MƏDƏNİYYƏT
Türkiyədəki son hadisələr turistlər üçün hər hansı problem yaratmır və turizm sektoruna təsir etmir VİDEO
Bakı, 12 avqust, Nihad Budaqov, AZƏRTAC
Son dövrlərdə Türkiyədə baş verən siyasi proseslər və uğursuz alınan hərbi çevriliş cəhdi qardaş ölkənin turizm sektoruna təsir etməyib. Ölkədə elan edilən fövqəladə vəziyyət isə təbii prosesdir, bu turistlər üçün hər hansı problem yaratmır və ümumilikdə turizm sektoruna təsir etmir.
AZƏRTAC xəbər verir ki, bu barədə Türkiyənin ölkəmizdəki səfirinin, “Azərbaycan Hava Yolları”, “Türk Hava Yolları”nın və turizm şirkətlərinin nümayəndələrinin iştirakı ilə Türkiyədə turizmin inkişafı vəziyyəti ilə bağlı keçirilən müzakirələrdə danışılıb.
Türkiyənin Azərbaycandakı səfiri İsmail Alper Coşkun deyib ki, iyulun 15-də Türkiyə müasir tarixinin ən böhranlı gününü yaşadı və bu ciddi təhlükə idi. Lakin artıq bu çətin günlər geridə qalıb. Ölkədə tam sabitlik və əmin-amanlıq hökm sürür.
Səfir bildirib ki, bu hadisələr Türkiyənin turizm sektoruna təsir etməyib. Ölkədə elan edilən fövqəladə vəziyyət təbii prosesdir. Bu turistlər üçün hər hansı problemlər yaratmır və ümumilikdə turizm sektoruna təsir etmir. Son günlərə Türkiyəyə səfər edən turistlərin sayındakı artım da bunun əyani göstəricisidir.
“Azərbaycan Hava Yolları” QSC-nin vitse-prezidenti Eldar Hacıyev bildirib ki, hazırda AZAL Bakı-Antalya-Bakı istiqamətində gün ərzində 4 reys həyata keçirir. İyulda Bakıdan Antalyaya səfər edən azərbaycanlıların sayı iki dəfə artıb. Türkiyənin digər məşhur turizm bölgələri olan Bodruma və İzmirə son dövrlərdə səfər edən azərbaycanlıların da sayında artım müşahidə olunub.
E.Hacıyev qeyd edib ki, hazırda Heydər Əliyev Beynəlxalq Aeroportundan gündə ən çox – 9 aviareys məhz İstanbula həyata keçirilir.
“Türk Hava Yolları”nın Bakı nümayəndəliyinin rəhbəri Seyfullah İlyas isə iyulun 15-də İstanbulun Atatürk Hava Limanındakı terror aktı zamanı bütün aviareyslərin təxirə salındığını deyib: “Lakin hazırda Atatürk Hava Limanı normal iş rejimində fəaliyyət göstərir və hər hansı bir aviareyslərdə gecikmələr müşahidə olunmur”.
O deyib ki, hazırda Türkiyənin bütün hava limanlarında, turizm bölgələrində və mühüm strateji məntəqələrində çox ciddi təhlükəsizlik tədbirləri görülür.
Azərbaycan Sağlamlıq və Termal Turizmə Dəstək Assosiasiyasının sədri Ruslan Quliyev Türkiyənin azərbaycanlılar üçün əsas turizm ölkəsi olduğunu deyib.
Sonra AZAL və “Summer Tour” şirkətinin dəstəyi ilə iyulun 27-dən 30-dək Antalyaya səfər edən Azərbaycanın KİV-lərdən AZƏRTAC, “APA” və “Report”un jurnalistləri səfərlə bağlı fikirlərini bölüşüblər. Onlar səfər zamanı Türkiyədəki son hadisələrin ölkənin turizm sektoruna təsir etmədiyini əyani şəraitdə gördüklərini bildiriblər. Jurnalistlər Antalyada turistlər üçün hər hansı bir narahatlığa əsasın olmadığını, azərbaycanlıların yay tətili mövsümündə istirahətlərini Türkiyənin turizm bölgələrində tam təhlükəsiz və əmin-amanlıq şəraitində keçirə biləcəklərini qeyd ediblər.