Azərbaycanın tanınmış şahmat məşqçisi, Respublika Şahmat Mərkəzinin ilk direktoru Fuad Cəfərovun xatirəsinə həsr olunan klassik şahmat üzrə beynəlxalq turnirə noyabrın 9-da yekun vurulub.

AZƏRTAC xəbər verir ki, Respublika Şahmat Mərkəzində İsveçrə sistemi üzrə keçirilən turnirdə Azərbaycan, Rusiya və Gürcüstandan olan 30 zəka sahibi birincilik uğrunda mübarizə aparıb. Beynəlxalq reytinqli şahmatçıların mübarizə apardığı turnir 7 turdan ibarət olub.

Gərgin idman mübarizəsi şəraitində keçən yarışda 5,5 xal toplayan Rəşad Zeynallı qalib adını qazanıb. Oğuz Abışlı ikinci, Orxan Talışzadə isə üçüncü pillədə qərarlaşıblar. Fəxri kürsüdə yer alan şahmatçılara kubok və pul mükafatları təqdim olunub.

Həmçinin gənc şahmatçılardan Nail Bəşirli, veteranlardan isə Konstantin Kananenko da kubok və pul mükafatları ilə təltif edilib. Yarışın ən kiçik yaşlı şahmatçısı Vüqar Manafova xatirə hədiyyəsi verilib.

Turnirin qalibi Rəşad Zeynallı yarışın gərgin idman mübarizəsi şəraitində keçdiyini diqqətə çatdırıb. Bildirib ki, ənənəvi xarakter daşıyan yarışda bir çox perspektivli azərbaycanlı şahmatçılar mübarizə aparıblar. R.Zaynallı deyib: “Turnirdə 7 oyunda məğlub olmadan 5,5 xal toplayaraq birinci yeri tutdum. Ən çətin oyunum altıncı turda oldu. Bu, mənim üçün həlledici oyun idi. Rəqibim Oğuz Abışlıya qarşı oyunda məğlub olmamalı idim və sonda heç-heçəyə nail oldum”.

Turnir çərçivəsində, həmçinin güclü idmançıların iştirakı ilə rapid üzrə pley-off yarışı da təşkil olunub. Bu turnirdə 5 beynəlxalq qrossmeyster və 3 idman ustası mübarizə aparıb. Yarışda beynəlxalq qrossmeyster Ülvi Bacarani qalib adını qazanıb. Beynəlxalq qrossmeysterlər Vüqar Rəsulov ikinci, Nicat Məmmədov isə üçüncü pillədə qərarlaşıblar.

Şahmatın sirlərini ilk müəllimi Fuad Cəfərovdan öyrənən, beynəlxalq usta İlqar Bacarani məhz ustadının sayəsində yüksək nəticələrə sahib olduğunu vurğulayıb. Qeyd edib ki, çox yaxşı təşkilatçı olan Fuad Cəfərovun ölkəmizdə nüfuzlu turnirlərin təşkilində müstəsna xidmətləri vardır. Şahmat aləmində böyük xidmətləri olan Fuad Cəfərovun əziz xatirəsi heç vaxt unudulmayacaqdır. Yarışı keçirməkdə məqsədimiz də, bu gözəl insanın xatriəsini yad etməkdir. Fuad Cəfərovun keçdiyi şərəfli ömür yolunun təbliğinə yönələn belə şahmat turnirləri həm də, ölkəmzidə idmanın bu növünün inkişafına bir təkandır.