REGİONLAR


Sumqayıtda dərs ilini əla qiymətlərlə başa vuran şagirdlərin sayı artıb

A+ A

Sumqayıt, 8 sentyabr, Ətrabə Rzayeva, AZƏRTAC

Sumqayıt Şəhər İcra Hakimiyyətinin akt zalında təhsil işçilərinin ənənəvi sentyabr konfransı keçirilib.

Əvvəlcə tədbir iştirakçıları şəhərin mərkəzində ümummilli lider Heydər Əliyevin abidəsini ziyarət edib, önünə gül dəstələri düzüblər.

AZƏRTAC xəbər verir ki, konfransda Sumqayıt şəhər Təhsil Şöbəsinin müdiri Ruhiyyə Tağıyevanın məruzəsi dinlənilib, qarşıda duran vəzifələr diqqətə çatdırılıb.

Bildirilib ki, ötən tədris ili Sumqayıtın təhsil işçiləri üçün də əlamətdar olub. İbtidai təhsil səviyyəsinin son pilləsi olan 4-cü sinif şagirdləri üçün üçmərhələli monitorinq keçirilib, riyaziyyatdan xüsusi istedadı ilə seçilən 10 şagird “Qızıl onluğa” daxil edilərək mükafatlandırılıb. Məktəblilər arasında təşkil olunan I Məntiq Olimpiadası uşaqlarda məntiqi təfəkkür və düşüncə tərzinin formalaşmasına, habelə diqqət, qavrama, hafizə və nitq kimi vacib bacarıqların inkişafına müsbət təsir göstərib. Olimpiadada fərqlənən 16 şagirdə medal, diplom və hədiyyələr verilib.

Məruzədə, həmçinin qeyd edilib ki, 9-cu və 11-ci sinif şagirdləri üçün keçirilmiş ümumşəhər monitorinqi mütəşəkkilliyi ilə fərqlənib. Dərs ilini əla qiymətlərlə başa vuran şagirdlərin sayı əvvəlki illə müqayisədə artaraq 9879 nəfərə çatıb. Beş məzun qızıl medala layiq görülüb. Şəhər üzrə keyfiyyət göstəricisi 62,7 faiz olub ki, bu da əvvəlki dərs ilinə nisbətən 2 faiz çoxdur. Ötən dərs ilində 9-cu siniflər üzrə keçirilən buraxılış imtahanlarında müvəffəqiyyət göstəricisi 83,4 faiz, 11-ci siniflər üzrə isə 82 faiz təşkil edib. Bir sıra məktəbdə imtahanların nəticələri respublika göstəricisini üstələyib. Təbiət elmləri təmayüllü gimnaziyada, “İstedad”, TTEL və “Təfəkkür” liseylərində müvəffəqiyyət 100 faiz təşkil edib, həmçinin 5, 11, 25 nömrəli məktəblərdə buraxılış imtahanlarının nəticələri yetərincə yüksək olub.

Sumqayıt şəhər Təhsil Şöbəsinin təşəbbüsü ilə “Fənn aylıqları”nın keçirilməsi tədrisin keyfiyyətinin yüksəlməsinə müsbət təsir göstərib. Fənn olimpiadalarında şagirdlər Sumqayıtı uğurla təmsil ediblər. Onlardan 22 nəfəri mükafata layiq yerlər tutub. “Sabahın alimləri” Beynəlxalq Layihə Olimpiadasında 41 sumqayıtlının layihəsi nümayiş etdirilib, onlardan 1-i gümüş, 9-u isə bürünc medala layiq görülüb.

Ulu öndər Heydər Əliyevin həyat və fəaliyyətinə həsr olunmuş “Ən yaxşı təqdimat” müsabiqəsinin ilkin mərhələsində 5200-dən çox şagird iştirak edib, respublika mərhələsində isə TET gimnaziyanın şagirdi Aytac Əliyeva 1-ci, İ.Qayıbov adına 1 nömrəli məktəbin şagirdi Aytən Hacıyeva 3-cü yeri tutublar.

Qeyd edilib ki, pilot layihə kimi Sumqayıtın 5 məktəbində tam orta təhsil səviyyəsində tədrisin təmayüllər üzrə davam etdirilməsi prosesinə başlanıb. Növbəti ildə həmin layihəyə daha 4 məktəb qatılıb. Sumqayıt şəhəri üzrə diaqnostik qiymətləndirmədə 4002 müəllim iştirak edib. Onlardan 3979-u müvəffəq nəticəyə nail olub. Bu müəllimlərin əməkhaqqları iki dəfə artırılmaqla, dərs yükü norması 12-dən 18 saata çatdırılıb.

Dərs ili ərzində Sumqayıt məktəblərinin maddi-texniki bazası gücləndirilib, 31 məktəbdə cari təmir aparılıb. Şəhər icra hakimiyyətinin vəsaiti hesabına əsaslı təmir olunan 7 nömrəli məktəbdə də işlər başa çatmaq üzrədir.

Məruzə ətrafında müzakirələrdə təmayüllü siniflər, hərbi hazırlıq, şahmatın inkişafı, multikultural dəyərlər, kurikulumun tətbiqi kimi məsələlər önə çəkilib.

Konfransda təhsil nazirinin müavini Ceyhun Bayramov çıxış edərək, ölkədə təhsilin inkişafı üzrə həyata keçirilən tədbirlərdən danışıb.

Sumqayıt Şəhər İcra Hakimiyyətinin başçısı Zakir Fərəcov müəllimləri yeni dərs ili münasibətilə təbrik edib, onların uğurlarının hər kəsdə böyük fərəh doğurduğunu söyləyib, diqqəti qarşıda duran vəzifələrə cəlb edib.

Sonra qabaqcıl təhsil işçilərinin bir qrupuna icra hakimiyyətinin fəxri fərmanları təqdim olunub.

Konfransın sonunda iştirakçılar adından Prezident İlham Əliyevə müraciət qəbul edilib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.