CƏMİYYƏT


Tibb Universitetində rezidentlərin yekun attestasiyasının təşkilinə dair müzakirələr aparılıb

A+ A

Bakı, 24 oktyabr, AZƏRTAC

Azərbaycan Tibb Universitetində (ATU) rezidentlərin yekun attestasiyasının təşkilinə dair geniş müzakirələr aparılıb.

Universitetin mətbuat xidmətindən AZƏRTAC-a bildirilib ki, tədbirdə çıxış edən rektor Gəray Gəraybəyli rezidentlərin yekun attestasiyasının təşkili ilə bağlı müvafiq hazırlıq işlərinin görüldüyünü açıqlayıb. Qeyd edilib ki, səhiyyə naziri Oqtay Şirəliyev rezidentlərin yekun attestasiyasının keçirilməsi barədə əmr imzalayıb. Qaydalara uyğun olaraq, yekun attestasiya 2 mərhələdə aparılır. Bunlardan birincisi – test, ikincisi isə praktiki vərdişlərin mənimsənilməsinə görə müxtəlif kliniki halların araşdırılması mərhələsidir. Əmrə əsasən, yekun attestasiyanın birinci mərhələsi oktyabrın 25-də, ikinci mərhələsi isə 27-də və 28–də keçirilməlidir.

Rektor vurğulayıb ki, bu il ilk dəfə rezidenturada həkim mütəxəssis hazırlığı aparılan bütün ixtisaslar üzrə yekun attestasiya keçiriləcək. Attestasiyanın birinci mərhələsi Azərbaycan Tibb Universitetinin virtual test mərkəzində, ikinci mərhələ isə universitetin müvafiq klinikalarında keçiriləcək.

Bildirilib ki, əvvəlki illərdə keçirilən yekun attestasiyası zamanı bəzi çatışmazlıqlar qeydə alınıb. Xüsusilə test suallarının və təcrübi bacarıqların hazırlanmasında bəzi ixtisaslar üzrə tələbatlar lazımi səviyyədə olmayıb. Bu barədə Səhiyyə Nazirliyindən də iradlar bildirilib. Bu çatışmazlıqların aradan qaldırılması məqsədilə xeyli işlər görülüb, ayrı-ayrı ixtisaslar üzrə test sualları və təcrübi bacarıqlara dair suallar yenilənib.

Tədbirdə qeyd olunub ki, rezidenturaya ilk qəbul 2011-ci ildə başlayıb. 2013-cü ildə təhsil müddəti 2 il olan ixtisaslar üzrə, 2014-cü ildə təhsil müddəti 2 və 3 il olan ixtisaslar üzrə, 2015-ci ildə təhsil müddəti 2, 3 və 4 il olan ixtisaslar üzrə yekun attestasiyası keçirilib. Bu il isə əlavə olaraq təhsil müddəti 5 il olan cərrahi yönümlü ixtisaslar üzrə də yekun attestasiyası keçiriləcək. Bu il bütün ixtisaslar üzrə Bakı şəhərində olan bazalardan 356 nəfər yekun attestasiyasına buraxılıb ki, onların da ayrı-ayrı ixtisaslar üzrə sayı təhsil müddəti 2 il olan 8 ixtisas üzrə 68 nəfər, təhsil müddəti 3 il olan 9 ixtisas üzrə 81 nəfər, təhsil müddəti 4 il olan 12 ixtisas üzrə 110 nəfər, təhsil müddəti 5 il olan 9 ixtisas üzrə 55 nəfərdir. Bunlardan 115 nəfəri ATU-nun məzunlarıdır. Bundan əlavə, 2015-ci ildə attestasiyaya buraxılmayan 16 nəfər və attestasiyanın I və ya II mərhələlərindən keçə bilməyən 13 nəfər də bu il rezidentlərin yekun attestasiyasında iştirak edəcəklər.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.