İQTİSADİYYAT


“Total”: Avropa İnvestisiya Bankı “Abşeron” layihəsinin maliyyələşdirilməsinə maraq göstərir

A+ A

Bakı, 3 fevral, AZƏRTAC

Avropa İnvestisiya Bankı “Abşeron” layihəsinin maliyyələşdirilməsinə maraq göstərir.

Energetika Nazirliyindən AZƏRTAC-a bildirilib ki, bu fikirlər energetika naziri Natiq Əliyevin “Total” şirkətlər qrupunun Avropa və Mərkəzi Asiya regionunda kəşfiyyat və hasilat üzrə baş vitse-prezidenti Maykl Borrelin rəhbərlik etdiyi nümayəndə heyəti ilə keçirdiyi görüşdə səsləndirilib.

M.Borrel Azərbaycanın “Total” üçün mühüm biznes marağı kəsb edən ölkə olduğunu nəzərə alaraq, şirkətlər qrupunun Kontinental Avropa və Xəzər regionu üzrə yeni təyin edilmiş vitse–prezidenti Bernard Clementi şəxsən təqdim etmək üçün ölkəmizə səfər etdiyini bildirib.

Energetika naziri N.Əliyev yeni təyinatdan məmnunluğunu ifadə edərək, “Total” rəhbərləri ilə mütəmadi keçirilən görüşlərin əməkdaşlıq əlaqələrinin möhkəmləndirilməsinə və birgə layihələrin uğurla həyata keçirilməsinə xidmət etdiyini deyib. O, qlobal enerji şirkəti “Total”ın Azərbaycanda 20 illik fəaliyyəti nəticəsində əldə edilmiş nailiyyətlərdən danışıb. Əməkdaşlığın davam etdirilməsi üçün böyük imkanların mövcudluğunu və bunun hər iki tərəf üçün faydalı olacağını qeyd edib.

M.Borrel ötən ilin noyabr ayında SOCAR və “Total” arasında imzalanmış “Abşeron” layihəsinin işlənmə proqramını tənzimləyən prinsiplər haqqında çərçivə sazişini xatırladaraq, görülən və planlaşdırılan işlərdən danışıb. “Total”ın yaxın illərdə “Abşeron” yatağında hasilata başlamaq üçün tərəfdaşları ilə birgə səylərini artırdığını vurğulayaraq, yataqdan ilk qazın nəzərdə tutulduğu vaxtda alınması üçün Azərbaycan hökumətinin dəstəyinin zəruriliyini diqqətə çatdırıb. O, həmçinin “Abşeron” layihəsinin maliyyələşdirilməsinə Avropa İnvestisiya Bankının maraq göstərdiyini bildirib.

N.Əliyev “Abşeron” qaz-kondensat yatağının “Cənub Qaz Dəhlizi”nin imkanlarını daha da artırmaqla mövqeyini gücləndirəcəyini deyərək, “Total”ın Məşvərət Şurasının iclasında iştirakının vacibliyini qeyd edib.

Energetika naziri həmçinin “Total” şirkətinin Azərbaycanın digər neft-qaz layihələrində, o cümlədən “Babək” perspektiv sahələrinin işlənməsi layihəsində də iştirakının səmərəli olacağını deyib.

N.Əliyev Avropa və Xəzər regionu üzrə təyin edilmiş vitse–prezident Bernard Clementiyə də gələcək fəaliyyətində Azərbaycanın Energetika Nazirliyinin lazımi dəstək verəcəyini bildirib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.