İQTİSADİYYAT
Suraxanı rayonu ilə Riqa şəhər Duması arasında əməkdaşlıq genişləndirilir
Bakı, 29 mart, AZƏRTAC
Latviya Respublikası Riqa şəhər Dumasının vitse-meri, Riqa dəniz portunun rəhbəri Andris Ameriksin başçılıq etdiyi nümayəndə heyəti Suraxanı rayonunda olub. Səfərdə məqsəd Bakı şəhəri, Suraxanı Rayonu İcra Hakimiyyəti və Riqa Şəhər Dumasının Şərqi İcra Direksiyası arasında əməkdaşlığın genişləndirilməsi, xalqlarımız arasındakı dostluq münasibətlərini inkişaf etdirilməsidir.
AZƏRTAC xəbər verir ki, latviyalı qonaqlar “Atəşgah Məbədi” Dövlət Tarix-Memarlıq Qoruğu ilə tanış olublar. Məlumat verilib ki, Azərbaycanın maddi-mədəniyyət abidələri sırasında XVII-XVIII əsrlərə aid atəşpərəst məbədinin qalıqları üzərində inşa olunmuş və UNESCO-nun “Dünya irsinin ilkin siyahısı”na daxil edilmiş “Atəşgah Məbədi” Dövlət Tarix-Memarlıq Qoruğunun özünəməxsus yeri vardır. Azərbaycan Prezidentinin Sərəncamı ilə 2007-ci ildən Mədəniyyət və Turizm Nazirliyinin tabeliyinə verilən qoruqda 2012-ci ilin sentyabrından başlayaraq Heydər Əliyev Fondunun dəstəyi ilə məbədətrafı ərazilərin abadlaşdırılması, yardımçı binaların tikintisi işləri sürətlə həyata keçirilib.
Qoruğun sahəsi 4,2 min kvadratmetrdən 15 min kvadratmetrə qədər genişləndirilib. Sahəsi 2 min kvadratmetrdən artıq olan əsas bina xüsusi memarlıq üslubunda inşa olunub. Məbədlə həmahəng inşa olunan əsas binada idarə, dəmirçi kürəsi, dəmirçi emalatxanası, mis və çini qablar, taxta üzərində oyma, xalça, kəlağayı və həsir toxuma emalatxanaları, suvenirlər, rəsm qalereyası mövcuddur. Xüsusi memarlıq üslubunda yaradılan muzeydə Bakı şəhəri və Abşeron rayonu ərazisində vaxtilə mövcud olan qədim yaşayış binalarını və abidələri əks etdirən guşələr yaradılıb.
Bildirilib ki, I Avropa Oyunlarının məşəlini alovlandırmaq üçün alov “Atəşgah Məbədi” Dövlət Tarix-Memarlıq Qoruğundan götürüləcək.
Suraxanı rayonu Heydər Əliyev Mərkəzində olan qonaqlara məlumat verilib ki, burada multimedia və rəsm studiyaları, dünya kitabxana sisteminə qoşulmuş elektron kitabxana fəaliyyət göstərir. Elektron kitabxananın xidmətindən 14 mindən artıq istifadəçi faydalanıb. Bu günə qədər ümumilikdə 52 mindən yuxarı ziyarətçi Suraxanı rayonu Heydər Əliyev Mərkəzində ümummilli lider Heydər Əliyevin zəngin irsi ilə tanış olub.
Daha sonra qonaqlar rayondakı Heydər Əliyev parkı ilə tanış olublar. Riqa şəhər dumasının vitse-meri və Suraxanı Rayon İcra Hakimiyyətinin başçısı İlqar Abbasov Heydər Əliyev parkında dostluq ağacı əkiblər.
Rayon icra hakimiyyətində davam etdirilən görüşdə ikitərəfli əməkdaşlıqla bağlı məsələlər müzakirə edilib, qonaqlara ölkəmizdə, o cümlədən Suraxanı rayonunda aparılan genişmiqyaslı abadlıq-quruculuq işləri haqqında ətraflı məlumat verib. Görüş iştirakçıları əməkdaşlıq perspektivləri haqqında fikir mübadiləsi ediblər.
Andris Ameriks səmimi görüş üçün təşəkkürünü bildirib və vurğulayıb ki, bütün sahələrdə əlaqələrin möhkəmləndirilməsi vacibdir.
Qeyd edək ki, Bakı şəhəri, Suraxanı Rayonu İcra Hakimiyyəti və Riqa Şəhər Dumasının Şərqi İcra Direksiyası arasında 14 may 2013-cü ildə əməkdaşlıq haqqında saziş imzalanıb. Həmin vaxtdan tərəflər arasında işgüzar münasibətlər qurulub və birgə müxtəlif layihələrin həyata keçirilməsi nəzərdə tutulur.