MƏDƏNİYYƏT
Tanınmış bas-gitaraçı Linli Mart Bakıda ustad dərsi keçib
Bakı, 25 oktyabr, AZƏRTAC
Mədəniyyət və Turizm Nazirliyinin və Azərbaycan Mədəniyyət Fondunun birgə təşkilatçılığı ilə ənənəvi Bakı Beynəlxalq Caz Festivalı davam edir.
AZƏRTAC xəbər verir ki, festival çərçivəsində oktyabrın 25-də dünya şöhrətli bas-gitaraçı Linli Martın ustad dərsi olub.
Əslən Mavrikidən olan Linli Mart “Club Med” qrupunda debüt edib. Məşhur Fransua Jano onun ifasına maraq göstərib və 1993-cü ildə Linli Martın Parisə köçməsinə kömək edib.
Linli Mart ustad dərsindən əvvəl deyib: “Bakıya üçüncü dəfədir gəlirəm və hər dəfə də tamaşaçıların musiqi duyumuna heyran oluram. Konsertlərim həmişə anşlaqla keçir”. Gitaraçının sözlərinə görə, 7 yaşından musiqi ilə məşğul olub, 14 yaşında isə caz musiqisinə maraq göstərib. Atasının ona bağışladığı gitaradan heç vaxt ayrılmır və bütün konsertləri həmin gitarada çalır. Linli Martın musiqisinin əsas cizgilərini ehtiras, virtuozluq, Afrika və hind musiqisinə xas ritmlər təşkil edir.
Xatırladaq ki, Bakı Beynəlxalq Caz Festivalı 2002-ci ildən keçirilir. Builki festivalın konsertləri Beynəlxalq Muğam Mərkəzində, Heydər Əliyev Sarayında, M.Maqomayev adına Azərbaycan Dövlət Filarmoniyasında, kamera və orqan musiqisi zalında, “Rotunda Jazz Club” və “Cine Club”da təşkil olunur.