Bakı, 4 may, AZƏRTAC 

Mayın 4-də Naxçıvan Muxtar Respublikasının Bakıdakı daimi nümayəndəliyində Şuşa şəhərinin işğalının 24-cü ildönümü münasibətilə tədbir keçirilib. Bu barədə AZƏRTAC-a daimi nümayəndəlikdən məlumat verilib.

Əvvəlcə ölkəmizin müstəqilliyi, ərazi bütövlüyü uğrunda şəhid olanların xatirəsi bir dəqiqəlik sükutla yad edilib.

Daimi nümayəndəliyin rəhbəri Bəxtiyar Əsgərov çıxış edərək Azərbaycanın mədəniyyət beşiyi sayılan qədim Şuşa şəhərinin tarixi haqqında məlumat verib. O qeyd edib ki, Azərbaycan xalqının mədəniyyətinin, əsrarəngiz musiqisinin beşiyi sayılan, tarixi Azərbaycan torpaqlarının əbədi və ayrılmaz parçası, böyük alimlərin, bəstəkarların, şairlərin vətəni olan Qarabağın paytaxtı – Şuşa şəhəri artıq iyirmi dörd ildir ki, təcavüzkar Ermənistanın işğalı altındadır. Düz iyirmi dörd ildir ki, yadlar tapdağı olan Şuşa ölüm sükutuna qərq olub. Bütün dünyanın, beynəlxalq təşkilatların işğalçı ölkə kimi tanıdığı Ermənistanın silahlı qüvvələri bu şəhərdə Azərbaycan xalqının izlərini silmək, onu unutdurmaq üçün ən ağlagəlməz cinayətlərə əl atıb. Ermənilər Qarabağ xanlığının paytaxtı olmuş Şuşa şəhərinin qiymətli tarixi abidələrini dağıdır, milli arxitekturasını silib istədikləri kimi yenidən qurmağa cəhd edirlər.

1992-ci il may ayının 8-nə keçən gecə erməni hərbi birləşmələri keçmiş sovet ordusunun 366-cı alayının hərbi qulluqçularının və əlavə zirehli texnikanın köməyi ilə Şuşa şəhərinə hücuma keçdilər. Uzun sürən artilleriya atəşindən və qeyri-bərabər qanlı döyüşlərdən sonra şəhər işğal olundu.

Bəxtiyar Əsgərov qeyd edib ki, Şuşanın işğalı nəticəsində şəhərdə 195 nəfər Azərbaycan vətəndaşı xüsusi amansızlıqla qətlə yetirilib, 165 nəfər yaralanıb, onlardan 150 nəfəri əlil olub, 552 körpə valideynlərini itirib, 20 mindən artıq əhali isə doğma yurd-yuvasını tərk edərək məcburi köçkün vəziyyətinə düşüb. Əsir və girov götürülmüş 58 azərbaycanlının taleyi barədə bu günə qədər məlumat yoxdur.

Diqqətə çatdırılıb ki, bu gün ölkəmizdə qaçqın və məcburi köçkünlərin problemlərinin həlli istiqamətində lazımi addımlar atılır. Dövlət tərəfindən məcburi köçkünlərə diqqət və qayğının nəticəsi olaraq bütün çadır şəhərcikləri ləğv olunub. Məcburi köçkünlərin sosial problemlərinin həlli istiqamətində mühüm addımlar atılıb.

Daimi nümayəndəliyin rəhbəri bu ilin aprel ayının əvvəlində cəbhə xəttində baş verən hadisələr barədə də danışıb. Bildirib ki, Ermənistan silahlı qüvvələri növbəti silahlı təxribata əl ataraq cəbhə xətti boyunca yerləşən yaşayış məntəqələrini atəşə tutublar. Azərbaycan Silahlı Qüvvələri dinc sakinlərin təhlükəsizliyini təmin etmək üçün cavab tədbiri görməyə, əks hücum həyata keçirməyə məcbur olub və aparılan əməliyyatlar nəticəsində nizamlı və qüdrətli Azərbaycan ordusu bir neçə yüksəkliyi və yaşayış məntəqələrini nəzarət altına götürüb. Bu uğurlu özünümüdafiə və əks hücum əməliyyatları xalqımızın və milli ordumuzun yekdil ruh yüksəkliyi fonunda baş verib. Yaşadığımız hər gün Azərbaycan xalqı və milli ordumuzun hər bir nəfəri Ali Baş komandan İlham Əliyevin doğma torpaqlarımızın işğaldan azad olunması üçün verəcəyi əmri gözləyir.

B.Əsgərov Naxçıvan Əlahiddə Ümumqoşun Ordusunun da düşmənə layiqli cavab vermək üçün hər an əmr gözlədiyini qeyd edib. Vurğulanıb ki, Naxçıvan və naxçıvanlılar daha bir neçə il Şuşasız yaşamaq fikrində deyil.