İQTİSADİYYAT
Tbilisidə enerji layihələrinin təhlükəsizliyi və perspektivləri ilə bağlı beynəlxalq konfrans keçirilib
Tbilisi, 6 dekabr, AZƏRTAC
Tbilisidə NATO, Gürcüstanın İlya Universiteti və Litva Hərbi Akademiyasının birgə təşkilatçılığı ilə enerji layihələrinin, infrastrukturlarının təhlükəsizliyinə və perspektivlərinə həsr olunmuş beynəlxalq konfrans dekabrın 6-da başa çatıb.
İki gün davam edən tədbirdə Azərbaycan Prezidenti yanında Strateji Araşdırmalar Mərkəzinin, ADA Universitetinin, “SOCAR Gas Export-Import” şirkətinin, Bakı Dövlət Universitetinin nümayəndələri çıxış edərək “Cənub Qaz Dəhlizi”, “Şahdəniz” və digər enerji layihələrinin əhəmiyyəti, bu sahədə görülən işlər və perspektivlər, eləcə də təhlükəsizlik tədbirləri barədə ətraflı məlumat veriblər.
Tədbirdə vacib enerji layihələrinin, infrastrukturlarının təhlükəsizliyi, bu sahədə digər regionların təcrübəsinin öyrənilməsi və bizim regionda tətbiqinin mümkünlüyü, eləcə də Cənubi Qafqazın özünün təcrübəsinin daha da təkmilləşdirilməsi məsələləri diqqət mərkəzində olub.
Konfransda iştirak edən Azərbaycan nümayəndə heyəti müzakirə olunan məsələlərlə bağlı dövlətimizin mövqeyini ortaya qoyub, bəzi məsələlərə aydınlıq gətirib.
Nümayəndə heyətimizin üzvü, Bakı Dövlət universitetinin professoru Bəxtiyar Aslanbəyli AZƏRTAC-a müsahibəsində deyib ki, Azərbaycanın neft-qaz ehtiyatlarının dünya bazarlarına çatdırılmasında, bu layihələrin həyata keçirilməsində təhlükəsizliyin təmin olunması bu gün bütün dünyanın diqqət mərkəzindədir. Təbii ki, layihələrin reallaşdırıldığı hər bir dövlət öz ərazisində bu cür layihələrin təhlükəsizliyinə cavabdehdir. Baxmayaraq ki, ərazimizin 20 faizi işğal altındadır, son 20 ildə Azərbaycanda enerji layihələri ilə bağlı ciddi bir problem yaşanmayıb. Ona görə ki, Azərbaycan dövləti təhlükəsizlik məsələlərində kifayət qədər ciddi nailiyyətlər əldə edib.
B.Aslanbəyli deyib: “Layihələrin beynəlxalq əhəmiyyətini nəzərə alsaq, bu sahədə təhlükəsizliyin tək bir ölkə tərəfindən həyata keçirilməsi qeyri-mümkündür. Ona görə ki, müasir dövrdə terror və digər təhlükəsizlik məsələləri qlobal xarakter alıb. Təhlükəsizlik tədbirlərinin region dövlətləri tərəfindən birgə görülməsi vacibdir. Dövlətlərarası dialoqun genişləndirilməsi, təhlükəsizlik tədbirlərini tək-tək deyil, kollektiv şəkildə həyata keçirmələri daha məqsədəuyğundur”.
NATO-nun, İlya Dövlət Universiteti və Litva Hərbi Akademiyasının birgə təşkil etdikləri tədbirdə də bu məsələlər geniş müzakirə olunub. İki gün davam edən müzakirələrdə son illər ərzində həyata keçirilən regional layihələrin təhlükəsizliyinin təmin olunması istiqamətində görülən işlərin əhəmiyyəti, eləcə də bundan sonra təhlükəsizlik tədbirlərinin birgə davam etdirilməsinin vacibliyi qeyd olunub.
Regionun əsas enerji mənbəyi və enerji layihələrinin təşəbbüskarı olan Azərbaycanın rolu bu konfransda xüsusi qeyd edildi. Bildirildi ki, Azərbaycanın iştirakı olmadan bu cür müzakirələrin aparılması da mümkünsüzdür.
“Azərbaycan regional layihələrin həyata keçirilməsində, təhlükəsizliyin təmin olunmasında əsas aparıcı rola malikdir”, - deyə B.Aslanbəyli vurğulayıb.
Xətayi Əzizov
AZƏRTAC-ın xüsusi müxbiri
Tbilisi