İQTİSADİYYAT
Sumqayıt Texnologiyalar Parkı "Caspian Oil & Gas 2016" sərgi və konfransında iştirak edəcək
Bakı, 31 may, AZƏRTAC
Sumqayıt Texnologiyalar Parkı (STP) iyunun 1-dən 4-dək Bakı Ekspo Mərkəzində keçiriləcək XXIII Beynəlxalq Xəzər Neft və Qaz "Caspian Oil & Gas" sərgi və konfransında iştirak edəcək.
STP-dən AZƏRTAC-a bildiriblər ki, sərgidə 108 kvadratmetrə yaxın sahədə texnoparkın tərkibində olan zavodların ən son texnologiyaların tətbiqi nəticəsində istehsal olunan məhsulları əyani şəkildə nümayiş etdiriləcək. Ziyarətçilərə STP-nin son illərdə gördüyü layihələr və gələcək planları haqqında geniş məlumat veriləcək.
Regionda neft-qaz sənayesinin əsas tədbiri və tanınmış beynəlxalq platforma olan Xəzər Neft və Qaz sərgi və konfransı hər il Xəzəryanı regionun əsas neft-qaz layihələrinin müzakirəsi və enerji təhlükəsizliyinin təmin olunması məqsədilə ən yüksək səviyyəli rəhbər işçiləri öz meydançasında bir araya gətirir. "Caspian Oil & Gas" layihəsinə Energetika Nazirliyi və SOCAR tərəfindən dəstək göstərilir.