MƏDƏNİYYƏT


“Ulduz” jurnalının növbəti nömrəsi çapdan çıxıb

Bakı, 3 avqust, AZƏRTAC

Azərbaycan Yazıçılar Birliyinin “Ulduz” jurnalının iyul nömrəsi çapdan çıxıb.

AZƏRTAC xəbər verir ki, jurnalın ilk səhifələri Xalq Şairi Sabir Rüstəmxanlının “Əlli il... üstəgəl iki gün” qeydləri ilə açılır.

Jurnalın yeni nömrəsində oxucular Namiq Hacıheydərli ilə müsahibə və müəllifin “Əski türklərin qutsal sayı – doqquz” yazısı ilə tanış ola bilərlər. Dərgidə dərc olunan Mətləb Ağa, Əlirza Həsrət, Rəfail Tağızadə, Aləmzər Sadıqqızı, Vəliyulla Novruz, Arzu Göytürkün şeirləri, Rafiq Hümmətin tərcüməsində tanınmış gürcü şairi Quri Otobaianın yaradıcılığından nümunələr poeziya həvəskarlarının marağına səbəb olacaq.

“Anım” bölümündə tədqiqatçı Cavanşir Yusifli “Sehrli sözlərin şairi”ndə Adil Mirseyidin yaradıcılığı haqqında söhbət açır. “Müsabiqə” bölməsində Azərbaycan Yazıçılar Birliyinin uşaq ədəbiyyatı şöbəsi ilə “Ulduz” jurnalının birgə keçirdiyi “Ən yaxşı uşaq şeiri” nominasiyasında qalib gəlmiş şeirlər və bu barədə Qəşəm Nəcəfzadənin qeydləri yer alıb.

Nəşrdə rejissor Stenli Kubrikin fəaliyyəti, Tural Cəfərlinin “Sonuncu dua” əsəri, Aydın Tağıyevin “Köynək”, Qalib Şəfahətin “Hamilə” hekayələri və Zərifə Əliqızının “Münasibət” novellası da oxuculara təqdim edilib.

Budəfəki nömrənin “Bölgədən soraqlar” rubrikasında filologiya üzrə fəlsəfə doktoru Bilal Alarlının “ADPU Cəlilabad filialında təhsil alan tələbələrin yaradıcılıq nümunələri haqqında” sərlövhəli yazısı və onlardan bədii nümunələr yer alıb.

Nəşrin “Tribuna” rubrikasında ədəbiyyatşünas alimlər Almaz Ülvinin “Əbdürrəhman Caminin “Baharıstan təzkirəsi və əsərin 7-ci rövzəsi” və Alxan Bayramoğlunun “Bircə günün hekayəti, yaxud M.M. Axundov jurnalistika haqqında” məqalələri dərc olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.