Bakı, 20 iyul, AZƏRTAC

İyulun 20-də Suraxanı Rayon İcra Hakimiyyətində 2017-ci ilin birinci yarısının sosial-iqtisadi inkişafının yekunları və Nazirlər Kabinetinin son iclasında Azərbaycan Respublikasının Prezidenti İlham Əliyevin qarşıya qoyduğu vəzifələrə həsr olunmuş hesabat yığıncağı keçirilib.

Rayon icra hakimiyyətindən AZƏRTAC-a bildiriblər ki, Rayon İcra Hakimiyyəti başçısı İlqar Abbasov Nazirlər Kabinetinin iclasında dövlətimizin başçısının proqram xarakterli nitqində vurğulanmış önəmli məsələlər və görülən işlər barədə iştirakçılara məlumat verib.

İlqar Abbasov ötən altı ayda rayonda görülən işlər, həyata keçirilən və nəzərdə tutulan layihələr barədə danışıb. Yarım ilin sosial-iqtisadi yekunları barədə məlumat verən rayon rəhbəri qeyd edib ki, Prezident İlham Əliyevin diqqət və qayğısı sayəsində ölkəmizin hər yerində olduğu kimi Suraxanı rayonunda da cari ilin birinci yarısında sürətli sosial-iqtisadi inkişaf davam etdirilib, bir çox işlər görülüb və nailiyyətlər əldə olunub.

Bildirilib ki, 2017-ci ilin ilk altı ayında rayonda sənaye məhsulunun istehsalı 164,0 milyon manat, tikinti-quraşdırma işləri 12,7 milyon manat, nəqliyyat xidmətləri 7,5 milyon manat, kənd təsərrüfatı 3,4 milyon manat, pərakəndə ticarət dövriyyəsi 183,9 milyon manat, orta aylıq əmək haqqı 588 manat təşkil edib, 2582 yeni iş yeri açılıb, əsas kapitala yönəldilən investisiyalar 12,8 milyon manat təşkil edib, əhaliyə 98,4 milyon manat məbləğində pullu xidmətlər göstərilib.

Rayonun küçələrinə və məhəllədaxili ərazilərə 100 min kvadratmetr asfalt örtüyü salınıb, uzunluğu 12,0 kilometr olan Zığ-Əmircan-Yeni Suraxanı avtomobil yolunun 3 kilometrlik hissəsində yenidənqurma işləri davam etdirilib, Etibar Bəkirli küçəsi və uzunluğu 8 kilometr olan Zığ-Hövsan avtomobil yolu isə yenidən qurulur.

Diqqətə çatdırılıb ki, rayonda yarım il ərzində 17 “Nümunəvi abad məhəllə” salınıb. Əmircan qəsəbəsində 18-ci əsrin sonlarında inşa edilmiş “Seyid qızı” türbəsi də əsaslı təmir olunub, ətraf əraziləri abadlaşdırılıb. “Bir bələdiyyə - azı bir layihə” proqramı çərçivəsində Hövsan qəsəbəsində Böyük Vətən müharibəsində həlak olanların şərəfinə ucaldılmış “1941-1945” abidə kompleksi əsaslı təmir edilib.

Ekoloji məsələlərin həllinə diqqət artırılıb, keçirilmiş iməciliklərdə 5000 ədəd ağac əkilib, Zığ və Bülbülə göllərinin ekoloji vəziyyətlərinin yaxşılaşdırılması işləri davam etdirilib, rayonda operator şirkətlər tərəfindən ümumi sahəsi 1,1 hektar olan 33 gölməçə müxtəlif növ tullantılardan təmizlənib, lay suları və neftlə çirklənmiş 9,68 hektar torpaq sahəsi təmizlənərək texniki rekultivasiya olunub, 23 ədəd quyunun işçi meydançası və quyu ətrafı sahələri neft tullantılarından təmizlənib, həmin ərazilərdə qazon və ağaclar əkilib.

Rayon əhalisinin sosial müdafiəsi diqqət mərkəzində olub, hesabat dövründə 6706 aztəminatlı şəxslərə 3 milyon 780 min manat sosial müavinət ödənilib, 1572 ailəyə ünvanlı dövlət sosial yardımı təyin edilib, 177 nəfər tənha, əlil vətəndaşa evlərdə sosial xidmət göstərilib, 59 nəfər imtiyazlı vətəndaş reabilitasiya mərkəzinə, pansionat və sanatoriyalara göndərilib, Məşğulluq Mərkəzinə müraciət edənlərdən 761 nəfəri işlə təmin edilib, 90 nəfər peşə hazırlıq kurslarına göndərilib.

Cari ilin martın 9-da Azərbaycan Respublikasının Birinci vitse-prezidenti, Heydər Əliyev Fondunun Prezidenti Mehriban xanım Əliyevanın sədrliyi ilə Bakı və Sumqayıt şəhərlərindəki yataqxanalarda müvəqqəti məskunlaşmış qaçqın və məcburi köçkün ailələrinin problemlərinin həlli ilə bağlı keçirilmiş müşavirədə verilmiş tapşırıqların icrası ilə əlaqədar rayonda konkret tədbirlər müəyyənləşdirilib və müəyyən işlər görülüb. Belə ki, rayonda müvəqqəti məskunlaşmış məcburi köçkün ailələrinin problemlərinin həlli ilə bağlı məcburi köçkün ailələrinin məskunlaşdığı Hövsan qəsəbəsi Hafiz Quliyev küçəsi 22 saylı yataqxananın və keçmiş “Gilavar” uşaq bağçasının, Bülbülə qəsəbəsi, Samir Əliyev küçəsi 149 ünvanda “Azərtunel” MMC-yə məxsus yataqxananın dam örtükləri təmir olunub, Zığ qəsəbəsində məcburi köçkün Şükürov Şəkur Zakir oğlunun qısaqapanma nəticəsində yanaraq yararsız hala düşmüş fərdi yaşayış evi təmir olunub, RİH tərəfindən mətbəx mebeli, yataq və qonaq dəsti ilə təmin edilib, 426 məcburi köçkün ailəsi fərdi elektrik sayğacı ilə təmin olunub və digər işlər görülüb.

Azərbaycan Respublikası Prezidentinin tapşırığına uyğun olaraq 2017-cı il fevralın 15-dən mayın 1-dək rayonda 153,0 min nəfər vətəndaş və 138 kollektiv tibbi müayinədən keçib, bu da tibbi müayinədən keçməsi nəzərdə tutulanların 87,24 faizini təşkil edib.

Hesabat yığıncağında əldə olunmuş nailiyyətlərlə yanaşı, həllini gözləyən problemlər, çatışmazlıqlar və onların aradan qaldırılması yolları də müzakirə olunub. Yığıncaqda Milli Məclisin deputatları Ağacan Abiyev, Sevinc Fətəliyeva və Fərəc Quliyev çıxış ediblər.

Sonda Suraxanı RİHB-nin birinci müavini Hacıyev Rəşad Zülfəli oğluna “Dövlət qulluğunda fərqlənməyə görə” medalı ilə təqdim olundu, rayonun ictimai həyatında və əhalinin tibbi müayinəsinin təşkilində fərqlənən bir qrup şəxs rayon icra hakimiyyəti başçısının Fəxri Fərmanı ilə təltif edilib.