Ağsu, 8 noyabr, AZƏRTAC

Bölgələrdə 9 Noyabr - Dövlət Bayrağı Günü təntənə ilə qeyd edilir.

AZƏRTAC xəbər verir ki, noyabrın 8-də Ağsu rayonunda keçirilən bayram tədbirinin iştirakçıları əvvəlcə şəhərin mərkəzindəki Heydər Əliyev Parkında Ümummilli Liderin abidəsi önünə çiçəklər düzüb, dahi rəhbərin xatirəsini ehtiramla yad ediblər.

Sonra Heydər Əliyev Mərkəzində təntənəli yığıncaq keçirilib. Yığıncaq Azərbaycanın Dövlət himni ilə açılıb. Məktəblilərin ifasında dövlət bayrağımıza həsr olunan şeirlər səsləndirilib.

Tədbirdə çıxış edən rayon icra hakimiyyətinin başçısı Ənvər Seyidəliyev 1918-ci il noyabrın 9-da Azərbaycan Xalq Cümhuriyyəti tərəfindən təsis edilən üçrəngli bayrağımızın 1990-cı il noyabrın 19-da ümummilli lider Heydər Əliyevin sədrliyi ilə Naxçıvan MSSR Ali Sovetinin sessiyasında yenidən qaldırıldığını bildirib.

Rayon icra hakimiyyəti başçısının müavini Sevil Mirzəliyevanın məruzəsində, eləcə də çıxışlarda Azərbaycan demokratiyasının dəyərlərinin simvolu olan milli bayrağımızın bundan sonra əsrlər boyu dalğalanacağına böyük inam, əminlik ifadə edilib. Bildirilib ki, bayrağımız dövlətçiliyimizin və müstəqilliyimizin rəmzidir.

X X X

Hər bir xalqın müqəddəs rəmzlərindən olan bayraq onun varlığının sübutu, dövlət qurmaq, ona sahib çıxmaq bacarığının əsas göstəricisidir. Bayraq, eyni zamanda, dövlətin və xalqın kimliyinin, apardığı azadlıq mücadiləsinin, təfəkkür və düşüncə tərzinin, mənəvi dünyasının görünən şəffaf və dəqiq meyarıdır.

AZƏRTAC xəbər verir ki, bu sətirlər noyabrın 8-də Zərdabda Dövlət Bayrağı Gününə həsr edilən təntənəli yığıncaqda səsləndirilib.

Tədbir iştirakçıları əvvəlcə ümummilli lider Heydər Əliyevin abidəsini ziyarət edib, önünə gül dəstələri düzüblər.

Sonra Heydər Əliyev Mərkəzində ümumtəhsil məktəbləri şagirdlərinin 9 Noyabr - Dövlət Bayrağı Günü münasibətilə hazırladıqları divar qəzetlərinə və əl işlərinin sərgisinə baxış keçirilib.

Təntənəli yığıncaqda Azərbaycan Respublikasının Dövlət bayrağının yaranma tarixindən, bu gün müstəqil ölkəmizdə dövlət atributu kimi bayrağımıza göstərilən ehtiramdan danışılıb. Prezident İlham Əliyevin 2007-ci il 17 noyabr tarixli Sərəncamı ilə Bakıda Dövlət Bayrağı Meydanının yaradılmasının milli-mənəvi dəyərlərimizə, dövlət atributlarımıza ehtiramın ən bariz nümunəsi olduğu vurğulanıb. Qeyd edilib ki, Zərdab rayonunda da 2011-ci ildə Dövlət Bayrağı Meydanı qurulub və bu gün bu meydan rayon sakinləri üçün ən əziz məkandır.

Tədbirdə Prezident Administrasiyasının məsul işçisi İbrahim Mustafayev iştirak edib.

X X X

Kürdəmirdəki Bayraq Meydanında 9 Noyabr - Dövlət Bayrağı Günü münasibətilə ümumrayon tədbiri keçirilib.

