İQTİSADİYYAT


Tümen vilayətinin qubernatoru Vladimir Yakuşevin iştirakı ilə “Caspian European Club”un Bakıda biznes-forumu keçirilib

A+ A

Bakı, 2 noyabr, AZƏRTAC

Noyabrın 2-də Rusiya Federasiyasının Tümen vilayətinin qubernatoru Vladimir Yakuşevin iştirakı ilə “Caspian European Club”un (Caspian Business Club) Bakıda biznes-forumu təşkil olunub.

AZƏRTAC xəbər verir ki, Tümen vilayətinin 30-a yaxın şirkətinin və “Caspian European Club” (Caspian Business Club) şirkətlərinin iştirak etdikləri biznes-forumda Azərbaycan və Tümen vilayətlərinin şirkətləri arasında iqtisadiyyatın müxtəlif sahələri üzrə əməkdaşlığın perspektivləri müzakirə olunub.

Biznes-forumda çıxış edən Tümen vilayətinin qubernatoru Vladimir Yakuşev Azərbaycanla Rusiya Federasiyası arasında əməkdaşlığın yüksək səviyyədə olduğunu, konstruktiv əməkdaşlığa əsaslanan tərəfdaşlıq əlaqələrinin arzuolunan şəkildə təşkil edildiyini diqqətə çatdırıb. O, Azərbaycan şirkətlərini dialoqda iştirak etməyə və iki ölkənin sahibkarları arasındakı problemləri həll etməyə dəvət edib.

Forumun iştirakçılarını son dövrdə regionda həyata keçirilən islahatlar barədə məlumatlandıran V.Yakuşev Tümen vilayətinin həm neft-qaz, həm də qeyri-neft sektorunda Azərbaycanla əməkdaşlığı genişləndirməkdə maraqlı olduğunu qeyd edib.

Tümen vilayətində iş adamları üçün yaradılmış imkanlar barədə ətraflı məlumat verən qubernator əməkdaşlığın, həmçinin iki dövlətin biznes qurumları arasındakı tərəfdaşlıq əlaqələrinin səviyyəsini yüksəltmək məqsədilə sıralarında yüzlərlə xarici və yerli şirkəti cəmləmiş “Caspian European Club”la (Caspian Business Club) əməkdaşlığı gələcəkdə də davam etdirməyə hazır olduğunu diqqətə çatdırıb.

“2014-cü ilədək enerji daşıyıcılarının qiyməti yüksək olub. Lakin hazırda bazarda tələb və təklif tamam başqa cürdür. İqtisadiyyatı yeni şərtlər daxilində inkişaf etdirməkdən ötrü indi biz işləməliyik. İqtisadiyyatlarımız bir-birinə çox bənzəyir. Bakıya böyük heyətlə səfər etməyimizin səbəbi də məhz budur. Biz bu gün öz investisiya potensialımızı nümayiş etdiririk”, - deyə qubernator qeyd edib.

“Biz həm neft-qaz, həm də neft xidməti sahəsi üzrə səmərəli əməkdaşlıq edə bilərik. Biznes nümayəndələri təmas nöqtəsini tapmalı, biz isə onlar üçün münbit şərait yaratmalıyıq”, - deyə o, çıxışına davam edib.

Tümen vilayətinin qubernatorunun müavini Vadim Şumkov vilayətin potensialı barədə məlumatı biznes-forum iştirakçılarının nəzərinə çatdırıb. Onun sözlərinə görə, sənaye istehsalı indeksi 2006-cı ildən bəri il ərzində 10 faizdən çox artıb. “Vilayətə on il ərzində yatırılan investisiyaların həcmi 4 dəfə, 2015-ci ildə ümumi regional məhsul 898 milyard rubldan artıq olub. On il ərzində isə ümumi regional məhsul 2 dəfə artıb. Tümen vilayəti RF-nin 2016-cı il Milli reytinqində region liderlərinin top 5-liyinə daxil olub”, - deyə qubernator qeyd edib və vilayətdə həyata keçirilən real investisiya layihələrini təqdim edib.

