REGİONLAR
Su təchizatı və kanalizasiya sistemlərinin yenidən qurulması əhalinin sosial məsələlərinin həlli istiqamətində atılan mühüm addımdır
Xaçmaz, 30 sentyabr, Elxan Yusifli, AZƏRTAC
Respublikamızın bütün regionlarında olduğu kimi, şimal bölgəsində də əhalinin sosial məsələlərinin həlli istiqamətində mühüm layihələr icra olunur. Bu işlər sırasında su təchizatı və kanalizasiya sistemlərinin yenidən qurulması əsas yerlərdən birini tutur. Şimal bölgəsində yerləşən Quba, Qusar, Şabran, Siyəzən şəhərləri artıq fasiləsiz və keyfiyyətli içməli su ilə təmin olunub. Xaçmaz və Xızı şəhərlərində isə bu istiqamətdə işlər davam etdirilir.
Xaçmazda 58 minə yaxın əhalinin su təchizatı və kanalizasiya xidmətləri əsaslı şəkildə yaxşılaşacaq
“Xaçmaz şəhərinin su təchizatı və kanalizasiya sistemlərinin yenidən qurulması” layihəsi çərçivəsində görülən işlərin böyük hissəsi artıq yekunlaşıb.
Hazırda layihənin ikinci mərhələsinə uyğun olaraq şəhər ərazisində şəbəkə su və kanalizasiya xətləri çəkilir. Şəbəkə su xətlərinin ümumi uzunluğu 165,6 kilometrdir. Çəkilməkdə olan kanalizasiya xətlərinin ümumi uzunluğu isə 149 kilometrə bərabərdir. Tikinti işləri şəhər ərazisində mərhələli şəkildə həyata keçirilir. Hazırda işlər şəhərin Heydər Əliyev prospektində, Zərifə Əliyeva, Mirzə Ələkbər Sabir və Təbriz küçələrində aparılır. Paralel olaraq xətlərin yaşayış evlərinə birləşdirilməsi prosesi də həyata keçirilir. Su və kanalizasiya xətlərinin tikintisi yekunlaşdıqdan sonra 12 minə yaxın abunəçi su sayğacı ilə təmin olunacaq.
Layihənin birinci mərhələsində Uçqun bulağı bərpa edilib. Bununla da bu mənbədən saniyədə 200 litr və ya sutkada 17 min 300 kubmetr su götürmək mümkün olacaq. Eyni zamanda, 400 millimetr diametrli 2 kilometr uzunluğunda magistral su xətti də çəkilib. Tutumu 3 və 2 min kubmetr olan dörd su anbarı inşa edilib. Bu mərhələdə 1,5 kilometr uzunluğunda anbarlararası qidalandırıcı su xətti çəkilib, xlorator qurğusu da daxil olmaqla, yeni xlorator binası tikilib.
Xaçmaz rayonunun Gülalan kəndində inşa ediləcək çirkab sutəmizləyici qurğunun yerləşəcəyi ərazidən şəhər istiqamətində kanalizasiya xətləri çəkilib.
Layihənin icrası Xaçmaz şəhərində 46 min 776, Qobuqırax, Armudpadar, Qaraçı, Qaraqurdlu, Köhnə Xaçmaz kəndlərində isə 10 min 863 nəfər olmaqla, ümumilikdə, 57 min 639 nəfərin su təchizatı və kanalizasiya xidmətlərinin əsaslı şəkildə yaxşılaşmasına hesablanıb.
Yaranan çirkab suları Xaçmaz rayonunun Gülalan kəndi ərazisində tikiləcək, məhsuldarlığı sutkada 50 min kubmetr olacaq çirkab sutəmizləyici qurğuda emal ediləcək. Xaçmazla yanaşı, Quba və Qusar şəhərlərində yaranan çirkab suları da emal üçün bu təmizləyici qurğuya nəql olunacaq. Xaçmaz su-kanalizasiya sisteminin yenilənməsi işlərinin iki il ərzində başa çatdırılması nəzərdə tutulub.
Qusar şəhərinin içməli su təchizatı və kanalizasiya sistemləri
2030-cu ilə perspektiv inkişaf nəzərə alınmaqla yenidən qurulub
Qusar şəhərinin içməli su təchizatı və kanalizasiya sistemlərinin yenidən qurulması layihəsi Azərbaycan Hökuməti ilə Yaponiya Beynəlxalq Əməkdaşlıq Agentliyinin birgə maliyyələşdirdiyi “Kiçik şəhərlərdə su təchizatı və kanalizasiya layihəsi” çərçivəsində həyata keçirilib. Layihə 2030-cu ilə perspektiv inkişaf nəzərə alınmaqla Qusar şəhərində 19 min 600 nəfərin içməli su təchizatı və kanalizasiya xidmətlərindən istifadəsinin yaxşılaşdırılmasına hesablanıb. Eyni zamanda, layihə çərçivəsində Qusar rayonunun 7 və Quba rayonunun 3 kəndinə içməli suyun verilməsi nəzərdə tutulub. Ümumilikdə, layihədən bu kəndlərin 12 min sakini faydalanacaq.
