İQTİSADİYYAT
Tbilisidə enerji layihələrinin və infrastrukturunun təhlükəsizliyinə həsr olunan beynəlxalq konfrans keçirilir
Tbilisi, 5 dekabr, AZƏRTAC
Dekabrın 5-də Tbilisidə NATO-nun, Gürcüstanın İlya Universitetinin və Litva Hərbi Akademiyasının birgə təşkilatçılığı ilə enerji layihələrinin, infrastrukturlarının təhlükəsizliyinə və perspektivlərinə həsr olunan beynəlxalq konfrans işə başlayıb.
Enerji layihələrinin təhlükəsizliyinin elmi əsaslarının müzakirə olunduğu tədbirdə Azərbaycan, Türkiyə, Gürcüstan, eləcə də NATO-ya üzv ölkələrin ekspertləri, müvafiq strukturlarının rəhbərləri iştirak edirlər.
Konfransda Azərbaycanı Prezident yanında Strateji Araşdırmalar Mərkəzinin (SAM), Bakı Dövlət Universitetinin və “SOCAR Corgia Gas” şirkətinin nümayəndələri təmsil edirlər.
SAM-ın əməkdaşı Gülmirə Rzayeva konfransda çıxış edərək Azərbaycan qazının Türkiyəyə və Avropaya maneəsiz çatdırılması barədə danışıb və təhlükəsizlik məsələləri ilə bağlı rəsmi Bakının mövqeyini diqqətə çatdırıb. Bildirib ki, 2018-ci ildə Azərbaycandan ixrac olunacaq 16 milyard kubmetr qazın 6 milyardı Türkiyənin, qalanı isə İtaliyadan keçməklə digər Avropa ölkələrinin tələbatının müəyyən hissəsini ödəməyə imkan yaradacaq.
Qeyd edilib ki, dünyada və regionda maliyyə böhranının yaşanmasına baxmayaraq, “Cənub” qaz dəhlizinin maliyyələşməsi ilə bağlı Azərbaycanda heç bir problem yoxdur. Azərbaycan maliyyə resurslarından uğurla istifadə etməklə bu işin də öhdəsindən gəlir. “Şahdəniz” layihəsi ilə yanaşı, digər yataqların da işlənilməsi qarşıya qoyulan məqsədlərə nail olmaqla, “Cənub” qaz dəhlizinin əhəmiyyətini daha da artıracaq.
Bakı Dövlət Universitetinin professoru Bəxtiyar Aslanbəylinin moderatorluğu ilə keçirilən panel iclasında da enerji daşıyıcılarının təhlükəsizliyi diqqət mərkəzində olub.
“SOCAR Gas Export-Import” şirkətinin direktor müavini Temur Caparidze çıxış edərək “Şahdəniz-2” layihəsinin perspektivlərindən danışıb. Bildirilib ki, bu layihə təkcə Azərbaycanın, Gürcüstanın və Türkiyənin deyil, Avropanın enerji təhlükəsizliyində mühüm rol oynayacaq. O, “Cənub” qaz dəhlizinin tikintisi ilə əlaqədar Azərbaycan və Gürcüstan ərazilərində görülən işlərdən danışıb, layihə ilə bağlı lazımi maliyyə vəsaitinin ayrıldığını diqqətə çatdırıb. Eyni zamanda, TANAP və TAP-la əlaqədar görülən işlərdən söhbət açıb.
Bildirilib ki, ümumiyyətlə “Şahdəniz-2” layihəsinin 2018-ci ildə istifadəyə verilməsi nəzərdə tutulub. İlkin mərhələdə bu layihə çərçivəsində 16 milyard kubmetr təbii qaz nəql olunacaq. Bunun 6 milyardı Türkiyənin ehtiyaclarının ödənilməsinə sərf olunacaq, qalanı isə İtaliya və digər Avropa ölkələrinə çatdırılacaq. Layihənin tam gücü ilə işləməsi 2020-ci ildə nəzərdə tutulub. Əlavə resurslar əldə olunduqdan və işlənildikdən sonra bu dəhliz ilə təbii qazın nəqlinin həcmi 30 milyard kubmetrə çatdırıla bilər. Bu layihənin tam reallaşdırılması üçün 28 milyard dollar investisiya nəzərdə tutulub və bunun da 15 milyardı artıq istifadə edilib.
Sonra məruzə ətrafında çıxışlar olub. T.Caparidze iştirakçıların suallarını cavablandırıb.
Konfrans işini sabah davam etdirəcək.
Xətayi Əzizov
AZƏRTAC-ın xüsusi müxbiri
Tbilisi