Biznes-forum çərçivəsində şirkətlərin təklifləri dinlənilib, biznesmenlərin qarşılaşdıqları problemlər müzakirə olunub, onların həlli yolları nəzərdən keçirilib. Tümen vilayətinin nümayəndələri həmçinin biznes-forumda iştirak edən şirkətlərin suallarını cavablandırıblar.

Əməkdaşlığın perspektivli istiqamətləri qismində neft-qaz, maşınqayırma, səhiyyə, təhsil və turizm sahələri, neft-qaz xidməti və neft emalı üzrə birgə layihələr qeyd edilib. İnşaat sahəsində təcrübə mübadiləsi və qarşılıqlı ticarətin genişləndirilməsi imkanları gözdən keçirilib.

Biznes-forumda çıxış edən SOCAR-ın strateji inkişaf üzrə vitse-prezidenti Tofiq Qəhrəmanov şirkətin fəaliyyəti və strukturu barədə iştirakçılara məlumat verib. O, SOCAR-ın kompleks inkişafı haqda informasiya təqdim edib və Tümen vilayətinin biznes dairələri ilə əməkdaşlığa hazır olduğunu bildirib.

“SOCAR Russia” və “SOCAR Polymer”in rəhbəri Fərid Cəfərov Azərbaycanla Rusiya arasında neft-qaz sahəsi üzrə əməkdaşlığın perspektivləri barədə ətraflı məlumat verib.

Biznes-forumda çıxış edən “Caspian European Club” (Caspian Business Club) sədrinin birinci müavini və baş icraçı direktoru Telman Əliyev fəal əməkdaşlığa və biznesmenlərə dəstəyə görə Tümen vilayətinin qubernatoru Vladimir Yakuşevə minnətdarlığını bildirib.

T.Əliyev 2016-cı il dekabrın 7-də Bakıda keçiriləcək IV Beynəlxalq Caspian Energy Forum – 2016 (www.caspianenergyforum.com) barədə məlumatı iştirakçıların diqqətinə çatdırıb. O, biznes nümayəndələrini Azərbaycanın, Xəzər-Qara dəniz və Baltik regionu ölkələrinin dövlət strukturlarının, nazirlik, komitə və qurumlarının rəhbərlərinin, Azərbaycan Respublikasında akkreditə olunmuş diplomatik və beynəlxalq missiya nümayəndələrinin, həmçinin nəhəng beynəlxalq şirkət başçılarının iştirak edəcəyi forumun işində fəal iştirak etməyə dəvət edib. Hazırda IV Beynəlxalq Caspian Energy Forum – 2016-da iştirak etmək üçün dünyanın 15 ölkəsindən 200-dən çox nümayəndənin qeydiyyatdan keçdiyi vurğulanıb.

O qeyd edib ki, “Caspian European Club” (Caspian Business Club) 2002-ci ilin iyununda Xəzər-Qara dəniz regionunda fəaliyyət göstərən nəhəng neft-qaz şirkətlərinin dəstəyi ilə yaradılıb. “Caspian European Club”un (Caspian Business Club) sədri Azərbaycan Respublikasının Prezidenti İlham Əliyevdir.

T.Əliyevin sözlərinə görə, yarandığı ilk gündən “Caspian European Club” (Caspian Business Club) neft sahəsindən əldə olunan gəlirlərin qeyri-neft sektorunun inkişafına cəlb edilməsinə kömək edir. Sıralarında 5 mindən artıq şirkət və təşkilatı birləşdirən “Caspian European Club” (Caspian Business Club) dünyanın 50 ölkəsində fəaliyyət göstərir və dövlət qurumları ilə özəl sektor arasında dialoqa dəstək istiqamətində fəal iş aparır.

Biznes-forumda Vladimir Yakuşevə “Caspian European Club” (Caspian Business Club) fəxri üzv sertifikatı təqdim olunub. Tədbirdə şirkət rəhbərləri və səfirlər, bir sıra diplomatik qurumların və beynəlxalq təşkilatların nümayəndələri iştirak ediblər.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.