MƏDƏNİYYƏT


Tbilisi Dram Teatrında azərbaycanlı rejissorun tamaşası oynanılıb

Tbilisi, 21 may, AZƏRTAC

Mayın 21-də Heydər Əliyev adına Tbilisi Dövlət Azərbaycan Dram Teatrında bu mədəniyyət ocağının rejissoru Turqay Vəlizadənin Anton Çexovun “Ayı” əsəri əsasında səhnələşdirdiyi eyniadlı tamaşanın təqdimatı olub.

Tamaşanın süjet xəttini Smirnov adlı mülkədardan pul almış Popovlar ailəsinin sonradan borcunu qaytara bilməməsi, mülkədarla bu ailə arasındakı münasibətlər təşkil edir.

Atasının vəfatından sonra mülkədardan aldıqları pulu qaytara bilməyən gənc qız Elena Popova müxtəlif bəhanələrlə Smirnovun təqiblərindən qaçır. Bu işdə ona qulluqçu Luka çox kömək edir. Lakin sonradan Smirnovun Elenaya aşiq olması vəziyyəti tam dəyişir. Məhəbbətin qalib gəldiyi tamaşa xoş sonluqla başa çatır.

Tamaşada əsas rolları Tbilisi Rus Dram Teatrının aktyorları Tamar Dubixidze, Dmitri Nabaxia və Heydər Əliyev adına Tbilisi Dövlət Azərbaycan Dram Teatrının aktyoru Aslan Məmmədov oynayıblar.

Tamaşa alqışlarla qarşılanıb.

Qeyd edək ki, Turqay Vəlizadə Ş.Rustaveli adına Tbilisi Dövlət Teatr və Kino Universitetinin rejissorluq ixtisası üzrə magistr dərəcəsi alan ilk azərbaycanlıdır. “Ayı” tamaşası da onun magistr dərəcəsi üzrə diplom işi olub.

T.Vəlizadə yaxın vaxtlarda Azərbaycan dilində də yeni tamaşalar hazırlayacağını bildirib.

Xətayi Əzizov

AZƏRTAC-ın xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.