CƏMİYYƏT


Tərtər və Ağstafa rayonlarında qumbaralar, top mərmisi, qrad raketin mühərrik hissəsi aşkarlanıb

A+ A

Bakı, 30 iyun, AZƏRTAC

Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) mütəxəssisləri iyunun 30-da bir ev və həyətyanı sahəyə, bir fermaya, 5 əkin sahəsinə, 13 partlayış yerinə baxış keçiriblər. Nəticədə beş partlamamış hərbi sursat aşkarlanaraq götürülüb. Gün ərzində 19 min 780 kvadratmetr ərazi təmizlənib.

Tərtər rayonunun Çaylı kəndində iki partlamamış hərbi sursat, o cümlədən “9M22U” qrad raketinin mühərrik hissəsi, Borsunlu kəndində 1 partlamamış hərbi sursat - F-1 əl qumbarası, Seydimli kəndində 100 millimetrlik top mərmisi, Ağstafa rayonunun Eynallı kəndində isə 73 millimetrlik “PQ-9” tank əleyhinə qumbara aşkar edilərək götürülüb.

ANAMA-nın mətbuat xidmətindən AZƏRTAC-a bildiriblər ki, Ağdam rayonunun Qaradağlı kəndində, Füzuli rayonunun Horadiz şəhərində əkin sahələrində partlayış yerlərinə baxış keçirilib. Bu zaman partlamamış hərbi sursat aşkar edilməyib. Nəticədə 8180 kvadratmetr ərazi yoxlanılıb.

Ümumilikdə agentlik tərəfindən aprelin 7-dən iyunun 30-dək Zərdab, Tərtər, Ağcabədi, Ağdam, Bərdə, Füzuli, Goranboy, Tovuz, Qazax, Ağstafa, Samux, Şəmkir, Cəlilabad, Ucar, Astara rayonlarında, Mingəçevir, Sumqayıt və Bakı şəhərlərində 620 ev və həyətyanı sahəyə, 2 hərbi hissəyə, 2 kənd qəbiristanlığına, 5 kənd orta məktəbinə, bir tibb məntəqəsinə, 28 fermaya, əkin sahələrinə və bir şərab zavodu ərazisinə baxış olub. Nəticədə 1562 partlamamış hərbi sursat, piyada əleyhinə 14, o cümlədən üç “POMZ-2”, bir “OZM-72” və tank əleyhinə 8 mina aşkar olunaraq zərərsizləşdirilib.

Hazırda agentlik tərəfindən yaradılmış xüsusi təyinatlı mobil çevik qruplar minaaxtaran itlərlə təmas xəttinin yaxınlığındakı kəndlərdə evlərin, məktəblərin və digər obyektlərin yerləşdiyi ərazilərdə əməliyyatları davam etdirir.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.