Sumqayıt, 21 noyabr, Ətrabə Rzayeva, AZƏRTAC

Sumqayıt şəhərində Ədliyyə işçilərinin peşə bayramı qeyd olunub.

Əvvəlcə müasir Azərbaycan dövlətinin memarı və qurucusu ümummilli lider Heydər Əliyevin abidəsi ziyarət olunub, önünə tər çiçəklər düzülüb.

AZƏRTAC xəbər verir ki, tədbir Sumqayıt Apelyasiya Məhkəməsinin iclas zalında davam etdirilib.

Regional məhkəmənin və onun yurisdiksiyasına aid edilən məhkəmələrin hakimləri, məhkəmə aparatının işçiləri, Sumqayıt Regional Ədliyyə Şöbəsinin, şəhərdə fəaliyyət göstərən icra, qeydiyyat şöbələrinin, notariat kontorlarının əməkdaşlarının iştirak etdikləri tədbiri Sumqayıt Apelyasiya Məhkəməsinin sədri Səadət Bəktaşi açıb. O, Azərbaycan ədliyyə sisteminin zəngin tarixindən, ölkəmizin yenidən dövlət müstəqilliyi əldə etdikdən və ümummilli lider Heydər Əliyevin respublika rəhbərliyinə qayıdışından sonra ədliyyə orqanlarının işinin müasir tələblər səviyyəsində qurulmasından, bunun üçün həyata keçirilən əsaslı tədbirlərdən danışıb.

S.Bəktaşi ulu öndər Heydər Əliyevin siyasi kursunu uğurla davam etdirən Azərbaycan Prezidenti İlham Əliyevin rəhbərliyi ilə dövlətimizin daha da qüdrətlənməsini, ədliyyə sisteminin təkmilləşdirlməsi üzrə genişmiqyaslı islahatların aparılmasını, insan hüquqlarının etibarlı təmin olunmasını, vətəndaşların ədliyyə orqanlarına müraciət imkanlarının asanlaşdırılmasını, onlara göstərilən hüquqi xidmətlərin keyfiyyətinin yüksəldilməsinə xidmət edən ədliyyə infrastrukturunun müasirləşdirilməsi istiqamətində görülən ardıcıl işləri xüsusi vurğuladı. O, bu ilin iyulun 9-da Dünya Bankı ilə birgə həyata keçirilən “Mütərəqqi ədliyyə xidmətləri və müasir məhkəmə infrastrukturu” layihəsi çərçivəsində Sumqayıt şəhərində 5 məhkəmənin yerləşəcəyi müasir məhkəmə kompleksinin təməlqoyma mərasimi barədə məlumat verərək bildirdi ki, kompleks ictimai və inzibati zonalara bölünməklə yeni texnologiya və avadanlıqlarla təchiz olunacaq.

Tədbirdə çıxış edən Sumqayıt Şəhər İcra Hakimiyyətinin başçısı Zakir Fərəcov Azərbaycan ədliyyəsinin dinamik inkişafından, ədliyyə sisteminin cəmiyyətdə yüksək nüfuza malik olmasından danışıb. İcra hakimiyyətinin başçısı məhkəmə-hüquq sahəsində aparılan islahatlar nəticəsində ədalət mühakiməsinin keyfiyyətcə yeni mərhələyə yüksəldiyini vurğulayaraq, ədliyyə işçilərinə fəaliyyətlərində uğurlar arzulayıb.

Çıxış edənlər ölkəmizdə aparılan uğurlu hüquq islahatlarından, ədliyyə sisteminin inkişafından söhbət açıb, ədliyyə orqanlarının qanunçuluğun möhkəmləndirilməsi, vətəndaşların hüquqlarının etibarlı təmin olunması işində öz vəzifələrini layiqincə yerinə yetirdiklərini vurğulayıblar.