İstanbul, 14 iyul (AZƏRTAC). Türkiyənin nüfuzlu “Ekovitrin” jurnalı tərəfindən keçirilmiş rəy sorğusunun nəticələrinə görə seçilmiş “10 ilin dövlət adamı” və “İlin ulduzları” mükafatlarının iyulun 13-də İstanbuldakı Haliç Konfrans Mərkəzində təqdimat mərasimi keçirilmişdir.

Rəy sorğusunun nəticələrinə əsasən Azərbaycan Prezidenti İlham Əliyev “Türkdilli respublikalarda 10 ilin ən uğurlu dövlət adamı” seçilmişdir. “Türkiyədə 10 ilin ən uğurlu dövlət adamı” nominasiyasında Baş nazir Rəcəb Tayyib Ərdoğan, “10 ilin naziri” nominasiyasında Türkiyənin nəqliyyat, dənizçilik və kommunikasiya naziri Binəli Yıldırım, “İlin xarici sərmayə yatırımı” nominasiyasında isə Azərbaycan Respublikası Dövlət Neft Şirkəti (ARDNŞ) qalib elan edilmişlər. Sorğuda “İlin ulduzları” nominasiyası üzrə qalib gələnlər də mükafatlandırılmışlar.

AZƏRTAC-ın İstanbula ezam olunmuş müxbiri xəbər verir ki, təqdimat mərasimində Azərbaycan Respublikası Prezidenti Administrasiyasının ictimai-siyasi məsələlər şöbəsinin müdiri, professor Əli Həsənov, Türkiyənin nəqliyyat, dənizçilik və kommunikasiya naziri Binəli Yıldırım, qardaş ölkənin dövlət və özəl qurumlarının, ictimaiyyətin nümayəndələri, iş adamları, ziyalılar və s. iştirak etmişlər.

Tədbirdə əvvəlcə “Ekovitrin” Media Qrupunun fəaliyyətinə həsr olunmuş film nümayiş etdirilmişdir.

Mərasimi açan “Ekovitrin” Media Qrupu idarə heyətinin sədri Kamuran Abacıoğlu qurumun tarixi barədə məlumat vermiş, rəy sorğunun nəticələrindən danışmışdır. Türkiyənin son dövrlərdə dinamik inkişafından söz açan K.Abacıoğlu ötən on ildə qardaş ölkə Azərbaycanın iqtisadi möcüzə göstərərək sürətlə inkişaf etdiyini vurğulamışdır. O demişdir ki, Azərbaycan çox böyük iqtisadi yüksəlişə nail olmuşdur. Azərbaycan Türkiyə kimi iqtisadiyyat nəhənginin daxilində - İzmirdə böyük Petkim layihəsini satın aldı və buraya 17,5 milyard dollarlıq sərmayə yatırdı. Bu, qürurverici bir nailiyyətdir. Biz Azərbaycan Prezidenti İlham Əliyevə buradan salamlarımızı və ehtiramlarımızı göndəririk.

Tədbirdə çıxış edən Prezident Administrasiyasının ictimai-siyasi məsələlər şöbəsinin müdiri Əli Həsənov “Ekovitrin” jurnalının kollektivinə təşəkkürlərini çatdırmışdır.

Bakı-Tbilisi-Ceyhan neft kəmərinin inşasından sonra Azərbaycanın və Türkiyənin Avropanın enerji bazarında yeni aktorlar kimi çıxış etməyə başladıqlarını bildirən Əli Həsənov demişdir ki, ötən 10 il dünyaya çox şey vermişdir. Amma ən dəyərli sərvətini - güc artımını Türkiyəyə və Azərbaycana vermişdir. Azərbaycan enerji resurslarını dünya bazarlarına çıxararaq iqtisadi, siyasi, sosial və digər sahələrdə bütün ehtiyaclarını aradan qaldırmış, eyni zamanda, bölgənin ciddi aktoruna çevrilmişdir. Türkiyə isə Xəzər neftini dünyaya çatdıran mühüm enerji mərkəzi olmuşdur. Bu gün Avropanın enerji təhlükəsizliyini nə Türkiyəsiz, nə Azərbaycansız, nə də Bakı-Tbilisi-Ceyhansız təsəvvür etmək mümkün deyildir.

Prezident Administrasiyasının şöbə müdiri Avrasiyanı təmsil edən 270 mindən artıq insanın “Ekovitrin”in bu sorğusuna qatılaraq səs verməsini həqiqəti tam əks etdirdiyini diqqətə çatdırmışdır. On ildə Azərbaycan nəinki inkişaf etmiş və bölgəni inkişaf etdirmişdir, eyni zamanda, Xəzər hövzəsini, Cənubi Qafqazı dünyanın iqtisadi və siyasi güc mərkəzlərindən birinə çevirmişdir.

Əli Həsənov ötən on ildə Azərbaycanın daha bir uğurunun da 155 dövlətin səsini qazanaraq BMT Təhlükəsizlik Şurasına üzv seçilməsi olduğunu bildirmişdir. Azərbaycan ikinci türk dövlətidir ki, Təhlükəsizlik Şurasının üzvüdür. Bizim bu gücümüzün meydana çıxmasında da, Türkiyənin dünyada bugünkü geosiyasi, geoiqtisadi, geostrateji və hərbi qüdrətinin artmasında da Azərbaycanın məxsusi payı vardır. Biz bu payı dəyərləndirənlərə təşəkkür edirik. Bu mükafat Azərbaycan Prezidenti İlham Əliyevin tam haqqıdır. Prezident İlham Əliyevin on illik fəaliyyətinə verilən bu dəyər – “10 ilin dövlət adamı” mükafatı tam reallığı əks etdirir. Bu işdə əməyi keçən, bu sevinci bizimlə bölüşən hər kəsə Azərbaycan hökuməti adından bir daha təşəkkür edirəm.

