İDMAN
Taekvondo üzrə Azərbaycan yığmasının qatılacağı beynəlxalq yarışlar məlum olub
Bakı, 23 sentyabr, AZƏRTAC
Gələn ilin mayında Azərbaycanda IV İslam Həmrəylik Oyunları, iyunda isə Koreya Respublikasında taekvondo üzrə dünya çempionatı keçiriləcək. Bu iki mötəbər yarışlara, həmçinin dekabrda Meksikada keçiriləcək son Qran-pri turnirinin final mərhələsinə hazırlaşmaq üçün milli komandamız oktyabrın 3-dən məşqlərə başlayacaq.
Bu sözləri taekvondo üzrə kişilərdən ibarət Azərbaycan yığmasının böyük məşqçisi Elnur Amanov AZƏRTAC-a məxsusi müsahibəsində deyib.
E.Amanov bildirib ki, IV İslam Həmrəylik Oyunları doğma Vətənimizdə təşkil ediləcəyi üçün bu Oyunlara daha məsuliyyətlə hazırlaşırıq. Taekvondo idman növündə bir il Avropa, digər il isə dünya çempionatı keçirilir. Sonuncu dünya çempionatı 2015-ci ildə Rusiyada təşkil edilib. Həmin çempionatda Radik İsayev qızıl medal qazanmışdı. İdmançılarımızın Tokio Olimpiadasına vəsiqə qazanması üçün indidən hazırlaşırıq. Yetirmələrimin beynəlxalq yarışlarda da iştirak edib Olimpiya Oyunları üçün xal yığması çox mühüm əhəmiyyət kəsb edir. Ona görə çalışacağıq ki, bu il və gələn il yüksək xal verən yarışlarda daha çox iştirak edək. Ən çox xal bu turnirlərdə qazanılacaq.
Məşqçi bildirib ki, Meksikadakı Qran-pri turnirinin final mərhələsinə reytinqdə ilk səkkizlikdə qərarlaşan idmançılar dəvət edilir. Ona görə üç idmançımıza – Radik İsayevə, Milad Beigi Harçeqaniyə və Ayxan Tağızadəyə Meksikadakı yarışa birbaşa dəvət gəlməsi gözlənilir. Məhəmməd Məmmədov (63 kq) isə reytinqdə hələ ki 15-ci yerdə qərarlaşıb.
Böyük məşqçi vurğulayıb ki, biz 2020-ci ildə Tokiodakı Olimpiadaya maksimum çəki dərəcələrində 4 kişi idmançı ilə yollanmağı planlaşdırırıq. Qran-pri yarışlarından sonra Dünya Taekvondo Federasiyasının Olimpiya reytinq siyahısında ilk altılıqda olacaq idmançılar “Tokio-2020” Olimpiya Oyunlarına vəsiqəni birbaşa təmin edəcəklər. Əgər idmançılarımız Qran-pri turnirlərində lazımı xalları yığarsa və Meksikadakı son Qran-pri turnirindən sonra dünya reytinq cədvəlində ilk altılığa düşərsə, biz növbəti Olimpiadaya ilk dəfə dörd kişi idmançı ilə qatılacağıq.
Qeyd olunub ki, Radik İsayev (80 kiloqramdan yuxarı) taekvondoçuların sentyabr ayı üçün Olimpiya reytinq cədvəlinə görə, “Rio-2016”dan sonra ilk yerdə qərarlaşıb. Digər kişi taekvondoçularımızdan Milad Beigi Harçeqani (80) 7-ci, Ayxan Tağızadə (68) isə 10-cu pillədədir. Qadınlardan birinci Avropa Oyunlarının ikincisi Fəridə Əzizova (67 kq) dünya reytinqində 9-cu, Rio Olimpiadasının bürünc mükafatçısı Patimat Abakarova (49 kq) isə 10-cu yerdədir. Əgər iki qadın taekvondoçumuz da turnirlərdə yüksək xal yığıb dünya reytinqində ilk altılıqda mövqe tutarsa və növbəti Olimpiadaya 2 lisenziya qazanarsa, ölkəmizin Tokioda ilk dəfə 6 taekvondoçu ilə təmsil olunmaq şansı yaranacaq. İndiyədək hələ heç bir ölkə buna nail ola bilməyib.
E.Amanov əlavə edib ki, Meksikadakı final mərhələsinin qalibi olacaq idmançılar reytinq göstəricilərini 80 xal artıracaqlar. Reytinq xallarını Koreya Respublikasında keçiriləcək dünya çempionatında, eləcə də Bakıda təşkil ediləcək IV İslam Həmrəylik Oyunlarında qazanılan nəticələrə görə də artırmaq imkanı olacaq. Azərbaycanı “Tokio-2020”də daha çox taekvondoçunun təmsil edə bilməsi üçün Qran-pri turnirlərində milli komandamızın üzvlərinin mümkün qədər çox xal toplamasına çalışacağıq.
Yığma komandanın növbəti beynəlxalq turnirlərə hazırlaşmaq üçün oktyabrdan məşqlərə başlayacağını deyən böyük məşqçi qeyd edib ki, bu turnirlər arasında təlim-məşq toplanışları da olacaq. Məşqlər intensiv davam edəcək. Biz beynəlxalq yarışlara davamlı olaraq hazırlaşırıq.
Para-taekvondonun Tokio Olimpiadasının proqramına salınması, Azərbaycanın para-taekvondo üzrə milli komandasının mötəbər beynəlxalq yarışlarda, dünya çempionatlarında əldə etdiyi uğurlar, o cümlədən bir neçə gün əvvəl Avropa birinciliyində 9 medal qazanması barədə məlumat verən E.Amanov deyib: “Bu nailiyyətlər “Tokio-2020” Olimpiya Oyunlarında daha çox idmançımızın medal qazanmaq imkanlarını artırır. Cari ildən para-taekvondoçular üçün də reytinq cədvəlləri açıqlanacaq. Gələn ildən isə para-taekvondoda Tokio Olimpiadasına reytinq xalları yığılmağa başlanacaq”.