İDMAN


Taekvandoçu Patimat Abakarova “Bakı-2017”nin qızıl medalını qazanıb

Bakı, 17 may, Nihad Budaqov, AZƏRTAC

Qadın taekvandoçumuz Patimat Abakarova (49 kq) "Bakı-2017"nin qızıl medalına yiyələnib.

AZƏRTAC xəbər verir ki, Azərbaycan idmançısı final görüşündə qazaxıstanlı Aynur Yesbergenovanı 14:4 hesabı ilə məğlub edib. Bununla da Patimat Abakarova IV İslam Həmrəyliyi Oyunlarında Azərbaycan taekvandoçularının aktivinə ikinci qızıl medalı yazdırıb.

İdmançımız ilk görüşdə Fələstin təmsilçisi Layan Caber ilə üz-üzə gəlib. O, rəqibindən 19:7 hesabı ilə üstün olub. Azərbaycan təmsilçisi yarımfinalda iranlı Şalmei Sudabe Poursadiqini 15:4 hesabı ilə məğlub edərək finala vəsiqə qazanıb.

Karyerası ərzində bir çox nailiyyətlər qazanan Patimat Abakarova Azərbaycan Taekvando Federasiyasının yığma komandasının tərkibinə 2012-ci ildə qatılıb. 2013-cü ildə İndoneziyadakı III İslam Həmrəyliyi Oyunlarında və “Bakı-2015” birinci Avropa Oyunlarında bürünc medal qazanıb. O, 2015-ci ildə Koreya Respublikasında hərbçilərin dünya çempionatında birinci, Böyük Britaniyadakı beynəlxalq Qran-pri turnirində isə üçüncü yerə sahib olub. 2016-cı ildə İsveçrədə böyüklər arasında Avropa çempionatında ikinciliklə kifayətlənib.

Ötən ilin yanvarında İstanbulda təşkil olunan taekvando üzrə Avropa Olimpiya təsnifat turnirinin qalibi olan P.Abakarova, eyni zamanda, “Rio-2016” Yay Olimpiya Oyunlarına lisenziya qazanıb. O, 49 kiloqram çəki dərəcəsində Rio Olimpiadasında bürünc mükafata yiyələnib. Bu il böyüklər arasında respublika çempionatının və Antalyada keçirilən klublararası Avropa çempionatında "Gilan" klubunun heyətində fəxri kürsünün ən yüksək pilləsinə qalxıb. P.Abakarova taekvando üzrə bir çox beynəlxalq yarışlarda mükafatçılar sırasında yer alıb.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.