Türkiyənin nəqliyyat, dənizçilik və kommunikasiya naziri Binəli Yıldırım çıxış edərək ölkəsinin son on ildə qazandığı nailiyyətlərdən söz açmışdır. Nazir Türkiyədə 2004-cü ildə təməli qoyulmuş və artıq inşasının son mərhələsinə qədəm qoyan “Marmaray” layihəsinin “bir millət, iki dövlət” olan qardaş Azərbaycan ilə Türkiyə arasında mühüm əlaqələrdən birini təşkil etdiyini vurğulamışdır. Bu, Azərbaycan ilə Türkiyə arasında birbaşa daşımaları təmin edəcək ən mühüm layihələrdən biridir. Bundan başqa, Bakı-Tbilisi-Ceyhan, “Şahdəniz”, TANAP layihələri Şərq ilə Qərb arasında əlaqələri, Azərbaycan-Türkiyə qardaşlıq münasibətlərini gücləndirən mühüm layihələrdir.

Nazir bildirmişdir ki, biz qardaş Azərbaycanın Türkiyənin strateji sektoruna – neft-kimya sənayesinə yatırdığı sərmayəni təqdir edirik. Azərbaycanın getdikcə inkişaf edən, Qafqaz bölgəsində təminatçı ölkəyə çevrilməsində böyük xidmətləri olan Prezident İlham Əliyev bu mükafata tam layiqdir. Biz Prezident İlham Əliyevə türk milləti adından təşəkkür edirik.

Çıxışlardan sonra mükafatların təqdim edilməsi mərasimi olmuşdur.

Nazir Binəli Yıldırım Azərbaycan Prezidenti İlham Əliyevin layiq görüldüyü “10 ilin dövlət adamı” mükafatını Prezident Administrasiyasının şöbə müdiri Əli Həsənova təqdim etmişdir.

Məlumat verilmişdir ki, “Ekovitrin” jurnalının bu il fevralın 1-dən aprelin 24–dək keçirdiyi rəy sorğusunda 270 min 992 respondent iştirak etmişdir. Rəy sorğusunda 35 kateqoriya üzrə 105 namizədə səs verilmişdir.

Tədbirdə göstərilmiş filmdə Prezident İlham Əliyevin Azərbaycan Prezidenti vəzifəsində səmərəli fəaliyyəti, qazandığı uğurlar barədə ətraflı söz açılmışdır.

Qeyd edilmişdir ki, son 10 ildə Prezident İlham Əliyevin rəhbərliyi ilə Azərbaycan sürətlə inkişaf etmiş və dünyanın nüfuzlu ölkələrindən birinə çevrilmişdir. Filmdə dövlətimizin başçısının daxili və xarici siyasətinin uğurları geniş şərh olunmuşdur.

Bildirilmişdir ki, Azərbaycanın neft strategiyasının uğurla davam etdirilməsi, Bakı-Tbilisi-Ceyhan neft və Bakı-Tbilisi-Ərzurum qaz boru kəmərlərinin tikintisinin başa çatdırılması, enerji resurslarının dünya bazarına çıxarılması nəticəsində ölkənin büdcəsinə milyardlarla dollar vəsait daxil olmuşdur.

Azərbaycan iqtisadiyyatı şaxələndirilmiş, qeyri-enerji sektorunun sürətli inkişafı təmin edilmişdir. Azərbaycan Dövlət Neft Fondunda 30 milyard dollardan artıq vəsait toplanmışdır. Ölkənin strateji valyuta ehtiyatları isə 46 milyard dollara çatmışdır. Azərbaycan dünyanın 50 inkişaf etmiş iqtisadiyyatı sırasına daxil olmuşdur. Ölkədə yoxsulluğun səviyyəsi 6,2 faizə, işsizlik isə 5 faizə düşmüşdür. 2012-ci ilin nəticələrinə görə, ölkədə inflyasiya cəmi 1 faiz təşkil etmişdir. Son 10 ildə bir milyondan artıq yeni iş yeri yaradılmışdır.

İlk süni peykini fəzaya çıxarmaqla Azərbaycan kosmik ölkələr sırasına daxil olmuşdur. Ötən 10 ildə Azərbaycan iqtisadiyyatına 130 milyard dollar investisiya yatırılmışdır. Azərbaycan xarici ölkələrin iqtisadiyyatına sərmayə yatıran, Avropanın enerji təhlükəsizliyində mühüm rol oynayan dövlətə, sivilizasiyalararası dialoqun, qlobal siyasi, iqtisadi, mədəni problemlərin müzakirə olunduğu məkana çevrilmişdir.

Azərbaycan 2011-ci ildə 155 ölkənin səsini qazanaraq BMT Təhlükəsizlik Şurasının, həmçinin Qoşulmama Hərəkatının üzvü seçilmişdir. Dünya İqtisadi, Krans Montana, Cənubi Qafqaz, Humanitar, Mədəniyyətlərarası Dialoq forumlarına, “Eurovision” musiqi yarışmasına, Dini Liderlərin Ümumdünya Sammitinə və digər nüfuzlu tədbirlərə ev sahibliyi edən Bakı artıq dünyanın qlobal səciyyəli tədbirlərinin keçirildiyi mərkəzlərdən biri kimi qəbul olunur. Azərbaycan artıq idman ölkəsinə çevrilmişdir. Bunun nəticəsidir ki, Avropa Olimpiya Komitəsi 2015-ci il birinci Avropa Oyunlarının Bakıda keçirilməsi haqqında qərar qəbul etmişdir. Məhz bu uğurlara görə Prezident İlham Əliyev “10 ilin dövlət adamı” seçilmişdir.

Sonda xatirə şəkli çəkdirilmişdir.