CƏMİYYƏT
Suraxanıda “Azərbaycanın dövlət müstəqilliyi əbədidir, dönməzdir” mövzusunda konfrans keçirilib
Bakı, 26 may, AZƏRTAC
Suraxanı rayonunda Azərbaycanda Xalq Cümhuriyyətinin yaranmasının 99 illiyi münasibətilə silsilə tədbirlər təşkil olunub.
Rayon icra hakimiyyətindən AZƏRTAC-a bildiriblər ki, rayon ərazisində yerləşən tam orta məktəblərdə ölkəmizin müstəqillik tarixinə həsr olunmuş dərslər, inşa yazı müsabiqələri keçirilib, sənaye, səhiyyə, təhsil müəssisələrində “dəyirmi masa”lar təşkil olunub.
Suraxanı Rayonu Heydər Əliyev Mərkəzinin, AMEA-nın Abbasqulu Ağa Bakıxanov adına Tarix İnstitutunun, rayon icra hakimiyyətinin və Yeni Azərbaycan Partiyası (YAP) Suraxanı Rayon Təşkilatının birgə təşkilatçılığı ilə Mərkəzdə “Azərbaycanın dövlət müstəqilliyi əbədidir, dönməzdir” mövzusunda konfrans keçirilib.
Konfrans iştirakçıları əvvəlcə Ulu Öndərin Heydər Əliyev Parkında ucalan abidəsini ziyarət ediblər.
Əvvəlcə Azərbaycanın dövlət himni səsləndirilib.
Tədbirdə çıxış edən rayon icra hakimiyyətinin başçısı İlqar Abbasov qeyd edib ki, 1918-ci ildə ölkəmizdə Şərqin ilk demokratik respublikası yaranıb. Təkcə bu faktı dilə gətirməyin özü bizi nə qədər qürurlandırır. Bu, Azərbaycanın tarixidir. Vətənimizin qızıl hərflərlə yazılmış tarixidir. Bugünkü konfransın keçirilməsində də məqsəd bir daha tarixə nəzər salmaq, 23 ay müstəqil yaşayan Azərbaycan Xalq Cümhuriyyəti dövründə və 71 il sovetlər birliyinin tərkibində yaşadıqdan sonra 1991-ci il oktyabrın 18-də yenidən müstəqillik əldə edən ölkəmizin müstəqillik yolunda əldə etdiyi uğurları bir daha diqqətə çatdırmaqdır.
Əsl müstəqillik ulu öndər Heydər Əliyevin Naxçıvan Muxtar Respublikası Ali Məclisinin sədri olanda dövlətçiliyimizin atributu olan himnimizi, üçrəngli bayrağımızı və gerbimizi bərpa etməsi ilə başladı.
O qeyd edib ki, 1991-ci ildə yenidən müstəqillik əldə edən Azərbaycan bitib-tükənməyən hakimiyyət çəkişmələri, parçalanıb məhv olmaq təhlükəsi ilə üz-üzə idi. Ulu Öndərin yenidən siyasi hakimiyyətə qayıtması dövlət müstəqilliyimizin qorunmasını, ölkədə sabitliyin, əmin-amanlığın yaranmasını, iqtisadiyyatın inkişafını təmin edib.
Konfransda məruzə ilə çıxış edən Azərbaycan Milli Elmlər Akademiyasının Abbasqulu Ağa Bakıxanov adına Tarix İnstitutunun direktoru, Milli Məclisin deputatı, akademik Yaqub Mahmudov bildirib ki, 23 ay bir millətin nələrisə əldə etməsi baxımından çox qısa bir zaman kəsiyidir. Lakin Azərbaycan Xalq Cümhuriyyəti 99 il bundan əvvəl xalqın milli şüurunda dönüş yaratmağı bacarıb.
71 il sonra 1991-ci il oktyabrın 18-də dövlət müstəqilliyini bərpa edən Azərbaycanın müstəqilliyi yenə təhlükə qarşısında idi. Ulu öndər Heydər Əliyevin hakimiyyətə qayıdışı ilə separatçıların ölkəni parçalamaq kimi məkrli niyyətlərinə son qoyuldu. Dövlət çevrilişi cəhdlərinin və terror aktlarının qarşısı alındı. Müstəqil Azərbaycanın yeni Konstitusiyası qəbul olundu. Azad və demokratik şəraitdə prezident, parlament və bələdiyyə seçkiləri keçirildi. Ölkədə demokratik dəyişikliklər aparıldı. Hüquq-mühafizə, məhkəmə sistemi yenidən quruldu.
Bu gün Prezident İlham Əliyevin rəhbərliyi altında ölkəmizin dinamik inkişafı, sürətli tərəqqisi, həyata keçirilən əzəmətli layihələr, Azərbaycanın hərtərəfli modernləşməsi, vətənimizi dünyaya yeni formada təqdim etməyə imkan yaradan müsbət dəyişikliklər hər birimizi sevindirir və qürurlandırır.
Məruzə ətrafında Azərbaycan Milli Elmlər Akademiyasının Abbasqulu Ağa Bakıxanov adına Tarix İnstitutunun şöbə müdirləri Natiq Məmmədzadə, İlqar Niftəliyev, YAP Suraxanı Rayon Təşkilatının sədri Vüqar Seyidov, Milli Məclisin deputatları Sevinc Fətəliyeva, Ağacan Abiyev çıxış ediblər.
Sonda Azərbaycan Milli Elmlər Akademiyasının Abbasqulu Ağa Bakıxanov adına Tarix İnstitutu rayonun ictimai həyatında fəal iştirakına görə rayon icra hakimiyyəti başçısının Fəxri Fərmanı ilə təltif edilib. Eyni zamanda, ulu öndər Heydər Əliyevin zəngin irsinin öyrənilməsi məqsədi ilə rayonun 9-11-ci sinif şagirdlərinə Suraxanı Rayonu Heydər Əliyev Mərkəzində “Heydər Əliyev və müasir Azərbaycan tarixi” mövzusunda keçirilən Açıq dərslərin tədrisində və təhsil müəssisələrində keçirilən tədbirlərin təşkilində fərqlənən müəllimlər rayon icra hakimiyyəti başçısının Fəxri Fərmanı ilə təltif ediliblər, Ulu Öndərin anadan olmasının 94-cü ildönümü münasibəti ilə keçirilən rəsm sərgisində fərqlənən şagirdlər mükafatlandırılıblar.