaslı zəmin yaradıb. Nəticədə geniş sahibkarlar təbəqəsi formalaşıb, ölkənin sosial-iqtisadi inkişafında özəl sektorun rolu daha da artıb və dünya iqtisadi sisteminə inteqrasiya sahəsində mühüm nailiyyətlər əldə olunub.

Milli Məclisin iqtisadi siyasət, sənaye və sahibkarlıq komitəsinin sədri, akademik Ziyad Səmədzadə “Milli iqtisadiyyatın əsas sektorları üzrə strateji yol xəritəsinin dövlətin iqtisadi siyasətinə təsiri məsələləri” mövzusunda çıxış edərək bildirib ki, strateji yol xəritələri 2016-2020-ci illər üçün iqtisadi inkişaf strategiyasını və tədbirlər planını, 2025-ci ilədək olan dövr üçün uzunmüddətli baxışı və 2025-ci ildən sonrakı dövrə hədəf baxışı özündə ehtiva edir.

SOCAR-ın “Azərikimya” İstehsalat Birliyinin Müşahidə Şurasının sədri, Milli Məclisin deputatı Muxtar Babayev “Azərbaycanın neft-kimya sənayesi, perspektivlər, inkişaf planları” mövzusunda çıxışında, strateji yol xəritələrində nəzərdə tutulan tədbirlərin həyata keçirilməsi nəticəsində ölkəmizin ixrac potensialının və gəlirlərinin artacağını, yeni iş yerlərinin açılacağını vurğulayıb. Bildirilib ki, “Azərikimya” İstehsalat Birliyinin 2017-2019-cu illər üçün əsas hədəfi “SOCAR Polymer”də tikilən polipropilen və polietilen istehsalat sahələrini tələb olunan miqdarda və keyfiyyətdə polimer markalı xammallarla təmin etmək, həmçinin maye xammala alternativ olan qaz xammallarının tətbiq olunmasıdır.

Milli Məclisin deputatı, iqtisad elmləri doktoru Xanhüseyn Kazımlı, vergilər nazirinin müşaviri, vergi ödəyicilərinə xidmət və şəffaf vergi partnyorluğu departamentinin baş direktoru Ələkbər Məmmədov, İqtisadi və Sosial İnkişaf Mərkəzinin İdarə Heyətinin sədri, iqtisad üzrə fəlsəfə doktoru Vüqar Bayramov və başqaları çıxış edərək bildiriblər ki, dünyada cərəyan edən proseslərin yaratdığı yeni çağırışlara uyğunlaşmaq və mövcud qlobal iqtisadi böhranın ölkəmizə təsirini minimuma endirmək məqsədilə iqtisadi islahatların əsas strateji hədəflərinə uyğun olaraq sistem xarakterli bir sıra tədbirlərin həyata keçirilməsi, sosial-iqtisadi inkişafın cari, orta və uzunmüddətli dövrləri arasında iqtisadi inkişafın keyfiyyətcə yeni modelinin formalaşdırılması qarşıda duran əsas prioritet vəzifələrdəndir.

Tədbir ölkəmizin neft və qaz sənayesinin (kimya məhsulları daxil olmaqla) inkişafı, kiçik və orta sahibkarlığın istehlak mallarının istehsalında rolu və maliyyə xidmətlərinin inkişafına dair strateji yol xəritəsi üzrə atılacaq addımların müzakirəsi ilə davam etdirilib. Müzakirə olunan məsələlərlə bağlı təkliflər səsləndirilib, suallar cavablandırılıb.