Layihənin icrasına 2012-ci ildə başlanılıb. Birinci mərhələdə Qusar şəhərini və 10 kəndi keyfiyyətli içməli su ilə təmin etmək üçün Qusarçayın məcrasında məhsuldarlığı saniyədə 102 litr və ya sutkada 8 min 800 kubmetr olan drenaj tipli suqəbuledici qurğu tikilib, su mənbəyindən şəhərə qədər 17,4 kilometr uzunluğunda magistral kəmər çəkilib. Şəhərin dayanıqlı su təchizatını təmin etmək məqsədilə ümumi tutumu 3 min kubmetr olan 3 su anbarı tikilib və bu anbarlar arasında 2,8 kilometr uzunluğunda su xətləri çəkilib, yeni xlorator binası inşa olunub.
İkinci mərhələdə isə Qusar şəhərində içməli su və kanalizasiya şəbəkələrinin yenidən qurulması işləri həyata keçirilib. Bu işlər çərçivəsində 106 kilometr içməli su şəbəkəsi yaradılıb, abonentlərə ev birləşmələri verilib, yanğın hidrantları quraşdırılıb. İçməli su şəbəkəsi ilə paralel olaraq, şəhərin kanalizasiya sistemləri də müasir standartlar səviyyəsində yenidən qurulub, 105 kilometr uzunluğunda şəhərdaxili şəbəkə yaradılıb. Şəhərdə yaranacaq tullantı suları Xaçmaz rayonu ərazisində inşa ediləcək və məhsuldarlığı sutkada 70 min kubmetr layihələndirilən sutəmizləyici qurğuda təmizlənib zərərsizləşdiriləcək. Bu qurğuda, həmçinin Quba və Xaçmaz şəhərlərinin də tullantı suları emal olunacaq.
Qusar rayonunda içməli su təchizatı və kanalizasiya sistemlərinin yenidən qurulması işləri ilə yanaşı, dövlət büdcəsi vəsaiti hesabına Qusar-Quba kanalizasiya kollektorunun tikintisi də tamamlanıb. “Şahdağ” Qış-Yay Turizm Kompleksinin və Qusar şəhərinin tullantı sularının Quba-Xaçmaz kollektoruna ötürülməsi məqsədilə 27,2 kilometr uzunluğunda kanalizasiya kollektoru qısa müddətdə tikilərək istismara verilib. Bu layihələrin icrası Qusar sakinlərinin içməli su təchizatı və kanalizasiya xidmətlərindən istifadəsini yaxşılaşdırmaqla yanaşı, ətraf mühitin ekoloji tarazlığının qorunmasına imkan verib.
Quba şəhəri və ətraf yaşayış məntəqələri fasiləsiz və keyfiyyətli içməli su ilə təmin olunur
Şimal bölgəsinin ən böyük rayonlarından biri olan Qubanın su təchizatı və kanalizasiya sistemlərinin yenidən qurulması layihəsi 2013-cü ildə tamamlanıb. Dövlət büdcəsi hesabına maliyyələşdirilən layihəyə əsasən, Quba şəhərini və ətraf yaşayış məntəqələrini fasiləsiz və keyfiyyətli içməli su ilə təmin etmək üçün su mənbəyi Qudyalçay seçilib. Suyun özüaxımlı nəqli nəzərə alınaraq şəhərin şimal hissəsində Qudyalçayın məcrasında 2 min 435 metr uzunluğunda drenaj tipli suqəbuledici qurğu tikilib. Su mənbəyindən paylayıcı anbara qədər ümumi uzunluğu 6 min 450 metr olan iki paralel magistral su xətti çəkilib. Əhalini fasiləsiz su ilə təmin etmək üçün Quba şəhərində relyef baxımından ən yüksək ərazidə ümumi tutumu 14 min kubmetr olan dörd anbar tikilib. Layihə çərçivəsində Quba şəhərində ümumi uzunluğu 190 kilometr olan paylayıcı su şəbəkəsi yaradılıb, 9 min 525 ünvana ev birləşmələri verilib, 8 min 900 abunəçi “smart-kart” sayğacı ilə təmin olunub. Həmçinin Quba şəhərində 216 kilometr uzunluğunda kanalizasiya şəbəkəsi yaradılıb və bütün ünvanlar şəbəkəyə qoşulub. Hazırda şəhərdə toplanan tullantı suları mövcud kollektorlar vasitəsilə axıdılır. Gələcəkdə tullantı suları Xaçmaz şəhəri yaxınlığında inşa ediləcək, sutəmizləyici qurğuya ötürüləcək.
Xızı sakinləri də tezliklə fasiləsiz və keyfiyyətli içməli su ilə təmin olunacaq
“Xızı şəhərinin su təchizatı və kanalizasiya sistemlərinin yenidən qurulması” layihəsinin icrası da hazırda davam edir. Layihə Xızı şəhərində 3 min 294, Altıağac qəsəbəsində 1423, eləcə də Baxışlı, Tıxlı, Xələç kəndlərində 1562 nəfər olmaqla, ümumilikdə 6 min 279 nəfərin su təchizatı və kanalizasiya xidmətlərinin əsaslı şəkildə yaxşılaşmasına hesablanıb.
Şimal bölgəsində yerləşən Siyəzən və Şabran şəhərlərinin içməli su ilə təmin edəcək su xəttinin və kanalizasiya şəbəkələrinin yenilənməsi işləri isə 2013-cü ildə yekunlaşıb.