REGİONLAR


Ulu Öndərin hakimiyyətə qayıdışı Azərbaycan dövlətinin müstəqilliyini xilas etdi

Tovuz, 13 iyun, Famil Quliyev, AZƏRTAC

Milli Qurtuluş Günü sadəcə təqvim bayramı deyil, böyük ictimai, siyasi və tarixi əhəmiyyətə malik bir gündür. Vətənini, xalqını sevən, çətin, ağrılı günlərin dəhşətlərini yaşayan, hadisələri gözləri ilə görən insanlar üçün 15 iyun Azərbaycan xalqının ölüm-dirim mübarizəsinin tarixidir.

AZƏRTAC xəbər verir ki, bu fikirlər iyunun 13-də Tovuzda rayon icra hakimiyyətinin və Yeni Azərbaycan Partiyası rayon təşkilatının Milli Qurtuluş Günü ilə əlaqədar “Heydər Əliyev Azərbaycan dövlətçiliyinin xilaskarıdır” mövzusunda keçirdiyi “dəyirmi masa”da səsləndirilib.

Tədbirdə çıxış edən rayon icra hakimiyyətinin başçısı Tofiq Zeynalov qeyd edib ki, müstəqilliyimizin ilk illəri Azərbaycan xalqı üçün çox ağır keçib. Tale elə gətirib ki, 1991-1993-cü illər müstəqilliyimizin ilk illərinə təsadüf etsə də, ölkəmizin müasir tarixində hərc-mərclik, özbaşınalıq, anarxiya dövrü kimi xatırlanır. Həmin dövrdə yalnız bir çıxış yolu var idi. Bu çıxış yolu görkəmli siyasi və dövlət xadimi, Naxçıvan Muxtar Respublikası Ali Məclisinin Sədri, Yeni Azərbaycan Partiyasının Sədri Heydər Əliyevin Bakıya dəvət olunmasından ibarət idi. Azərbaycan dövlətçiliyinin gələcəyindən narahat olan xalqın ziyalıları ulu öndər Heydər Əliyevə müraciət ünvanladılar. Xalq Heydər Əliyevin hakimiyyətə qayıdışını təkidlə tələb edirdi. Bu müraciətləri nəzərə alan dahi rəhbər 1993-cü il iyunun 9-da Bakıya qayıtdı. Bu qayıdış xalqın istəyi, tarixi zərurət idi. Bu qayıdış insanların qəlbinə bir inam və rahatlıq toxumu səpdi, ölkənin təhlükələrdən xilas olacağına inamı artırdı.

YAP Tovuz rayon təşkilatının sədri Məzahir Bayramov çıxışında qeyd edib ki, ulu öndər Heydər Əliyevin Bakıya qayıdaraq Azərbaycan parlamentinin sədri seçildiyi gün - 15 iyun tariximizə Milli Qurtuluş Günü kimi daxil oldu. Bu təqvim Azərbaycan tarixinə qızıl hərflərlə yazılıb. Çünki bu qayıdış olmasaydı, müstəqil Azərbaycan da olmayacaqdı. Ulu öndər Heydər Əliyevin ikinci dəfə hakimiyyətə qayıdışı Azərbaycan dövlətinin müstəqilliyini xilas etdi, xalqımızın qürurunu, tarixini, bu gününü özünə qaytardı.

Çıxışlarda qeyd olunub ki, bu gün Azərbaycan Prezident İlham Əliyevin rəhbərliyi ilə işıqlı gələcəyə doğru inamla addımlayır. Respublikamız böyük sosial-iqtisadi inkişafa nail olub, regionda lider ölkə statusunu qazanıb. Azərbaycan hazırda Avropanın enerji təhlükəsizliyinin təmin edilməsində özünəməxsus xüsusi yeri olan önəmli dövlətlərdən biridir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.