SİYASƏT
Tanınmış rusiyalılar Azərbaycan diasporunun qonağı olublar
Moskva, 11 iyun, AZƏRTAC
Moskvada Ümumrusiya Azərbaycanlıları Konqresi (ÜAK) Bakıda birinci Avropa Oyunlarının açılışına, Rusiya Gününə və Azərbaycanın Milli Qurtuluş Gününə həsr olunmuş təntənəli qəbul təşkil edib.
ÜAK-ın icraçı direktorunun müavini İlqar Hacıyev tədbiri açaraq qeyd edib ki, iyunun 12-də Bakıda birinci Avropa Oyunları başlanır. Bu oyunlar Azərbaycanda iqtisadiyyatın dinamik inkişafına və ölkədəki sabitliyə sübutdur. ÜAK-ın icraçı direktorunun müavini deyib: “Bu gün ölkə Prezident İlham Əliyevin rəhbərliyi altında elə yüksəklikləri fəth edib və dünyada elə hörmət qazanıb ki, hər bir azərbaycanlı tarixi vətəninə görə qürur hiss edir. İyunun 12-də açılacaq Avropa Oyunları bu uğurları bir daha təsdiq edəcək. Bu, bizim üçün təkcə idman bayramı deyil, nailiyyətlər bayramıdır”.
İ.Hacıyev həmçinin bütün rusiyalıları Rusiya Günü münasibətilə təbrik edərək bildirib ki, Rusiya cəmiyyətin müxtəlif təbəqələrinin, müxtəlif millətlərin və dinlərin nümayəndələrini birləşdirərək bütün xalqların yekdillik timsalına çevrilib. O deyib: “Biz hamımız çox müxtəlifik, müxtəlif arzularımız, maraqlarımız və talelərimiz var, amma hamımızı birləşdirən odur ki, biz Rusiyada yaşayırıq. Sevindirici haldır ki, Rusiya ilə Azərbaycan arasında münasibətlər və dövlətlərarası əlaqələr gündən-günə möhkəmlənir və inkişaf edir”.
İ.Hacıyev qeyd edib ki, 1993-cü il iyunun 15-də Heydər Əliyev Azərbaycan Respublikası Ali Sovetinin sədri seçilmişdir. O, qonaqlara həmin dövrdən söhbət açaraq deyib: “1993-cü ilin iyununda Azərbaycanda son dərəcə təhlükəli vəziyyət yaranmışdı, vətəndaş müharibəsi başlana bilərdi. 1992-ci ildə hakimiyyətə gəlmiş Xalq Cəbhəsi ölkədə yaranmış vəziyyətin öhdəsindən gələ bilmirdi. Xalqın tələbi ilə Heydər Əliyev Naxçıvandan Bakıya dəvət olundu. O, iyun ayında hakimiyyət başına keçərək vətəndaş müharibəsinin qarşısını aldı. Beləliklə, 15 iyun ölkə tarixinə Milli Qurtuluş Günü kimi daxil oldu”.
Gecənin aparıcısı, ÜAK-ın müşaviri, tarix elmləri namizədi Manaf Ağayev zaldakılara müraciət edərək deyib: “Bu üç bayram arasında əlaqə təkcə onların təqvimdə bir-birinə yaxın olması ilə bağlı deyil. 1990-cı il iyunun 12-də RSFSR Xalq Deputatlarının qurultayı Dövlət suverenliyi haqqında bəyannamə qəbul edib. Lider Vladimir Vladimiroviç Putinin rəhbərlik etdiyi Rusiya, əlbəttə, yeni Rusiyadır. Dünya iqtisadiyyatının bütün burulğanlarına və ölkənin dinamik inkişafına xaricdən göstərilən maneələrə baxmayaraq, qürurlu, uğurlu, məqsədyönlü Rusiyadır”.
Beynəlxalq Ticarət Mərkəzinin baş direktoru, Baybakov Fondunun prezidenti Valeri Serov öz çıxışında deyib: “Bir-biri qarşısında öhdəlik və məsuliyyət, bir-birinə kömək göstərmək istəyi onunla təsdiqlənir ki, bu gün Rusiyada 2 milyondan çox azərbaycanlı yaşayır, yaxşı da yaşayır və Rusiyanın inkişafına öz töhfəsini verir. Bu töhfə ölçüyəgəlməzdir”.
