İQTİSADİYYAT


Tokioda Azərbaycan haqqında yeni bələdçi nəşrin təqdimatı keçirilib

A+ A

Tokio, 19 oktyabr, AZƏRTAC

Tokioda ölkəmiz haqqında “Azərbaycan - Land of fire” adlı yeni bələdçi nəşrin təqdimatı keçirilib. Tədbirdə yapon iş adamları ilə yanaşı, bu ölkədəki Azərbaycan diasporunun üzvləri, kütləvi-informasiya vasitələrinin nümayəndələri iştirak ediblər.

Nəşrin müəllifi, “Bross Border Club” şirkətinin prezidenti Kazuyası İşida bildirib ki, Azərbaycan Respublikasının Mədəniyyət və Turizm Nazirliyinin və ölkəmizin Yaponiyadakı səfirliyinin köməyi ilə yapon dilində buraxılan nəşrin məqsədi yapon turizm həvəskarlarını regionun lider dövləti olan Azərbaycan haqqında daha ətraflı məlumatlandırmaqdır. Azərbaycanın dövlət müstəqilliyinin bərpasının iyirmi beşinci ildönümünü qeyd etdiyini vurğulayan K.İşida ölkəmizin bu bayrama böyük uğurlarla gəldiyini bildirib. Qeyd edib ki, sürətli və dinamik inkişafı ilə bütün dünyanın diqqətini özünə cəlb edən Azərbaycan füsunkar təbiəti, tarixi abidələri, zəngin mədəniyyəti və müasir tikililəri ilə turizm həvəskarlarını özünə cəlb edir. Müəllif əmin olduğunu bildirib ki, yüksək poliqrafiq keyfiyyəti və geniş məlumatları ilə seçilən “Azərbaycan - Land of fire” nəşri yapon iş adamlarının və turizm həvəskarlarının ölkəmiz haqda ətraflı məlumatlar əldə etməsinə şərait yaradacaq.

“Yaponiya-Azərbaycan Dostluq Mərkəzi”nin sədri Xəlil Kələntər çıxış edərək tədbirə toplaşan çoxsaylı iş adamlarına minnətdarlığını bildirib. Qeyd edib ki, müstəqilliyinin 25 illiyini böyük nailiyyətlərlə qeyd edən Azərbaycan mühüm iqtisadi, siyasi və mədəni uğurlar qazanıb. Ölkəmizin bütün dünyada etibarlı tərəfdaş kimi tanındığı, burada xarici investisiyaların tətbiqi üçün böyük imkanlar yaradıldığı xüsusi vurğulanıb. Bildirilib ki, Prezident İlham Əliyevin ardıcıl siyasi xətti sayəsində bu gün Azərbaycan bütün dünyada sabitliyi və hərtərəfli inkişafı ilə tanınır. Hazırda regionda lider dövlətə çevrilən Azərbaycan öz sürətli inkişafı ilə yanaşı qlobal inteqrasiyası, multikulturalizmi, tolerantlıq və mədəni müxtəlifliyi ilə dünyanın diqqətini cəlb edir.

Tədbirdə yapon iş adamlarını maraqlandıran konkret istiqamətlər üzrə fikir mübadiləsi aparılıb.

Vüqar Ağayev

AZƏRTAC-ın xüsusi müxbiri

Tokio

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.