İQTİSADİYYAT
“Synergy Group” şirkəti fibrosement zavodunun tikintisinə hazırlıqları davam etdirir
Bakı, 22 yanvar (AZƏRTAC – Ramiz Quliyev). Azərbaycanda tikinti sənayesi məhsullarının istehsal sahəsi genişlənməkdədir.
Bu günlər Bakı şəhərinin Qaradağ rayonu ərazisində fibrosement zavodunun tikintisinə hazırlıq işləri davam etdirilir.
Cari ilin Azərbaycan Prezidenti İlham Əliyevin müvafiq Sərəncamı ilə “Sənaye ili” elan edilməsi ilə əlaqədar olaraq AZƏRTAC-ın müxbiri layihəni reallaşdıran “Synergy Group” ASC-nin Müşahidə Şurasının sədri Riyad Hüseynov ilə görüşmüş, yeni sənaye müəssisəsinin tikintisinə hazırlıq işlərinin gedişi ilə maraqlanmışdır.
R.Hüseynov bildirmişdir ki, Avstriyanın bu sahədə ixtisaslaşmış iri şirkətlərindən olan “MFL” ilə müqavilə imzalanaraq müvafiq avadanlıq sifariş edilmişdir. Artıq layihələndirmə və zavodun tikiləcəyi sahədə torpaq işlərinin həyata keçirilməsi davam etdirilir. Zavod Qaradağ rayonunun Səngəçal qəsəbəsində tikiləcəkdir.
Müşahidə Şurasının sədri demişdir ki, şirkət qəsəbədəki ərazini tikinti sənayesi məhsullarının istehsalının bir yerdə cəmləşdiyi texnoparka çevirəcəkdir. İlkin mərhələlərdə qurulmuş infrastrukturdan fibrosement zavodu üçün də istifadə olunacaqdır.
Vurğulanmışdır ki, illik istehsal gücü təxminən 6 milyon kvadratmetr fibrosement olacaq zavodda müxtəlif rənglərdə və çeşiddə dam örtükləri və fasad materialları istehsal ediləcəkdir. Fibrosement lövhələr insan sağlamlığına və ətraf mühitə zərəri olmayan, su keçirməyən, rütubətə və yanğına qarşı müqavimətli, yüngül, dekorativ, istilik və səs izolyasiyası xüsusiyyətinə malik tikinti materialıdır.
“Fibrosementin üstün xüsusiyyətləri çoxdur. Bizim təklif edəcəyimiz məhsul Azərbaycanın inşaat bazarında bir neçə problemə innovativ həll təqdim edəcəkdir”- deyən Riyad Hüseynov bildirmişdir ki, yeni dam örtükləri regionlardakı binaların azbest tərkibli şiferlərinin dəyişdirilməsi üçün təklif ediləcəkdir.
Regionlarda fərdi evlərin və binaların dam örtükləri insan sağlamlığı üçün ziyanlı olan azbestdəndir. Əsas məqsəd də bütün regionlarda dövlətin dəstəyi ilə azbest tərkibli şiferi fibrosement dam örtükləri ilə əvəz etməkdir. Zavodun 2015-ci ildə istifadəyə verilməsi planlaşdırılmışdır.
Ötən ilin may ayında Vyanada keçirilmiş Avstriya-Azərbaycan biznes forumu çərçivəsində “Synergy Group” ASC ilə Avstriyanın “Maschinenfabrik Liezen und Gießerei Ges.m.b.H. (MFL)” şirkəti arasında Azərbaycanda fibrosement zavodunun tikintisi ilə bağlı Anlaşma Memorandumu imzalanmışdır. “Synergy Group”un tərkibində fibrosement zavodunun tikintisi üzrə “Azerbaijan Fibro Cement” MMC yaradılmışdır.
Fibrosement (lifli sement)- sellüloza lifi, kvars qumu və sementdən ibarət olan üzlük materialıdır.