Rusiya Elmlər Akademiyasının Geologiya İnformasiya Mərkəzinin direktoru, təyyarəçi-kosmonavt, SSRİ Qəhrəmanı Valentin Lebedev bu yaxınlarda Bakıya səfərindən danışıb. Kosmonavt deyib: “Bakı çox gözəl, dinamik inkişaf edən bir şəhərdir. Düz 25 il əvvəl orada olmuşdum. Şəhər tanınmaz dərəcədə dəyişib, amma insanların qonaqpərvərliyi, mehribanlığı və tərbiyəsi dəyişməyib. Azərbaycanlıların bu keyfiyyətləri məni həmişə təəccübləndirir. Səfərimin səbəbi görkəmli alim-konstruktor, Kosmik Uçuşlar üzrə Dövlət Komissiyasının rəhbəri olmuş general-leytenant Kərim Kərimova həsr edilmiş “Yüksəliş” adlı tammetrajlı sənədli filmin təqdimatı idi”.
Rusiya Veteranlar Partiyasının sədri İldar Rezyakov Rusiya-Azərbaycan münasibətlərinin uğurlu gələcəyinə əmin olduğunu bildirib. O deyib: “Bu gün bu masa arxasına Rusiyada yaşayan azərbaycanlılar və Azərbaycanda yaşayan ruslar toplaşıblar. Rusiya ilə Azərbaycanın yanaşı addımladıqlarını deyənlərə mən həmişə düzəliş verirəm: yanaşı yox, birlikdə”.
Rusiya Veteranlar Partiyası sədrinin müavini Nikolay Çuykov partiyanın həyatında ÜAK-ın fəal iştirakına görə bu təşkilata minnətdarlığını bildirib. O, həmçinin qeyd edib ki, keçmiş SSRİ respublikaları əvvəlki kimi yenə də bir humanitar məkanda əməkdaşlıq edirlər. N.Çuykov deyib: “Biz suveren dövlətlərdə yaşasaq da, əvvəlki kimi yenə də vahid humanitar məkandayıq. Rusiyada hər bir millətin nümayəndəsinin inkişaf etmək və öz milli identikliyini möhkəmləndirmək imkanı vardır”.
Gecədə Baybakov Fondunun uğurlu işi qiymətləndirilib. 2011-ci ildə, Nikolay Baybakovun anadan olmasının 100 illiyinin qeyd edildiyi zaman Azərbaycanda yubileylə bağlı bir sıra tədbirlər keçirilib. Məsələn, Azərbaycan Prezidenti İlham Əliyevin Fərmanı ilə Bakıda Nikolay Baybakovun adını daşıyan 67 nömrəli məktəb əsaslı təmir edilib. Yaxın günlərdə orada N.Baybakovun büstü qoyulacaq.
Rusiyanın Neft və Qaz Sənayesi İşçiləri İttifaqının prezidenti Gennadi Şmal sovet neft sənayesinin inkişafına Azərbaycanın böyük kömək göstərdiyini vurğulayıb. O deyib: “Azərbaycanlı dostlarım və həmkarlarımla görüşərkən həmişə xatırlayıram ki, bizim neft-qaz birliyində “Bakı” sözü neft sənayesinin inkişafının sinonimi hesab edilir. Bu gün həm Rusiyanı, həm də Azərbaycanı təchiz edən neft sənayesinin inkişaf tarixini xatırlayanda onun görkəmli xadimlərini qeyd etmək lazımdır. Onların arasında yaxın dostum Fərman Salmanovu xüsusi vurğulamaq istəyirəm. O, Rusiyada, o cümlədən Qərbi Sibirdə bir çox yataqların ilk kəşfiyyatçısıdır. Deməli, Rusiya neft sahəsinin inkişafına görə məhz bu adama çox borcludur”.
Rusiya Federasiyasının “Vneştorq” MMC-nin müşaviri Yuri Şedrin belə görüşlərin tez-tez keçirilməsinin zəruri olduğunu qeyd edərək deyib: “SSRİ dağıldıqdan sonra Azərbaycan Rusiyanın ən mühüm strateji tərəfdaşlarından birinə çevrilib, birgə layihələrin həyata keçirilməsi və iki ölkə arasında əmtəə dövriyyəsi bunu təsdiq edir”.
Rusiya Yazıçılar İttifaqının və Azərbaycan Yazıçılar Birliyinin üzvü, ÜAK Mərkəzi Şurasının üzvü, şairə Alla Axundova və professor Bella Musayeva da Azərbaycan ilə Rusiyanın ümumi keçmişini qoruyub saxlamağın vacibliyini bildiriblər.
Gecədə həmçinin Heydər Əliyev Fondunun Rusiyadakı təmsilçiləri, AR-in RF-dəki səfirliyinin, BVM Veteranlar İttifaqının, Azərbaycan və Rusiya ictimai təşkilatlarının nümayəndələri iştirak ediblər.
Fəridə Abdullayeva
AZƏRTAC-ın xüsusi müxbiri
Moskva