İQTİSADİYYAT
Bakı-Tbilisi-Qars dəmir yolu xəttinin tikintisi ilə əlaqədar 2016-cı ilin xərclər smetası təsdiqlənib
Tbilisi, 12 fevral, AZƏRTAC
Fevralın 12-də Tbilisidə Bakı-Tbilisi-Qars dəmir yolu layihəsi üzrə Üçtərəfli Koordinasiya Şurasının 7-ci görüşü keçirilib.
Azərbaycan, Gürcüstan və Türkiyənin nəqliyyat strukturlarının rəhbərlərinin iştirak etdikləri tədbirdə ölkəmizi nəqliyyat naziri Ziya Məmmədovun rəhbərliyi ilə nümayəndə heyəti təmsil edib.
Gürcüstanın iqtisadiyyat və davamlı inkişaf naziri Dmitri Kumsişvili Bakı-Tbilisi-Qars dəmir yolu, böyük İpək yolu layihələri, eləcə də regionda həyata keçirilən digər irimiqyaslı layihələr barədə danışıb. Bildirib ki, bu layihələr dövlətlərimiz və xalqlarımız arasında əlaqələrin daha möhkəmlənməsinə, eləcə də ölkələrimizin turizm potensialının inkişafına, iqtisadi-ticarət dövriyyəmizin genişlənməsinə xidmət edir.
Ziya Məmmədov layihənin əhəmiyyətindən danışıb. Bildirib ki, bu layihə bizim ölkələrimizin iqtisadi, sosial, mədəni inkişafında mühüm rol oynayacaq. Azərbaycan Avropa ilə Asiyanı birləşdirəcək bu layihəyə böyük önəm verir. Bildirilib ki, layihə üzrə işlərin bir qədər gecikməsi dəmir yolu xəttinin keçdiyi ərazilərin mürəkkəb relyefi və dünyada baş verən maliyyə problemləri ilə əlaqədardır. Əvvəllər layihə üzrə Gürcüstanda işlərin başa çatdırılması üçün 200 milyon ABŞ dolları nəzərdə tutulurdusa da, sonradan bu rəqəm 575 milyon dollara qaldırıldı.
Nazir birgə səylər nəticəsində layihənin tikintisinin bu ilin sonuna başa çatacağına və 2017-ci ildə Bakı-Tbilisi-Qars dəmir yolunun tam istifadəyə veriləcəyinə əmin olduğunu bildirib.
Türkiyənin nəqliyyat, dəniz işləri və kommunikasiya naziri Binəli Yıldırım Türkiyənin də bu layihəyə böyük dəstək verdiyini bildirib. O deyib ki, Türkiyə layihənin tikintisinin başa çatdırılması üçün bütün səylərini səfərbər edəcək. Türkiyəli nazir dünyada baş verən proseslərin bu və digər layihələrin reallaşmasına ciddi maneə törətdiyini, dünya dövlətlərini terrorla mübarizədə birliyə çağırıb.
Sonra görüşdə Bakı-Tbilisi-Qars dəmir yolunun tikintisi, bu sahədə mövcud olan problemlər və onların həlli yolları, yolun tikintisinin tezliklə başa çatdırılması, Azərbaycan, Gürcüstan və Türkiyə arasında dəmir yolu daşınmaları və birgə əməkdaşlığın perspektivləri müzakirə olunub.
Sonda Üçtərəfli Koordinasiya Şurasının 7-ci iclasının yekun protokolu imzalanıb.
X X X
Tbilisiyə səfər çərçivəsində nəqliyyat naziri Ziya Məmmədov Gürcüstanın iqtisadiyyat və davamlı inkişaf naziri Dmitri Kumsişvili ilə görüşüb.
Görüşdə Azərbaycan ilə Gürcüstan arasında əlaqələrin perspektivləri, iqtisadiyyat, xüsusən də nəqliyyat sahəsində əməkdaşlıq məsələləri müzakirə olunub.
D.Kumsişvili Azərbaycanın Bakı-Tbilisi-Qars dəmir yolu layihəsinin reallaşmasındakı dəstəyini yüksək qiymətləndirib.
Görüşdə Bakı-Tbilisi-Qars dəmir yolunun tikintisi, bu layihə ilə əlaqədar 2016-cı ildə Azərbaycanda və Gürcüstanda görüləcək işlərə dair xərclər smetası müzakirə olunub.
Sonda BTQ-nin builki büdcəsinin təsdiqi ilə əlaqədar yekun sənəd imzalanıb.
Xətayi Əzizov
AZƏRTAC-ın xüsusi müxbiri
Tbilisi