CƏMİYYƏT
Suraxanıda keçirilən konfransda ulu öndər Heydər Əliyevin ordu quruculuğu sahəsində xidmətlərindən danışılıb
Bakı, 5 may, AZƏRTAC
Suraxanı rayonunda Azərbaycan xalqının ümummilli lideri Heydər Əliyevin anadan olmasının 93-cü ildönümü münasibətilə silsilə tədbirlər keçirilir.
Növbəti belə tədbir - “Heydər Əliyev və ordu quruculuğu” mövzusunda konfrans Suraxanı rayonu Heydər Əliyev Mərkəzinin, rayon icra hakimiyyətinin və Yeni Azərbaycan Partiyası Suraxanı rayon təşkilatının birgə təşkilatçılığı ilə Mərkəzdə keçirilib.
Tədbir iştirakçıları Heydər Əliyev Parkında Ulu Öndərin abidəsini ziyarət edib, Suraxanı rayonu Heydər Əliyev Mərkəzinin rəsm dərnəyində yaradıcılıqla məşğul olan uşaqların Mərkəzin ətrafında yerləşdirilmiş lövhələrdə sərgilənən əl işlərinə baxıblar.
Mərkəzin sifarişi ilə hazırlanmış, Ümummilli Liderin həyat və yaradıcılığına həsr olunmuş “Millət atası” filminə baxışdan sonra konfrans öz işinə başlayıb.
Suraxanı Rayon İcra Hakimiyyətinin başçısı İlqar Abbasov qeyd edib ki, bu günlərdə ölkəmizdə və onun hüdudlarından kənarda ulu öndər Heydər Əliyevin anadan olmasının 93-cü illiyi qeyd olunur. Heydər Əliyev Azərbaycan xalqının milli sərvətidir. Bugünkü konfrans Ulu Öndərin çoxşaxəli fəaliyyətinin mühüm bir istiqaməti olan ordu quruculuğu sahəsindəki fəaliyyətinə həsr olunub. Müasir müstəqil dövlətimizin memarı və qurucusu olan ulu öndər Heydər Əliyev qüdrətli Azərbaycan Ordusunun yaradıcısıdır.
Məruzəçi qeyd edib ki, hər bir dövlətin varlığı, müqəddəratı onun güclü iqtisadiyyatı və güclü ordusunun olması ilə səciyyələnir. 1991-ci ildə müstəqilliyini bərpa etmiş Azərbaycan elə müstəqilliyinin ilk günlərində mürəkkəb sosial-iqtisadi, ictimai-siyasi vəziyyətlə üzləşdi. Bu, eyni zamanda, özünü ordu sahəsində də göstərdi. Dağlıq Qarabağda döyüşən əsgərlərin vahid komandanlıqdan idarə edilməməsi 20 faizdən artıq torpağımızın ermənilər tərəfindən işğalı ilə nəticələndi. 1993-cü ilin iyun ayında xalqın təkidli tələbi ilə Ulu Öndərin yenidən siyasi hakimiyyətə gəlməsi ilə qardaş qırğınının qarşısını almaqla yanaşı, mərkəzi komandanlığa birbaşa tabe olan ordu quruculuğuna başlanıldı.
Ulu Öndərin ordu quruculuğu istiqamətində başladığı işi yeni dövrün tələbləri səviyyəsində inamla davam etdirən Azərbaycan Respublikasının Prezidenti, Ali Baş Komandan İlham Əliyev bu məqsədlə bütün zəruri tədbirlərin həyata keçirilməsinə nal olub. Azərbaycan Silahlı Qüvvələrinin kəmiyyət və keyfiyyət baxımından komplektləşdirilməsi, peşəkarlıq səviyyəsinin yüksəldilməsi, maddi-texniki bazasının gücləndirilməsi, hərbçilərin sosial rifah halının ildən-ilə yaxşılaşdırılması, ordu hissələrinin müasir texnika və avadanlıqla təchiz edilməsi, habelə beynəlxalq təcrübənin mənimsənilməsi istiqamətində həyata keçirilən kompleks tədbirlər bunu bir daha təsdiqləyir. Aprelin əvvəllərində baş verən dörd günlük müharibədə təcavüzkar Ermənistan öz qarşısında qüdrətli Azərbaycan Ordusunu gördü. Azərbaycan əsgəri düşmənə ərazilərimizə qarşı hərbi təcavüz siyasətinin davam etdirildiyi illərin sərt cavabını verərək ən ağır zərbəsini vurdu. Bu qələbə Azərbaycan xalqının Ümummilli Liderinin 1990-cı illərin ortalarından müəyyən etdiyi uzaqgörən siyasi kursun məntiqi nəticəsidir.
Məruzə ətrafında Milli Məclisin deputatları Ağacan Abıyev və Sevinc Fətəliyeva, Heydər Əliyev adına Azərbaycan Ali Hərbi Məktəbinin rəisi, polkovnik Füzuli Salahov, Respublika Müharibə, Əmək və Silahli Qüvvələr Veteranları təşkilatının sədr müavini, ehtiyatda olan polkovnik Cəlil Xəlilov, YAP Suraxanı rayon təşkilatının sədri Vüqar Seyidov çıxış ediblər.
Çıxışlarda Ulu Öndərin ordu quruculuğu istiqamətindəki fəaliyyətindən ətraflı danışılıb və xüsusi vurğulanıb ki, Azərbaycan əsgəri bu gün quruda, havada və dənizdə Vətən qarşısında vəzifə borcunu şərəf və vicdanla yerinə yetirir, Ulu Öndərimizin ideyalarına sadiqdir, Vətənin hər bir çağırışına hər an hazırdır. Xalq öz ordusuna inanır, onun gücünə güvənir.
Sonra 2015-2016-cı tədris ilində Suraxanı rayonu Heydər Əliyev Mərkəzində və Yeni Azərbaycan Partiyası Suraxanı rayon təşkilatında ulu öndər Heydər Əliyevin zəngin irsinin öyrənilməsi məqsədilə keçirilmiş açıq dərslərin təşkilində fəal iştirakına görə fərqlənmiş şəxslər rayon fəxri fərmanla təltif ediliblər.
Yeni Azərbaycan Partiyasının sıralarına üzv qəbul olunmuş bir qrup rayon sakininə üzvlük vəsiqəsi təqdim olunub.
Respublika Müharibə, Əmək və Silahli Qüvvələr Veteranları təşkilatının sədri Dadaş Rzayev bir qrup şəxsə təşkilatın medalını və fəxri fərmanını təqdim edib.