Bakı, 4 may, Ceyhun Alışlı, AZƏRTAC

Mayın 4-də Azərbaycan Dövlət İqtisad Universitetində (ADİU) müstəqil, müasir Azərbaycanın qurucusu və memarı, ulu öndər Heydər Əliyevin anadan olmasının 93-cü ildönümünə həsr olunmuş “Ulu öndər Heydər Əliyevin Azərbaycan Milli Kitabxanasına hədiyyə etdiyi şəxsi kitabları” mövzusunda sərgi-konfrans keçirilib.

AZƏRTAC xəbər verir ki, əvvəlcə konfrans iştirakçıları Ümummilli Liderin universitetdə ucaldılan büstü önünə gül dəstələri qoyaraq, xatirəsini bir dəqiqəlik sükutla yad ediblər.

Sonra qonaqlar Heydər Əliyevin Milli Kitabxanaya hədiyyə etdiyi kitablardan ibarət sərgiyə baxış keçiriblər.

ADİU-nun rektoru, professor Ədalət Muradov çıxış edərək Ulu Öndərin həyat yolunun, onun zəngin irsinin bugünkü gənclər tərəfindən dərindən öyrənilməsinin əhəmiyyətindən danışıb. Rektor bildirib ki, Ulu Öndər kitabxananı xalq, millət, cəmiyyət üçün müqəddəs bir yer, mənəviyyat, bilik, zəka mənbəyi adlandırırdı.

M.F.Axundzadə adına Azərbaycan Milli Kitabxanasının direktoru, professor Kərim Tahirov çıxış edərək, Ulu Öndərin Azərbaycan mədəniyyətinin inkişafına göstərdiyi böyük diqqət və qayğısından danışıb. Diqqətə çatdırılıb ki, 1993-cü ildə Azərbaycanda yaranan mürəkkəb tarixi şəraitdə respublikanın kitabxana şəbəkələri də məhv olmaq təhlükəsi ilə üzləşmişdi. Məhz bu dövrdə Ulu Öndərin xalqın tələbi ilə yenidən Azərbaycana rəhbərlik etməsi bütövlükdə elmimizi, mədəniyyətimizi tamamilə dağılmaqdan xilas etdiyi kimi, kitabxanaların da məhvinin qarşısını alıb.

Ulu Öndərin müstəqil Azərbaycanda kitabxana quruculuğunda mühüm rol oynayan daha bir uğurlu addımı ölkənin kitabxana tarixində dönüş mərhələsi hesab olunan “Kitabxana işi haqqında” Azərbaycan Respublikası Qanununun qəbul olunmasıdır. Ümummilli Liderin ideyalarını layiqincə davam və inkişaf etdirən Prezident İlham Əliyevin ölkədə kitabxana işinə qayğısından da danışan K.Tahirov, dövlətimizin başçısının 2004-cü ildə imzaladığı “Azərbaycan dilində latın qrafikası ilə kütləvi nəşrlərin həyata keçirilməsi haqqında” Sərəncamını xüsusi vurğulayıb. Bildirilib ki, bu Sərəncam Azərbaycanda kitabxana işinin inkişafında xüsusi rola və əhəmiyyətə malikdir. Kitabxana direktoru həmin Sərəncama əsasən, kitabların 25 min nüsxə tirajla çap olunaraq bütün kitabxanalara hədiyyə verilməsinin oxucuların yenidən kitabxanalara qayıtması üçün real şərait yaratdığını diqqətə çatdırıb.

Daha sonra çıxışlarda Heydər Əliyevin rəhbərliyi ilə həyata keçirilən mədəni quruculuq tədbirlərindən, dahi rəhbərin cəmiyyətin mədəni həyatındakı xidmətlərindən və kitabxana işinin formalaşmasındakı fəaliyyətindən bəhs olunub.

Sonda Ulu Öndərin 1995-ci il iyunun 3-də Milli Kitabxanadakı çıxışından hazırlanmış videoçarx təqdim edilib.