AZƏRTAC xəbər verir ki, tədbirdə rayon rəhbərliyi, idarə, müəssisə və təşkilatların kollektivləri, təhsil, səhiyyə və mədəniyyət işçiləri, ağsaqqallar, gənclər, “N” saylı hərbi hissənin əsgərləri iştirak ediblər.

Tədbir Azərbaycan Respublikasının Dövlət himninin səsləndirilməsi ilə başlayıb.

Sonra iştirakçılar Dövlət Bayrağı Günü münasibətilə təşkil olunan sərgiyə baxıblar.

Rayonun ümumtəhsil məktəbləri şagirdlərinin veloyürüşü maraqla qarşılanıb.

İncəsənət ustalarının ifasında zəngin repertuarlı bayram konserti iştirakçılarda xoş təəssürat yaradıb.

X X X

Dövlət Bayrağı Günü Şamaxıda da qeyd olunub.

AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin abidəsini ziyarət edib, önünə gül dəstələri düzüblər.

Heydər Əliyev Mərkəzində keçirilən tədbirdə çıxış edən rayon icra hakimiyyətinin başçısı Asif Ağayev iştirakçıları bayram münasibətilə təbrik edib, üçrəngli bayrağımızın yaranma tarixindən danışıb.

Rayon ağsaqqallar şurasının sədri Mayıl Alıcanov, şəhər 10 saylı tam orta məktəbin müəllimi Vasif Şıxıyev, Avropa liseyinin müəllimi Bəsirə Məmmədova çıxışlarında Dövlət bayrağımızın hər bir vətəndaş üçün müqəddəs dövlətçilik rəmzlərindən biri olduğunu qeyd ediblər. Vurğulanıb ki, Azərbaycan Xalq Cümhuriyyətinin yadigarı olan bu bayraq dövlətçiliyə, milli-mənəvi dəyərlərə, azadlıq məfkurəsinə və ümumbəşəri ideallara sadiqliyimizin simvoludur.

X X X

İsmayıllıda Dövlət Bayrağı Günü ictimaiyyətin çoxsaylı nümayəndələrinin iştirakı ilə təntənəli surətdə qeyd edilib.

AZƏRTAC xəbər verir ki, bayram iştirakçıları əvvəlcə ümummilli lider Heydər Əliyevin abidəsini ziyarət edib, önünə tər çiçəklər qoyublar.

Heydər Əliyev Mərkəzində keçirilən bayram tədbirini rayon icra hakimiyyətinin başçısı Mirdaməd Sadıqov açıb, üçrəngli bayrağımızın ilk dəfə 1918-ci ildə Azərbaycan Xalq Cümhuriyyəti dövründə təsis olunduğunu diqqətə çatdırıb. Qeyd edilib ki, dövlət bayrağımız ümummilli lider Heydər Əliyevin təşəbbüsü ilə 1990-cı il noyabrın 17-də Naxçıvan MSSR Ali Sovetinin sessiyasında yenidən dalğalandırılıb.

Rayon məhkəməsinin hakimi Azad Əliyev, veteranlar şurasının sədri Əlaləm Babayev, təhsil şöbəsinin əməkdaşı Rəşid Məmmədov, YAP rayon təşkilatı aparatının rəhbəri Anar Nəbiyev, filologiya üzrə fəlsəfə doktoru Sevda Qasımova çıxış edərək üçrəngli bayrağımızın xalqımızın tarixi yaddaşında, hər bir azərbaycanlının canında və ruhunda əbədi ucaldığını bildiriblər.

Sonra Heydər Əliyev Mərkəzində keçirilən tədbir mərkəzi meydanda davam etdirilib. Meydana xor kollektivinin oxuduğu himn sədaları altında dövlət bayrağı gətirilib. Bayrağa, dövlətə, Vətənə, Ümummilli Liderə həsr olunan mahnı və marşlar, cəngi səsləndirilib.

Bayram şənliyi günün ikinci yarısında da davam etdirilib.