Bakı, 27 sentyabr, AZƏRTAC

Azərbaycan Respublikası Prezidentinin 1 sentyabr 2016-cı il tarixli Sərəncamına əsasən hər il sentyabrın 27-si Azərbaycanda “Turizm işçiləri günü” peşə bayramı kimi qeyd ediləcək. Bu günün təsis olunması dövlət tərəfindən turizm sənayesinə və bu sahədə çalışan insanlara böyük diqqətin nəticəsidir.

AZƏRTAC xəbər verir ki, bu sözləri sentyabrın 27-də keçirilən mətbuat konfransında mədəniyyət və turizm naziri Əbülfəs Qarayev deyib. Azərbaycanın dünya turizm bazarında mövqeyindən söz açan nazir qeyd edib ki, ölkəmizin turizm sənayesinin inkişafı dünya turizm sənayesinin ayrılmaz tərkib hissəsidir. Azərbaycan bir sıra beynəlxalq turizm təşkilatlarının üzvüdür. Prezident İlham Əliyevin turizm sahəsinə qayğısı beynəlxalq ictimaiyyət tərəfindən yüksək qiymətləndirilir.

Ə.Qarayev bildirib ki, turizmin qeyri-neft sənayesində özünəməxsus yer tutması ölkəmizdə bu sahənin yeni nailiyyətlər əldə etməsinə səbəb olub. Bu sahə dövlətimizin prioritet istiqamətlərindən birinə çevrilib. Turizm bir sıra sahələri əhatə edir. Bu sahələrin inkişafı üçün dövlət strukturları birgə çalışmalıdır. Biz, artıq dövlətimizin başçısının müvafiq sərəncamlarından irəli gələn məsələlərin icrasına başlamışıq. Proses davam edir. Yarım ilin statistikasına görə, viza rejiminin sadələşdirilməsi nəticəsində ərəb ölkələrindən Azərbaycana gələn turistlərin sayı 8 dəfə çoxalıb. Digər ölkələrdən də turistlərin sayının artmasında maraqlıyıq. Azərbaycanda başqa bir yenilik - “Taxfree” sisteminin tətbiq edilməsidir. Bu sistemin tətbiqi müsbət nəticə verib.

Nazir vurğulayıb ki, turizmin keyfiyyətinin təkmilləşdirilməsi əsas istiqamətlərdəndir. Turizm Şurasının yaradılması da turizm sənayesinin inkişafına müsbət təsir göstərəcək. Şura turizm sahəsinin inkişafı ilə bağlı Mədəniyyət və Turizm Nazirliyi ilə yanaşı, digər dövlət qurumları arasında əlaqələndirmə funksiyasını yerinə yetirəcək. Şoppinq festivallarının keçirilməsi ilə bağlı məsələyə toxunan nazir deyib: “Bakıda bu festivalların keçirilməsi üçün hər cür şərait yaradılıb. Belə festivallar ölkənin daxili maliyyə dövriyyəsinə güclü təkan verəcək. Biz təkliflər hazırlamışıq və aidiyyəti qurumlara təqdim etmişik. Bu festivalları 10-15 gün müddətində ildə iki dəfə keçirməyi düşünürük”.

Turizm sahəsində peşə məktəblərinin artırılmasının vacibliyindən danışan nazir qeyd edib ki, bu gün turizm sənayesində 30 min işçi çalışır. Ə.Qarayevin sözlərinə görə, Dubay, Rusiya, Almaniya ilə yanaşı digər ölkələrdə də turizm nümayəndəliyinin açılması planlaşdırılır. O deyib: “Hazırkı nümayəndəliklər uğurla fəaliyyət göstərir. Azərbaycan “Açıq səma” prinsipinə əsaslanır. AZAL-la daim əməkdaşlıq edirik. Əməkdaşlıq çərçivəsində yeni reyslər və aviaşirkətlər açılmasını təşkil edəcəyik”.

Nazir bildirib ki, sərhəd məntəqələrində buraxılış sisteminin təkmilləşdirilməsi üçün tədbirlər görülür: “Artıq 3 ulduzlu otellərin tikilməsinə böyük ehtiyac yaranıb. Bu istiqamətdə digər qurumlarla birgə layihələr həyata keçirilir. Termal turizm öz axarına düşüb. Qış mövsümündə daimi turizmin təmin edilməsi üçün layihələr həyata keçirilir. Dövlət Gömrük Komitəsi ilə müzakirələr aparılır. Ölkəyə gələn turistlərin rahatlığını təmin etmək üçün birgə işlər görüləcək”.

Mədəniyyət və turizm naziri Ə.Qarayev, həmçinin regionlarda otel və mehmanxanalardakı vəziyyətə toxunaraq qeyd edib ki, bu il istirahət mövsümündə İsmayıllı və Şamaxıda otellərdə yerlər 92, Göygöldə 95-100, Qəbələdə 100, Lerikdə 90 faiz tutulub. Hələlik Mingəçevir və Xızıda bu il yerlər tam dolmayıb. Məndə olan məlumata görə, bu rəqəm 30 faizdir”.