DÜNYA
Türkiyədə antiterror əməliyyatları davam edir
İstanbul, 1 avqust, AZƏRTAC
Türkiyə Silahlı Qüvvələrinin qırıcıları Kürd Fəhlə Partiyasının (PKK) təlim məntəqələrini, silah anbarlarını və sığınacaq yerlərini bombalamaqda davam edir. Bundan başqa, ordu hissələri və polis qüvvələri quruda genişmiqyaslı antiterror əməliyyatları keçirir.
PKK isə Türkiyədəki terrorçu fəaliyyətinin əhatəsini genişləndirməkdə davam edir. Antiterror əməliyyatları nəticəsində PKK-nın itkiləri barədə verilən məlumatlar bu terrorçu təşkilatın Türkiyəyə qarşı düşmənçilik mövqeyinin nə qədər dəhşətli olduğunu bir daha təsdiq edir. Rəsmi məlumatlara əsasən demək olar ki, son illər PKK rəhbərliyi ilə aparılan danışıqlar heç bir müsbət nəticə verməyib. Başqa sözlə, PKK və onun siyasi qolu sayılan HDP Türkiyə tərəfinin mövcud problemi dinc yolla həll etmək istəyinə lazımı dəyər verməyib. Silahlardan imtina etmək barədə illərdən bəri PKK-ya ünvanlanmış müraciətlər nəticəsiz qalıb.
2013-cü ilin martından bəri hökumət qüvvələrinə könüllü təslim olan terrorçuların sayı 800 nəfərə yaxınlaşmaqdadır. Bundan başqa, son günlər Türkiyə qırıcılarının bombardmanları nəticəsində 260-dən artıq terrorçu məhv edilib, 400 nəfəri isə yaralanıb. Quruda aparılan antiterror əməliyyatlarında da çox sayda terrorçunun məhv edildiyi bildirilir. Bütün bunlara baxmayaraq demək olar ki, son on gündə Türkiyədə hər gün PKK tərəfindən qan tökülür. Ordu hissələri, polis məntəqələri, məmurlar, sənaye obyektləri, qatarlar və dəmir yolları, ictimai nəqliyyat, yük maşınları PKK-nin əsas hədəfinə çevrilib.
Terrorçu Kürd Fəhlə Partiyasının son günlər həyata keçirdiyi çoxsaylı terror aktlarının miqyası göstərir ki, 2013-cü ilin martından bəri davam edən danışıqlardan istifadə edən PKK gücünü xeyli artırıb. Proseslər göstərir ki, PKK ötən dövrdə Türkiyənin yaşayış məntəqələrində kifayət qədər canlı qüvvə, silah və sursat, hətta yaxın məsafələrdəki hədəflər üçün nəzərdə tutulan raketlər yerləşdirə bilib. İyulun 31-də Tuncelidə polis maşınının keçdiyi körpü uzaqdan idarə olunan mina ilə partladılıb. Munzur çayına düşən zirehli maşındakı polislər yaralanıb. Haqqari bölgəsindəki jandarma məntəqəsi Şimali İraq tərəfində yerləşən PKK düşərgəsindən raket və iriçaplı silahlarla atəşə tutulub. Mardində bir qrup terrorçu avtomobil yolunu bağlayaraq polis maşınlarını atəşə tutub. Qarsın Kağızman rayonunda terrorçular tərəfindən 20-yə yaxın yük avtomobili yandırılıb. Kağızman-İğdır-Ərzurum istiqamətində hərəkət edən avtobusu girov götürən terrorçular sərnişinlərin mobil telefonlarını alandan sonra onları azad buraxıblar. Qars valiliyinin məlumatına görə, təkcə Kağızman rayonunda 25 nəfərə qədər terrorçu var.
Terrorçu Kürd Fəhlə Partiyasının fəaliyyətinin çox az bir hissəsinə dair yuxarıda sadaladığımız faktlar deməyə əsas verir ki, Türkiyənin təhlükəsizliyinin qorunması naminə yeganə çıxış yolu PKK ilə mübarizəni sonadək davam etdirməkdir. Bu mübarizədə ölkə əhalisi, o cümlədən ictimai-siyasi təşkilatlar Türkiyə hökumətinə dəstəyini əsirgəmir.
Sabir Şahtaxtı
AZƏRTAC-ın xüsusi müxbiri
İstanbul