SİYASƏT
Ukrayna qəzeti Kremençuq meri, həmvətənimiz Oleq Babayevin qətlində təqsirləndirilənlərin prosesindən yazır
Kiyev, 29 iyul, AZƏRTAC
Ukraynada çıxan “Faktı i kommentarii” qəzetinin 28 iyul tarixli nömrəsində “Kremençuq meri hakimin qətlə yetirilməsindən sonra “Növbəti mən olacam!”- dedi” sərlövhəli məqalə dərc olunub. Məqalədə bir il əvvəl – 2014-cü ili iyulun 26-da Kremençuqun meri, həmvətənimiz Oleq Meydan oğlu Babayevin lüləsi kəsilmiş tüfəngdən necə öldürüldüyündən və Poltava vilayətində bu hay-küylü iş üzrə keçirilən andlılar məhkəməsindən danışılır.
Məqalənin müəllifi Anna Volkova yazır ki, böyük əks-səda doğuran bu cinayəti törətməkdə dörd nəfər şübhəli bilinir. Andlılar məhkəməsi hökmü ilin sonuna qədər çıxara bilər.
48 yaşlı merin, etnik azərbaycanlı Oleq Babayevin faciəli ölümündən sonra bir çoxları əmin idi ki, başqa cinayətlər kimi bu gurultulu cinayət də açılmamış qalacaq. Amma Ukrayna DİN-nin mətbuat xidməti artıq sentyabrın 2-də məlumat verdi ki, Kremençuq merinin qətlində əli olmaqda şübhəli bilinən dörd adam saxlanılıb. Məqalədə vurğulanır ki, milis idarəsinin başçısı adları təhqiqatda keçən şəhərin adlı-sanlı adamlarının - “Vizit” özəl teleradioşirkətinin 52 yaşlı direktorunun, hüquq şirkətinin 53 yaşlı top-menecerinin və yerli ictimai təşkilatın korrupsiya əleyhinə mübarizə məsələləri üzrə sədrinin, mütəşəkkil cinayətkarlığa qarşı mübarizə üzrə şəhər idarəsinin keçmiş əməkdaşının adlarını açıqlayıb. Güc nazirliyində merin intiqam zəminində qətlə yetirildiyi bildirilir.
Sonra məqalədə deyilir ki, Oleq Babayev Poltava Vilayət Dövlət Administrasiyasının başçısı vəzifəsinə təsdiq edilmək üçün Kiyevə getməli imiş. Onu yola çıxmağına üç gün qalmış qətlə yetiriblər.
İkiqat cinayətin açılmasında iştirak edən, amma anonimliyini qoruyub saxlamaq istəyən mənbə qəzetə müsahibəsində deyib: “Oleq Babayevin Poltava vilayətinə qubernator təyin olunması haqqında xəbər düşmənlərini hərəkətə keçməyə məcbur etdi. Çünki başa düşürdülər ki, Babayevin vəzifəsi artandan sonra onların qara günləri başlayacaq”.
... O.Babayev iyulun 26-da, səhər saat 10-da təsərrüfatçı karyerasının başlandığı ət kombinatının idman kompleksində məşqə gəlməli imiş. Qara rəngli zirehli “Mersedes”ində evindən bir qədər aralanan O.Babayev paketi zibil çəninə atmaq üçün maşınını Sumı küçəsində dayandırır. Mer öz avtomobilinə tərəf qayıdanda başqa bir avtomobildən üç dəfə atəş açılır. Yaralardan biri ölümcül olur. O.Babayev təcili yardım maşını gələnə qədər keçinir.
Poltava vilayətinin Kobelyaki rayon mərkəzində keçirilən andlılar məhkəməsi O. Babayevin və ötən il fevralın 11–də qətlə yetirilən Kremençuqun Avtozavodsk rayon məhkəməsinin hakimi Aleksandr Lobodenkonun qətlləri barəsində birləşmiş iş üzrə ittiham tərəfinin şahidlərinin dinlənilməsini başa çatdırıb.
Oleq Babayev tərəfindən zərərçəkənlərin vəkili Anatoli Kononenko deyib: “Məhkəmə icraatının materialları ilə tanış olandan sonra bu qənaətə gəldim ki, müttəhimlərə qarşı əsaslandırılmış ittihamlar irəli sürülüb. Doğrudur, hələ bütün şahidlər dindirilməyib, hələ bütün maddi sübutlar, habelə videomateriallar, elektron daşıyıcılardakı informasiya araşdırılmayıb. Əgər andlılar məhkəməsi iclasların həftələr boyu davam etdiyi indiki tempdə işləsə, Poltava vilayəti üçün qalmaqallı olan bu iş üzrə hökmün çıxarılması yeni ilə qədər davam edəcək”.
Məqalənin tam mətnini oxumaq üçün aşağıdakı linkə daxil olmaq lazımdır: http://fakty.ua/203483-sleduyucshim-budu-ya---skazal-posle-rasstrela-sudi-mer-kremenchuga
Zeynal Ağazadə
AZƏRTAC-ın xüsusi müxbiri
Kiyev