Tovuz, 30 iyul, AZƏRTAC

Cari ildə Şəmkir, Gədəbəy, Tovuz, Qazax, Ağstafa rayonları üzrə 26614 hektar sahədə kartof əkilib ki, onunda 7668 hektarı Tovuzun payına düşüb. Hava şəraitinin yağmurlu keçməsi kartofun məhsuldarlığına çox yaxşı təsir göstərib. Tovuzlu fermerlər bu il sahələrdən rayon üzrə 170 min tona yaxın kartof götürəcəklərinə əmindirlər.

Tovuz Ərazi Kənd Təsərrüfatı İdarəsinin rəisi Canpolad Qəhrəmanov AZƏRTAC-a müsahibəsində bildirib ki, rayon iqtisadiyyatında aparıcı sahələrdən birini kartofçuluq tutur. Təkcə ötən il regionda 415 min 534 ton kartof istehsal edilmişdisə, bunun 155 min 999 tonu Tovuz rayonunun payına düşüb. Respublikada istehsal olunan kartofun 12-15 faizi Tovuz rayonunun payına düşür.

Rayonda ən çox “Sevinc”, “Əmiri-600”, “Ağçiçək”, “Nevsk” sortları becərilir. Eyni zamanda, Hollandiyadan gətirilən “Arenda”, “Simfoniya”, “Aqavi” sortları da üstünlük təşkil edir. Aqrotexniki tədbirlər optimal müddətdə həyata keçirilərsə, kartofçuluqla məşğul olan fermerlər istehsal şəraitində yaz əkinindən 25-30 ton, yay əkinindən isə 15-20 ton kartof götürə bilərlər.

C.Qəhrəmanov deyir ki, bir ildə kartofdan iki dəfə məhsul götürmək mümkündür. Kartofun yay əkini üçün əlavə torpaq sahəsi ayrılmasına ehtiyac yoxdur. Fermerlərin bir çoxu yazlıq bitkiləri yığıb qurtardıqdan sonra torpaqdan istifadə etmirlər. Həmin torpaqlar iyul ayında şumlanır və avqustun ikinci on günlüyündə kartofun yay əkini üçün hazır vəziyyətə gətirilir. Beləliklə, respublikanın suvarılan bölgələrində torpaqdan təkrar istifadə etməklə, kartof bolluğu yaratmaq mümkündür. Fermerlər bu imkandan istifadə edərək əlavə gəlir götürə bilərlər.

Dövlət tərəfindən kənd təsərrüfatının inkişafının dəstəklənməsi, təkrar əkinlərə, yanacaq və motor yağlarına görə maddi yardımın verilməsi ikinci dəfə əkin üçün gözəl imkan yaradır.

Rayonda torpaq sahələrinin əsas hissəsini suvarılan torpaqlar təşkil etdiyindən yay aylarında su çatışmazlığı yaranır. Bu problemləri aradan qaldırmaq üçün Tovuz dəryaçası yaradılıb və dəryaçada ehtiyat su toplanıb.

Kartofçuluqla məşğul olan fermer Fazil Abbasov isə söhbətində mövsümü uğurla başa vurduğunu bildirərək dedi ki, yazın gəlişi ürək açan olub. Səpindən sonra yaz yağışlarının normaya uyğun olması suvarmasız çıxış almağa şərait yaradıb: “Təsəvvür edin ki, ötən il yağış az oldu. Çıxış almaq üçün sahələri iki-üç dəfə suvarmağa məcbur qaldıq. Çıxışdan sonra isə qaysaq almaq üçün əlavə işlər gördük. Bütün bunlar məhsulun maya dəyərinə təsir etdi. Ona görə də gəlirimiz bir qədər az oldu. Ancaq bu il həmin problemləri yaşamadıq. Məhsulum da boldur. Orta məhsuldarlıq 25 tondan yuxarıdır”.

Toxumu əsasən Rusiyanın Tümen, Sverdlovsk, Kemerovo vilayətlərindən gətirdiyini deyən fermer bildirib ki, son illər aparılan təcrübəyə görə rayon torpaqlarında Kemerovo vilayətindən gətirilən toxumlar yaxşı yetişir. “Şəxsən mən son 5 ildə yalnız həmin vilayətdən gətirilən toxumlardan istifadə edirəm. Vilayətin bir neçə toxumçuluq təsərrüfatları ilə sıx əlaqəmiz var. Həmin toxumu bizim dağlıq ərazilərdə əkib növbəti mövsümdə istifadə etmək mümkündür. Bu il belə bir təcrübə apardım. Gədəbəy rayonunda 2 hektar torpaq sahəsini icarəyə götürüb Kemerovodan gətirdiyim toxumdan əkmişəm. Nəticə yaxşı olsa, bu sahəni artırmaq istəyirəm”, - deyə F.Abbasov bildirib.